|
Bem parcê Nh’Antunin Cunote, pai de criaçon de Mêmê Ove, ta tchemá tude gente atençon pa quel Bonque de Sone, quê quadre quel dia tava prop complete de gente lá sentode ta drumi, té um catchurrim que por acase tava ta passá pra lá, também fui panhode naquel vaga de sone... Quadre devera digne de pincel dum artista! Praça Estrela, pa quem que ca sabê nem tchegá de conchel naquel tempe, era quel praça de pove situode na parte Sul de Mindelo, lá ondê que dantes foi Salina, palque de pratica de mil e um cena desportive, moda football ma cricket, que dexá registode naquel livre d’honra, nome de tude aquês atleta verdione que fazê glória e história de desporte de Mindelo, na Soncente - Cab Verd. Hoje, té inda el ta lá, moda um fidje sem mãe, que sê estrutura completamente mudode, cosa que ta provocá um tristeza profunde na coraçon de tude quem conchel naquel época, que sê “obelisque de pedra prete polide” bem olte na mei ta fazê sombra pa ligria de tude quem sentaba deboxe del, lá naquel banda d’antigue Pavilhão q’era de Clube Sportive Mindlense oferecide pa John Miller, que despôs foi temode a força e ocupode pa tropa(cosa que Mindlense nunca más pude recuperá) e na fim fui Estaçon de Pliça. Da lá de sê altura, quel “obelisque prete”, que foi quebrode e destruide sem ninguém podê da conta del nem sabê pa dondê quel bai, tava dominá panorama geral de Praça Estrela na tude sê extenson e explendor, calcetode de mil e um pidrinha brónc e prete linhode bem trabaiode (obra d’artista), binde dum pedrera da la de Rebera de Vinha, que sês bonque de semente pintode d’incarnode e brónc, e sês canter na forma de estrela que sês espinhera ma acácia, ta niná pove de sês sombra ma sês virdura... Dividide na mei, Praça Estrela daquel ote banda, lode de Corte Tenis Mindelo, que sê Corete de Museca, que hoje também já ca ta lá e, tude sês renca de bonque de semente bem linhode, ondê que tcheu fidje de pobreza tava incontrá, sês desconse de corpe de tude dia e dum dia pa ote, sobretude na dia de calor... Praça Estrela, naquel tempe que pirraça ca tava cabá na tchon de Soncente, cosa rore n’alguns parte de munde, sempre na sê juguinha de “cara ô xis” e deboxe de sê silencie, também tinha mil e um stora pa contá... Assim, na mei daquel confuson de tude dia, c’aquel trupida de gente sempre ta passá pra lá, ta bai ta bem na fadiga de bescá vida, ô ês queria ô ês ca queria, ês tinha que fazê quel brake de custume, pará p’uvi alvicera, bibê quel grogue naquês butequim lá perte, dá dôs dede de conversa ma sês amigue e sei ta bai sês destine... Ma sempre que gitim pa ca sentada nunca naquel “BONQUE” bem especial, cunchide na pove pa “BONQUE DE SONE” ondê que tude quem sentada ô incostaba na el, del gente, del animal ô planta, tava cabá pa drumi quel sone profunde de tal manera que té dia dahoje ninguém ca sube explicá... eheheheh.... Fui lá na el q’aquel “MASCARODE”, que ta tinha quês mnina que tava estode pa camin ta bá bescá pon na paradia de Matos infrontode, naquel tempe de: Ô PIQUE... Ô PON, foi panhode, quê el incostaba um csinha pa descansá, sone panhal que sê mascra e tude, pliça tchegá prendel... Dá mascarode cabá na terra! Ta fazê parte importante de mobília de Praça Estrela, “BONQUE DE SONE” era quel bonque que tava fecá li derriba, descoberte de tude sombra d’arve, na ponta nordeste de Praça Estrela, quaz na entrada de rua de San Jon, perte de Sindicate Maritme e que costa verode pa parede de Vascona. Enton, tude vês que gente passaba pa Praça Estrela, tava incontrode quel grupim fiel de sempre, mobilia daquel “Bonque de Sone” cunchide também pa “Bonque de Nhô Foste”(Fausto Coronel), lá sentode, moda de custume, bodzê ta pagá penitença e, Deus defendeba um qualquer que tchegaba e sentaba lá na sês lugar, sobretude naquel hora devide, quê ês tava pedil na ton, log quel culcincinha de favor... Juntim, sempre ta drumi, incostode na cumpanher moda um cotche de banana, ta dá d’azete pa podia cabê na lugar, tava incontrode ês lá sentode naquel “bonque de maldiçon”, moda de custume bodzê ta pagá penitença, tude vez que gente passaba pa Praça Estrela... Moda voz de pove tava custumá dzê e, voz de pove voz de Deus, cma era pamode sês culpa pecode seberba q’aquel “alma de sone” tinha binde, pa fecá na volta daquel bonque, pa bafás, pas podia cabá de pagá tude sês culpa, de do quês tinha fete e tava ta devê na munde! Problema é q’aquel sonim ca tava perdoá, nem escui hora pa bafá gente, seja el quem fosse. As vez, té mei dia, na mei daquel sol quente quel pessoal tava estode lá sentode ta drumi, sem podê cordá, reagi ô dá corpe de si!... Era sentá, dá ba que sone! Enton, tude gente que ca sabia, era sempre conselhode pa ca sentaba naquel bonque maldiçuode! Basta, tinha té quês gente más antigue que concheba bem stora daquel Bonque de Sone de Praça Estrela ma sês gente e, log que tava falode ês, na el, ês tava pô log ta esconjurá que sês reza de: - “Sendimora, merda de gote prete, temporal de Sr.San Jon, piorrim, gilbon, maná... quês tava fectchá c’aquel Onje de bô Guarda Sonte de bô Serron (membrana que ta involvé mnine na barriga de mãe) pa fastá quel sombra mau de sone, pal ca bafada ninguém e basse que cara pa diante!... Pove inter na terra, sabia daquel “Bonque” p’uvi falá ma sem conchê verdade de sê storia. Enton, um segunda-fera (dia de sapater) datarde, nôs sentode deboxe daquel espinhera de sodade, la perte d’antigue Club Spotive Mindlense, despôs de ter esgotode tude quês alvicera ma relate de contecimente passode na terra na fim de semana. Bem parcê Nh’Antunin Cunote, pai de criaçon de Mêmê Ove, ta tchemá tude gente atençon pa quel Bonque de Sone, quê quadre quel dia tava prop complete de gente lá sentode ta drumi, té um catchurrim que por acase tava ta passá pra lá, também fui panhode naquel vaga de sone... Quadre devera digne de pincel dum artista!... Nh’Antunim Cunote, moda um juste, antes de rancá c’aquel stora de vida daquel pessoal de Bonque de Sone, cumeçá primer pa pontá sês nome, um por um, bodzê que mede de perdê um sequença de filme e, era: - Nênê ma Fauste Coronel que sê canhote na boca, Lela Charute, Didi Fincá Pau, Antunzim Roncoi, impregode de Loja de Nhô Palmirim, que tava passá vida ta tchocál pregue pa ba vendê e betá culpa naquel gote de loja gôdzide grande cmedor de pregue, em vez de rote, Dufega, Jon Cabafume, Nênê Malagueta e más e más otes, quê quel dia, na expresson de Nh’Antunin Cunote, bidion tava ta quei prop forte na linha... Enton fui fete silencie, el rancá que sê stora e pove calá p’uvil. Moda el tchegá de contá, quês gente daquel bonque lassim, tava estode devera la prop ta pagá culpa, quê sorte tchegá de passaba na sês porta, ma cma ês ca sube proveital, agora era pagá penitença, cosa que Nhô Pitra log confirmá, ma dexá Antunin cuntinuá. Quaz na fim d’ones 1940/1950 um noruega por nome de Thordal que tinha cumpainha de pesca de baleia la pa perte de Pole Sul, na Saint Georgia, de passaja pa Soncente-Cab Verd, oiá quel situaçon de nôs pove, enton bel n’ideia também mode situaçon geografeca de nôs Ilha, cma el podia contratás e fazês trabaiá pa ganhá dnher, em vez dês estode pra lá sentode sem fazê nada, o q’era bom pa el e pa nôs pove... E, assim fui fete um controte de três one pa cada um dês, que destine pa quês Ilha Inglês lá pa quel Sul, friu pafronta... Naquel tempe, pesca de baleia tava prop forte e cma noruega tava que falta de mon d’obra, verdione cambá pra lá ba bescá vida. Na principe, tude gente bai desposte pa trabaiá c’aquel oie de miséria de terra, naquês primer dia, tude gente tava ative e tude o quês poba ês na mesa, ês tava cmel sem descuti... Traboi era prop dure, moda Antunin Cunote contá, deboxe dum tcher da matá, na mei daquel ratchá baleia, cortá baleia, derretê baleia de plumanhã té denote sem pará.... Era traboi pa rendimente, quonte más ês trabaiaba más dnher ês tava ganhá... Ma pra lá, ca tinha dondê gastál! Lugar tinha tude inquante: - cmida ma bibida á vontade, cinema e um ambiente que tude conforte, que dente de casa nem friu sês tava sinti.Amdjor ca podia ser, sô que ca tinha amdjer!... Seis mês despôs daquel controte de três one, cosa q’Antunin Cunote vivê djunte ma sês cumpanher, resultode de tude quel esforce ta guentá cosa sizude, trançode que sodade de terra ma tude quês tendença recalcode, criol cumeçá ta seberbá, ta rafilá! Ês tinha direite a dez latinha de leite condensode pa semana... Era abri um lata, tchepál té na mei, betá fora, assim na dôs dia jas ca ta tinha, ês tava bem reclamá más... Um lata de cinque libre de jam (strawberry) era abri plumanhã, datarde jas queria ote. Pamode tude quês rafiladeza ma abuse, situaçon vrá prop mafe e cma controte era de mute tempe, inda más num compe e erme daquel lá, certe q’aquel cosa sebis na cabeça. Inda más, tende em conta que criol é um pove patriota amigue de sê terra, mi de nha parte até certe ponte ‘m ta compreendês. Ma problema é quês vrá más noruega que noruega e más inglês q’inglês...Ta mandá na terra de gente. Antunin Cunote dzê cma la deboxe, tude ês era “snoka du” e cma fui dalá quês trazê quel “ciré”, quês vrá t’usá moda noruega e vral comerce na Socente. Na mei daquel grande isolamente, trançode c’aquel sodade e tude tristeza de munde, mez na sês bem estar, Criol infrontá e, enton sei revolta, ês vrá mau dmunde esquode de cabeça ta dá noruega ma inglês de pau, sem midida nem brincadera!… Notícia bem log pa riba e Thordal, infrontode mandá log orda pa Saint Georgia pa cabás que controte! Enton, ês fui tude imbarcode num vapor de guerra inglês, ondê quês fui bem tratode e trazide pa sês terra de Mindelo na Soncente de Cab Verd. P’aquês que tive um csinha de juize, moda Antunin Cunote, Jack Cunqueli Coque, Dufega e otes más, ês comprá sês casa e metê na negoce de mei de Baía. Ma p’aquês más buzode que sempre vivê na descontra e pensá cma quel denhirim ca tava cabá, maldiçon panhaz e pôs cú la naquel “BONQUE DE SONE” ta pagá penitença... NA VOZ DE POVE...VOZ DE DEUS! Zizim Figuera ( José Figueira,junior ) Comentário:
Comentário: Comentário: Comentário: Comentário: Comentário: Comentário: Comentário: Comentário: Comentário: Comentário: Comentário: Francisco Sales chico.sales@cvtelecom.cv |
