|
NH'AMBROZE Ô STORA D'UM PRIMER REVULÇON
Jà
naqés têmpe tàva pûde pergunta se nôs
Ilha divia ter side puvuôde o não, qé moda nos tude
sabé, pa mode sé posiçon giogrâfca, na linha
d'vênte sêque (Harmatão), binde d'dsêrte d'Sahara,
sempre condenôde a um regime d'sêca, sem tchuva, às
vêz, pa tchéu e tchéu ône. Assim, pa
mode éss situaçon, Cab Verd sempre tive grande prublèma
d'crise d'fome q'invadiba tude nos Ilha, sobretude na ônes trinta,
d'sêca valênte, q'portuguêz, antigue pov culunizador,
nunca pude vencé e q'té moda ta dzîde procurâba
ignorà tal situaçon e bandonà nos Pov na sés
crise d'FOME. Luiz Romano,
na sé livre OS FAMINTOS ta traduzi q'um grande força e
sentimênte chéi d'tristèza, tude éss situaçon
d'sufrimênte d'um Pov traide, na sé cârne e na sé
sangue… Sobretûde naqés Ilha mas agricula, moda SanAnton,
S.Niclàu, SanTiago, etc… Cma ca tem causa sem efêite,
assim na mês Junhe d'1934, pov d'Soncent, q'jà tàva
fôrte d'promêssa invão, q'fôme na barriga,
dà sé primer vêz, sé grite d'Ypiranga… Tude cumçâba
naqél plumanhã d'mês d'Junhe, moda qés gente
mâs bêdje d'nossa q'sempre passà mensàja ta
contà, pa un GRANDE BANDERA PRÊTE, fincôde là
drriba na rotcha d'Ôlte d'Solarine, ta gorgôloteà
na vênte. Despôs, BANDERA NEGRA DA FOME tchi pa RBÊRA
BÔTE, ondé CAPITÃO AMBROSIO, valênte e resulvîde…
Na comêçe, seguide sô p'alguns pessoa q'sés
Bandera Prête na mon, bem ta tchi decidide, pa morâda ta
grità: FOME… FOME… FOME… Pov bà ta ganhà confiança e po ta sigui Nh'Ambrôze! Dràpênte, qél meia duzia gente vrà centena, ba ta vrà mil e assim revulçon fui lançôde… Anton, pa ônze hora d'plumanhã, home q'amdjer trocolôde, tchgà na morâda q'força, dcidide a resolvé sés grande prublèma q'nñera nem mas nem mênes q'fome na barriga. Ôndé
q'naqél momênte, naqél dia e naqél hora,
Nh'Ambroze (Capitão Ambrosio), moda ta rêzà, naqél
grande poema d'Gabriel Mariano, pudia senhà o pensà cma
um dia él tàva fazêba parte D'HISTORIA D'CAB VERD
não sô cma primer HOME d'revulçon d'nos terra, cma
também primer mutivador num futur bastante pêrte, d'Liberdâde
d'tude um POV sofredor. Na tude sé
simplicidade, Nh'Ambroze, carpintêr humilde e home honêste,
q'tàva ganhà sé vida q'um grande dficuldade, qé
trabòi era pôque, cunsigui mostrà jà naqél
temp, e sem cré, cma Soncent jà era plâca tornante
d'tude decison politca d'nos Républica. Despôs
d'tonte réclamaçon e tentiva d'spàià sés
quixûme pa fazél tchgà n'uvide d'gente d'dirêite,
anton Nh'Ambroze cumçàba ta falà ma gente d'terra
d'sés MISERIA, moda num manera d'consciensalizaçon d'massa
e num d'sés scûrse, scrite na livre d'Senhor Nena (Manuel
Nascimento Ramos), Mindelo D'Outrora, sé slogan pa POV, spaiôde
na rua era simples: - BÔCES CME ÔNTE E ÔNTEÔNTE?
NÃO! E NO TEM FOME! BÔCES TEM TRABAIÔDE? DIAZA NO
CA TRABAIA! PAQUÊ NÔ TA BANDONÔDE!!! Êch
palavra tive um impâcte terrivel e grande na méi d'nôs
massa popular, sempre q'aqél BANDERA NEGRA na mon e fazé
rancà dalà qél primer revulçon d'Cab Verd
q'aqél Pov dsinfreôde ta grità: - nô bài,
nô bài, nô bà ranjà cmida, q'nôs
mon pa no dà nôs fidje pa cmé! Qé éch
gente grande d'terra, ta tude q'barriga chéi e és tita
marimbà na nôs… Orda cuntinuà ta passà d'boca a boca e POV, cada véz mas tchéu, na rua. Tude qél massa popular rancà p'Almanzên d'Alfandega, q'fui mitide porta dentre q'um zorra. Pov, num furia sem limite, invadi qés almanzên, és pô ta trà tude do q'là dentre tinha: açucra, midje, cévada, fjon, farinha d'trigue, batata, banha, mantêga, azéte, etc. Qé
naqél mumênte d'revolta, là ca tinha nem rei nem
rôque. Assim, cmida cumçà ta parcé na Soncent
pa tude banda d'sés rua. Ês tàva ratchà sôqe,
gent grande q'mnine junte, tàva bem q'sés caneca, bolsa
e tude o q'és tàva podé intchi, pa pudia levàba
cmida pa casa, qé MISERIA era grande na Ilha. Na méi
d'tude qél alvarôçe, pov mostràba também
sé lôde bom, qé és tàva sirvi e levà
té casa, pa isdà qés gente bêdje q'ca tàva
ta pôdé partçipà naqél revolta. Mûte
cmida, na pressa, fui lévôde e interrôde là
naqés areia d'Tchã d'Bombadera, ma Lômbe d'Tanque. Revulçon
continuà, Pov, despôs d'Alfandga, és rombàba
almanzén d'Nh'Alfrêdo Miranda e Joaquim Branco, mas cunchide
pa Nhô Brônque. Nho Brônque tentà storvà
pov d'antrà na sé almanzên, és dàl
q'um pâu na cabeça, dà él fui log levôde
pa Spital. Bonança cuntinuà q'Pov alvaroçôde
ta grità MOIA… MOIA…, éss é MOIA ma pa
tude gente. Ma, cma na
tude Revulçon, nem tude fui rosa naqél dia! Qé
despôs, bem qél râssaca, qé bem parcé
pliça mà tropa e fui là q'cosa bem piorà,
qônde Anton Grigôla, pliça q'inda um conché,
matàba um mnin, sem cré, q'ponta d'sé baiôneta,
q'él tinha esbenhôde na canhôn d'sé spingarda,
là na squina d'loja d'Nh'Alfrêdo Miranda. Tropa bem
d'Fortim, ondé q'era côrtel melitar, comandôde p'um
tal sargênte Ribeiro… Ês cumçàba pa trà
tir pu'àr, despôs q'intençon d' tràba na
POV! Fui là é q'bem parcé Senhor Dator Régàla,
q'dà tropa orda pa dispersâba e bâss imbôra,
assim él salvà tude qél Pov d'un massacre. Dator Regàla,
home d'bem e querido d'Pov, qél dia làçim, tambem
fcà na Stora, qé él era contra violencia amigue
d'sé Pov. Assim, cma tambem él savàba Pov! El pediba
Pov pa ca matàba Rufino (moda és contâme, era chef
d'pliça, na épca) q'és tinha cumçôde
ta dà d'pedra, tchôde na tchon, cubêrte d'sangue
e quâz môrte… Pov uvi… Ês parà log
d'dà d'pedra!!! Mi, mi nñera
nascide, qé um bem p'éss munde sô na 1939, ma sempre
um uvi nha Tia Avo Zia ô Nha Julia Martina, mas cunchîde
pa Nha Julia d'Tino, contà q'um grande orgui, emoçon e
admiraçon pa qél Home, corajoso q'fui Nh'Ambroze e Stora
d'sé Revulçon, q'pô Soncent in pêse na muvimênte. Là
pa d'nutinha, Pov calmà e cumçà ta antrà
pa casa. Durante mûte têmpe, na Cab Verd tude inter e mandôde
mantenha na carta, ca tàva falôde n'ôte cosa, snon
sênde na Revulçon d' Nh'Ambroze. Cosa mas heròique
d'éss Revulçon é q'POV sube cma Nh'Ambroze antràba
pa casa na fim q'mon baziu e sem nada. Qé él, sé
priocupaçon era dirigi qél revolta pa pudia oià
sé Pov fliz… e assim fui! Anton qél
Pov, num gêste d'sulidariedade, bà léval sé
parte. Q'aqél pacôte q'és léval, él
vendél e él pude comprà un bocôde d'càrre
salgôde q'él fcà ta pô algum têmpe na
sé catchupa! Moda ta dzîde na terra: P'INGÔRDA UM
CATCHORRE, UM BURRE Â MORRÊ!!! Ma, cma na tude Revulçon,
tem qél parte triste sempre d'Historia. No ca podé d'nihum
manera, tchà d'fàlà d'él. Assim, binde
d'Praia, mandôde pa govêrne portugês, tchgà
na Soncent um admistrador d'concêlhe (d'épca colonial)
por nom d'Tenente Raul Duarte Silva, cumpanhôde d'tropa, q'orda
spécial, pa rabentà… Log és cumçà
ta prendé tude q'és gente, q'era cabeça d'Revulçon,
pa julgàs e era: Nh'Ambroze, Serafim, Arlindo, Manuel Gambôa,
Muxim d'Pina, Jõn Pénoso e Eustàquio. Uns, despôs
d'julgament, bà pa deportôde pa Ilhas (Sal e Boavista). Nh'Ambroze
e tchéu d'sés cumpanher, bà quàz tude deportôde
p'Angola, ôndé q'alguns d'és té morré
prà là. Ma Nh'Ambroze, cunsigui inda voltà despôs
d'um amnistia geral… Êss
grupe d'hôme honêste e corajôse, q'jà naqél
têmpe dusafiàba qél regime Colonial, Fascita, q'jà
tàva ixisti, ta merêcé tude ruspêite e admiraçon
d'tude nôs geraçon, pa tûde têmpe d'Historia
d'Cab Verd! E pa guardàl pa sempre na mimoria e na nôs
coraçon, NH'AMBRÔZE fcà q'sé nome gravôde,
num plàca, q'tude honra, inaugurôde na dia d'Independencia
Nacional, là na tchon d'Soncent, naqél Avenida, q'tà
bài d'praça d'Dator Regàla té funde d'Rbêra
Bôte, ondé q 'partiba qél primer Revulçon
Cabverdiana, chéfiôde pa CAPITÃO AMBRÔSIO. Zizim
Figuera (José Figueira, jùnior) |