|
JULGAMENTE
D'NHÊNGA D'BILAUZE Liza
d'Nha Rosa Mendes, menininha nova na flor d'idade, surda-muda, nascide
e criode na rua Sabandera, tava ta rebentá d'toque, mute salienta… Moda
tude criston q'Deus pô ness munde, ela também tinha direite
d'gostá d'quem q'dal na goste. Prublema, é q'ela já
tava formada amdjer, ma sô tinha catorze pa quinze one, cosa
q'ninguém sabia q'força d'natureza, ta trabaial na sê
corpim trique e traque... Bscaruda,
intentada, surda-muda d'nascença, era mute intligente, qué
na sê gête, ela tava comprendê tude du q'gente tava
dzê, sô ta spiá gente na boca... Anton, sê
resposta, tava bem log pa mei d'sinal, ma quês buuuu...buuuu,
d'sêu q'tude gente lá na nôs rua, já tava
cstumode uvi. Smême
assim, Nha Rosa Mendes sê madrinha, ca tinha brincadera q'ela,
ta tinha ela sempre limpinha, bem tratode o q'tava fazê d'Liza
um stampa d'menininha e spertá cubiça, d'tude qués
uim galoze daquês moce, d'nôs rua e zona. Um segunda-fera d'plumanhã, despos d'um grande final d'campionate, Mindlense X Cademca, d'dia dmingue q'Cademca tive sorte d'ganhá... Pa tristeza d' tude menine d'zona. Nôs rua cordá, n'alvaroce d'um triste nutícia.
Liza d'Nha Rosa Mendes, parcê na casa log cidim, q'um carinha
triste, bem tchorode, cabel tude sfluride q'um mon pa diante, chei
d'vergonha, ta gatchá sê bestidim tude chuje d'sangue...
Quê ela, tinha pirdide sê virgindade, incostode, lá
naquel parede d'Compe d'Jogue. Quel
cosa, fui quaz um conséi d'guerra, d'tude quês mãe
d'nôs rua... Nha Rosa Mendes, trapaiada sem sabé q'fazê,
marrá sê chaile na mama d'cadera q'Luiza ptode pa diante,
ês cambá casa d'sê Mã-Ti'Daluginha q'mandá
tchmá, cmade Ginha, Laura, Antonha d'Ceril e mas e mas... Um
data d'gente rinquiode na porta d'Mã-Ti'Daluginha, ta sperá
sabê du q'tinha passode. Ma tempe ca tava ta dá pa mute
conversa, anton Nha Rosa, ma Ti'Daluginha, cambá Staçon
d'Pliça, ba quexá. Na
Staçon d'Pliça, chef Manê Gêjar, racebês
q'aquel ruspeite d'um vês, mandás sentá e sperá
um bocadim. Despos d'uvi tude quel stora, contode saluçode,
pa quês dôs cmade, el encarregá quel pliça
q'tude Soncente tinha mede, por nome de "Dezoite", pa procuraba
sabê quem era responsavel daquel crime. Liza,
sabia quem era, qué q'aquel paixon q'ela tive pa Nhenga d'Bilauze,
na época grande guarda-redes d'Cademca, rapaz sporte, inda
mas "Campion" d'um fim d'semana. Resolvê, pa primer
vêz, namorá ma el, ma sem sperá q'tude quês
cosa, tava ta bá contecêl, assim tão rapte. Dezoite,
junte ma Nha Rosa Mendes e Ti'Daluginha, cumeça ta tmá
Liza pa bique, lá na Staçon, ma cosa ca bá mute
longe qué pa geste ma sinal e alguns buuuu, ela cabá
pa fazês comprendê, cma quem tinha sirvide d'ela, era
um guarda-redes ?! Log
pliça, mandá intimá alguns guarda-redes moda
Troquate, Guste, Nhenga ma Dui ! Liza, ma tude familia lá ta
sperás na Staçon!... Log q'ela oiá Nhenga, tchgá
lá na Staçon d'Pliça, el ca sperá pa mas,
el pontál log q'dede, assim quês ote nocente, pude ba'mbora
pa casa. Afronta
maria, trançode q'vergonha, cumeçá pa Nhenga,
basta s'el tava otchá um braquim p'el gtachá, el ca
tava pensá dôs vês... ma qonde el tava sabe, el
ca tava ta lembrá na bô é q'sabe !!! Pliça Dezoite ma Grama, já ptá Nhenga pa diante, p'el bass mostrá lugar, ondê q'el tinha fete Liza "muda" quel asnera... Telifone d'moreia, trabaiá log e tude Soncente fecá ta sabê, basta fui pove ta sigui quês pliça ma Nhenga, té tchgá naquel parede d'Compe d'Jogue, nem ca fui mistide mute splicaçon, qué inda la na tchon na tava tude chuje d'sangue... Tude
gente: ooohhhhh ! Mário Boca, q'ca tava midi sês palavra,
vrá na mei d'pove el dzê : - oh Nhenga, bô dal
um boa bebejada hum ?! Dezoite,
pliça d'seriedade, tchgá na Mário, dal uns carol
na cabeça e mandal ba'mbora... Cosa q'Mário, fazê
log ta corrê e q'parti vontade pa quem q'tava q'ideia d'dzê
mas algum cosa ?! Assim, quel reconstituiçon pa processe pude
cuntinuá sem mute xatisse. Tude
gente, despos pude bá, cada um pa sê casa qué
processe, bá pa Tribunal... Q'na época d'Juiz Indione
Tchátchátchá ( nome q'pove d'Soncente butzal
) um virgindade era ô casá ô anton, três
onde d'cadeia, na Tarrafal d'Santiago... Tchgá dia d'julgamente, pove d'munde na porta d'Tribunal, pa quês primer debate d'procurador q'era Dr.Serra, contra Dr.Ruzinha q'Cademca tinha puste pa defendê Nhenga d'Bilauze... Basta, Bilauze, mãe também, já tinha bode pedi Nha Rosa Mendes, ma Ti'Daluginha, perdon pa sê fidje !?... Ma ês, dzel ok ! Ma q'cosa já tinha bode mute longe e q'ês ca tava podê fazê nada ! Nhenga, tava tude rapindide, inda mas quel tinha Lutchinha, lá na casa ta sperá tem menine. El tava dvera, num catumba d'fogue, ma naquel fulia d'campion d'um dia el ca pensá na sê cabeça, na vida d'Liza quel tava ta bá stramontá... Moda el tchgá dzé Juiz, Liza tava d'acorde, ma prublema é q'Liza era menor d'quinze one !!! Na mei d'tude aquel trapaiaçon d'julgamente, cosa série, cosa d'arri, ca pudia tchá d'parcê na mei daquel spirte d'humor, prop d'Soncente...
Juiz, despos d'ter uvide, acusaçon ma defesa, vrá pa
Nhenga e dzêl : - oiça lá meu rapaz... Nhenga
pô impê !... Você então, estava com uns copos,
não é ??? Nhenga,
vrá deboche d'educaçon, chei d'humildade, el respondé
Senhor Dr. Juiz, cma devera, cma ês tinha ganhode campionate,
el tinha tmode sô dôs cupim, e el ba ta respondê
Juiz, ta mostral q'dêde ta ponta, sô pa dôs polegadinha... Anton, Liza muda, q'tava sentode lá na sala, ta sisti tude, q'oiá geste q'Nhenga fazê pa Dr.Juiz, ta pontá pa sô dôs polegada d'sê didim, pensá na sê cabeça cma Nhenga tava ta falá ametira!... Ela
dá um solte d'cadera, chei raiba ta crê falá q'sês
buuuu... buuu... Juiz, anton dzê pa tchal falá!... Ela,
pa geste, fazê Juiz comprendê, cma ca fui nada sô
um puntitchitcha q'Nhenga mêtel!?... Ma sim, tude sê big
corpe d'home !!! Pove
tive um ataque d'rize, q'ninguém tava ta podê controlá!!!...
Anton, Sr Dr.Juiz, mandá evacuá sala... Tude gente pa
rua e stora assim, pude fazê volta d'Soncente inter !!! Lembrode
té data d'ahoje ! Tude gente ba pa casa, qué setença era um mês despos, Nha Rosa Mendes ma Ti Daluginha, bem fecá scançode, qué Liza bem oiá sê "chica", prova q'ela ca tava ta sperá tem menine, o q'pa ela, fui amdjor assim!... Qué
despos, ela pude fazê um vida normal!... Sr.Nhenga
d'Bilauze, q'ca tinha ideia d'casá, nem flaça, feji
pa Dakar na Tangal, p'evitá quel cadeiada d' três one,
na Tarrafal d'Santiago... Ma smême assim, fui julgode pa contumácia... Zizim Figuera (José Figueira, Junior )
|