|
PUTCHE DE MÃ SABINA Capitcha, na principe, tive de pensá dôs vez sel divia ô non fazês quel pirraça c’mede de reaçon de Espanhol, bem cunchide na terra por ca ter mede de nada! Smeme assim, um quarte pa dez da note, Espanhol ma Putche rancá ta bai. El, Capitcha, que tava corrê de munde, incurtá camin, travessá Compe de Jogue rapte, bá fecá ta esperás lá naquel passaja, tude nú, garanhode na parede, naquel camin de passája banda de Monte Sussegue Basta log plumanhã naquel rancar de dia, cafê lá na casa, pa matá sodade de terra Bubista, foi tchitchorre (um pixim séc tchmode melon, que tava custumá bem na soque em grande quantidade de Bubista pa Soncente) que prima Mana tinha recibide d’icmenda, c’midje iliode, em vez daquel catchupa guizode, inganode c’uns puntinha de tucim bedje, moda era custume lá na casa de Mã Sabina. Tonte prima Mana cma Mã Sabina, que tinha binde de Bubista pa Soncente inda mnininha, nunca trocaba sês papiamente de Bubista pa quel de Soncente, cosa que tava notode sempre, quê quonde ês tava papial, ês tava impregá de manera natural quel “quer”mnin’z . Ma ê cosa que ca tinha prublema naquel tirrinha de Deus, quê pove de Soncente foi sempre custumode ta vivê em paz c’tude pove de munde, quontamá ma quel quê sê sangue. Levode pa quel tcher de tchitchorre t’assá na lume de fagon, bem ta tchegá quel manhente daquel Fudjinha, vezim e amigue d’infância de Putche de Mã Sabina, irmon d’André, cunchide pa Dedê, grande artista, tocador e fazedor de violão, que cuitode tempes despôs bem paralisá. Mã Sabina inda era mãe de Mone, Hilário, qu’era grande mecâneque, Manim e dum filha que sê nome ca tita bem’e na mimória grinhassim e que fui mãe d’Alda, Ofélia ma Djusinha. Vezim de Nh’Herminio de Telégrafe, lá na casa de Mã Sabina porta de rua era sempre aberte, quê lá ca tava cabá mnine t’entrá, ta sei, casa prop de gente de bon coraçon dum vez. Fudjinha enton, lá na casa ondê quel tinha tude dia sê cafê, era tratode moda um fîdje pa Mã Sabina, de quem el tava tmá tude dia sê bençon, na respeite. El era moda um irmon que tava protegê Putche, assim el ta tinha mil e um stora pa contá dês sê irmon de criaçon, que também pa confiança que sempre ês tive pa cumpanher tava dzel tude. Putche desde piqnim tinha uns canelona, ma pamode educaçon de casa, el era moda ove gorode, mnine espantode que tinha mede de tude cosa, tê dum folha de mote s’el caíba na tchon, quê sempre quel tava fazê mariode, el ca ta tinha nem tempe d’explicá porquê, quê ês tava dexil cada pascoçada. Cuitode, assim na camin d’escola mnines tava largal soc, na sê soque d’escola quel ta tinha na costa, pa sê desusper, quonde Fudjinha ca tava estode ma el, quê na casa ês tava dzel pa ca dasse na mnine de gente, o qu’era pa el um verdader tormente del ca podê defendê. Basta um vez raiba dal, el tchemá um mnine daquês que tava ta chatial “Diabe d’Inferre”, Cosa qu’era grave de dzeba naquel tempe. Quel mnine, injuriode más do que sel tivesse el dode um soc, bá fazê quixume na Mã Sabina, que pô tude ês dôs pa pô de joei e benzê corpe, c’aquel Pel Senal Santa Cruz, pa Deus podia defendês de “Barbincorde” ô quel Home Pel Senal St Cruz. Putche, moda Fudjinha tava custumá contá, fazê xixi na cama tê c’idade de dezasseis pa dezassete one, quê quaz tude dia plumanhã el tava levá c’aquel lençol de xixi na cara, qu’era pel tmasse vergonha e tchaba daquel vice, o que tava vral cada vez pior. Quê denote, quonde xixi tava pertal na cama, el que mede de Gongon ma Massongue tava fecá detode e tava cabá pa largá corpe la mesma na cama. Assim, el bem ta criá, vrá um homona, quê el era grandon dvera, ma sempre coborde, cosa que tude gente sabia na tchon de Soncente. Ma tude ês situaçon, ca impedil de ba pa Puntinha, pa Oficina Naval, despôs daquel grande quarta classe dum vez, d’escola de Sr. Alfredo Brito, quel fecaba “Distinte”, ondê quel prendeba e vraba grande mecâneque junte daquel ote, nôs grande Mestre de tude tempe na Stora de Soncente, por nome de Sr.Cunque (Teodoro Gomes) de quem el foi tê sê broce direite. Putche, bom mecâneque, cuntinuá sê vida sempre na mesme rume, el ranjaba um traboie de motorista lá na Casa de Telegrafia de PTT, que tava fecá na Tchã de Monte Sussegue, ondê que já tava trabaiá Rui Matos, um rapaz por nome de Espanhol e mas otes. Cosa bem vral mariode, quê el tive de ba fecá ta trabaiá de note e, cma mesme depôs de grande quel mede d’andá na escure ca tinha el bandonode, el tava largá de casa, da lá de Tchã de Sumeter, inda sem note fetchá, lá pa Bar daquel busode, pirracente de cara séria por nome de Capitcha. Pa basse esperá Espanhol, home estimide, que ca tinha mede de nada e que tava morá na Lombe, sô pês pudesse bá djunte pa traboi na PTT lá na Tchã de Monte Sussegue, qu’era perte de sê casa, ma sô que traboi tava cumeçá c’escure, pa dez hora da note tê seis hora de plumanhã. Sô c’aquel stora de Putche bem da lá de sê casa na Tchã de Sumeter pa Bar de Capitcha daquel hora mute cede, pô Capitcah intrigode, ma pa depressa el comprendê situaçon de Putche. Enton log bel n’ideia de pregal um partidinha junte ma Espanhol. Sô que Espanhol era um bocode escorroçode e tava andá sempre c’faca na cinta e sê oie de boi pa lumenhá de note, pal ca rolá (caí). Ma Capitcha, sê boca ca tava lá, quê já el tava custmode de fazê gente mede de note lá naquel passaja trás de Compe de Jogue, ora lode de bomba d’ága, ondê que tava morá Paulina Manca, o enton de lode de padaria de Sr. Jonas, ondê que tava bem passá tude gente de Monte Sussegue, cunchide também pa gente de “Terra D’Índio”, mode quonde ês tava ba pa cinema na morada, ês ta tinha sempre um panim pa limpá pê naquês broque de parede de Compe de Jogue, antes d’entraba na morada, sô pa gente ca tchemás de terra d’índio. Assim, de volta de cinema, despôs de meia note ô más tarde, Capitcha, brancon moda el era, quê el era de família de talione, tava fecá ta esperás tude nú, sebide derriba daquel paredon, cum oie de boi quel tava lumenhá quonde gente tava tchega perte del. Da lá derriba, el tava fecá ta tchemás sempre ta dzês psssiiittt... pssiiitt...pssiiitt. Enton, gente tava abri na tchada ta corrê, ta gritá quel Sandimora, ta bai... ta bai... ta coorê sempre sem espiá pa trás. Ma, cma ninguém ca sabia qu’era el Capitcha ator daquês goze, assim n’ote dia tava corrê log alvícera de passája de massongue pa tude banda de sês área ondê quês tava morá. Bem, tchegá vez de Espanhol ma Putche...! Espanhol, quel dia lá na Bar, sempre que sê faca na cinta, já tava c’corpe quente duns dôs bons grogue, mute falador, sempre ta espiá hora na sê arloje de pulse, pel ma Putche rancasse pa traboie, quê Putche tava tmá era só cafê ô limonada, quê el nunca fui home de cóc. Capitcha, na principe, tive de pensá dôs vez sel divia ô non fazês quel pirraça c’mede de reaçon de Espanhol, bem cunchide na terra por ca ter mede de nada! Smeme assim, um quarte pa dez da note, Espanhol ma Putche rancá ta bai. El, Capitcha, que tava corrê de munde, incurtá camin, travessá Compe de Jogue rapte, bá fecá ta esperás lá naquel passaja, tude nú, garanhode na parede, naquel camin de passája banda de Monte Sussegue. Putche ma Espanhol tava ta bem num garaiada, ta falá, quonde derapente esse Gongon cendê quel oie de boi e pô ta tchemás, ta fazês quel psssiiittt...psssiiittt...pssiiitt. Putche, fecá log ta tremê, Espanhol pô mon na cinta pa basse puxá faca, ma Gongon ca dal tempe e saltá log da lá derriba pa tchon e rancá trás dês. Esponte foi grande, que Spanhol só tive tempe de dzê Chiiiiçççaaa, dá el ma Putche pô ta corrê na mei daquel escure, dode uns dôs queda na direçon de sês traboi, Telegrafia de PTT dum vez, de Tchã de Monte Sussegue. Ês tchegá lá que linga fora de boca, Putche quaz ta morrê de coraçon e Espanhol ta dzê tude gente cma el ca tava custumá creditá na nada, ma quel dia lassim, devera el tinha oiode prop cosa rum que sês oie.
Agora el bem caí na mon daquês data de busode de Shell, quês tinha de trabaiá djunte, moda Armando de Nhô Honore, Nha Banha, Luluzim, Tchalense e más otes que tava passá sês vida ta passá Nhô Afonso, capton de rebocador Matiota, pau c’stora dum cantiguinha quel tinha trode c’seriadade, ma que tude gente tava conchê e cantá, prop pa pirraça, num inglês bem roncoi, qu’era quel: - I don’t I mean… Ship can never stop… Ship stand around, just like a Top. O que Tiu Afonso queris dzê nesse cantiga era: - um ca sabê qzê cum ta fazê, rabocador (Matiota) ca querê pará, el querê ê fecá sô ta rudiá moda um pião. Assim, quel malta tava tchegá segunda-fera na traboi, ês tava dzê Tiu Afonso cma ês ta tinha tocode sê múseca na boie d’Iszé de Canda ô Jon Tolentino (moda Armando tchegá de conta’m). Enton, Tiu Afonso tava fecá contente p’afronta, log el tava longas cada um sês vinte escude, menes Putche, que ca tava entrá naquel jogue, que mede dum dia verdade ser descoberte. Ma quês moce ta tinha Putche na lusbera, assim, cma el ca tava dzê nada, também el ca tava temá nada. Pa Putche, tude cosa de vida tinha entrode na orda, quê jal ca tava trabaia de note, mede fegíl tê de corpe um csinha, basta el vrá tê corajose. Assim, bá que traboi tava cabá na Shell pa cinque hora da tarde, pê na mama de cadera, el tava bai tê Plurim de Pexe, lá perte Shel, comprá uns dôs cabeça de pexe pa levasse Mã Sabina pa casa. Prublema ê que nôs corajose Putche de Mã Sabina, moda tude mortal pa camin de casa, tmá mau custume de bá dá de corpe (cagá) nas calma, longe de tude oie mau, lá pa traz daquel parede chei de broque d’antigue Sumeter Dsoite Dôs Oite (1888), que despôs foi transferide lá paquês lode de Rebera de Julion, e que tava fecá um csinha fastode de Sumeter Mercone ma Inglês e de camin de Monte Sussegue. Chatice ê qu’ês Sumeter tinha sês parede tude ta caí em ruina, chei de bróc pa tude banda, c’cara justim pa casa de Ti Manel de Matos( Moim de Matos), que da lá de sê casa inflizmnte tava sisti tude quel espetacle da tardinha, lusque-fusque, antes de Sol cambá, de gente ta cagá pra lá, o que n’era bom espetacle pa mnine de casa. Enton, quonde tava dá tchuva que viraçon, era um chatice mode quel tcher de matá que tava invadi tude casa lá perte. Um verdader cahtice. O que bem zará Ti Manel más ê quel bem dá fê cma na mei de tude quel pove cagador, tinha sê grande amigue Putche, cosa quel tava otchá um desafor, quê cumpade Putche ca tinha nescidade de basse dá de corpe pra lá pa quês banda pamode el tinha sê casa. Inda más, c’aquel polpona vrode sem respeite pa casa de Moim de Matos, ondê que tude família de Ti Manel de Matos tava tmá fê, sem podê dzê ô fazê nada. Enton, lembral cma Putche era medente pafronta, bel log um ideia na cabeça. Nhas gente, bsote ca nem duvenhá colê?! Ti Manel, que já tinha sê plone bem estudode, um dia da tardinha fecá ta goitá Putche. Qonde el parcê, quel sentá tude feliz ta dá sê polpada, Ti Manel bem devagrim, entrá na Sumeter, bá justim naquel bróc de parede, metê mon e limpá cumpade Putche polpa cum pedra!... Basta, Putche dá um grite e ba ta dzê: - Bi conbersa ê esse... e sei log ta corrê pa casa, ondê quel tchegá c folgue temode, ma fecá caladim, sem dzé Mã Sabina nem familia nada. No dia siguinte, log cidin, chei de mede, Putche bá ter de sê amigue Fudjinha, sô pa visal pal ca fecasse ta bá dá de corpe lá naquel Sumeter, quê Gongon tive el limpode polpa c’pedra datardinha d’ véspra, lá naquel bróc de Sumeter Dzoite Dôs Oite. Fudjinha, séc russe d’arri, ca queris nem creditá. Enton uns dia despôs el bem sube de tude quel stora pa prop boca de Ti Manel de Matos, que sabia de sês amizade e dzel cma era sôssim quel tava cabá pa trá Putche quel mania de fecasse ta bá dá sês polpada, na descontra, lá naquel lugar. Enton, nôs Fudjinha pirracente pafronta, incantode c’aquel ideia de Ti Manel de Matos, pô log storia del ma Putche, na telifone de moreia e storia foi log larode pa tude tchon de Soncente e fecá tê hoje em dia cunchide pa verdione na munde inter. Zizim Figuera (José Figueira, Júnior) Comentário: Comentário: Comentário: Comentário: Comentário:
Comentário: Comentário: Comentário: Comentário: Comentário: Gabriela
Amado Silva gabybamado@hotmail.com
Comentarios Anteriores a PUTCHE DE MÃ SABINA Comentário:
Comentário: Comentário: Comentário:
Comentário: Comentário: Comentário: Comentário: Comentário: Comentário: Comentário: Comentário: Comentário: Comentário: Ines ig@hotmail.com |
