|
QUEL SINE DE MINTIRA NA BARBARIA DE TI PLACE Lá na rua de San Jon, num conte bem gatchadim de Barbaria de Ti Place, longe de tude oie mau pa ca descunfiá, perte daquel porta de quintal de casa de Nha Joana Coronel, linhode que rua de Matijim, marrode espundrode num grande barra de fer, tava quel SINE... El fazê durante tcheu tempe, parte d’alvícera, cubiça ma intriga de gente daquel rua e de tude criston que passaba pra lá, pa bá cortá cabel, barba ô faze posente pa curiusidade e fecaba ta sabê nuvidade de terra, moda sempre fui custume na tude “Barbaria de Soncente”. Ma, quel Barbaria de Ti Place lassim, era um lugar mute especial, nimode pa mnine ma gente grande sempre ta entrá ta sei, na respeite, uns sentode ta trá cabel ô ta esperá sês vez, otes ta ijgá uril ô bisca, ô anton ta conversá que cumpanher, pa bá ta ijdá betá quel dia pa trás, deboxe daquel ambiente natural chei de MORABEZA prop de terra. Grogue ma bafa lá ca tava vindide, quê se gente queria, gente pudia passá da lá de barbaria sem prublema, de rua de San Jon pa rua de Sant’Antone, também cunchide pa rua de Matijim ô Canecadinha, ondê que cosa de manha ca tava faltá pa vendê! Assim, lá era um lugar que ca tava cabá gente e bem poque era quel criston que tava fecá um dia sem bá marcá sê ponte lá na Barbaria de Ti Place. Basta um pessoa estode infadode e queria esparajá vida ô sabê nuvidade de terra, era sô ba lá sentá um padoce ta esperá alvícera!... Assim, tava fecode ta sabê de tude inquante que tava estode ta passá na terra. Lá era moda quês lugar sagrode, ondê que pove tava bá esquecê alguns hora de sês miséria de munde! E cabá,“EL”tava fecá situode num lugar de grande muvimente de negoce, coraçon de cidade de Mindelo, que tava brangi rua de San Jon, rua de Matijim, Plurim de Pexe ma Vascona (lugar de venda d’ága binde de Tarrafal de Monte-Trigo, SanAnton), Praça Estrela, Praia de Bote, Captania, etc… Mute gente tava ba lá também, pamode Ti Place ma Jon Fibrinha, qu’era dôs bom Barber, sempre de coraçon na mon pa facilitá um corte de cabel de graça na fidje de pobreza... Ma também, ês era dôs pirracente sizude, stile dá que pedra gatchá que mon, sempre desposte p’uvi cosa que cada um ta tinha pa dzê ô contá. Assim, deboxe de sês popularidade, naquel lugar, gente tava fecá ta sabê de tude inquante que tava estode ta passá na munde, ma na vida de nôs terra Soncente. Ma pove também, tinha que tem mute cuidode no qu’ês tava betá de boca pra fora, quê na mei de tude quês pirraça ma stora de vida de tude dia, prop de terra, lá ta tinha quel “SINE” sempre de standby (alerta) que ca tava perdoá, seja el quem fosse que basse pra lá que sês MINTIRA! Contecê, q’um vez tive um crise d’ága na Soncente, mode tanque de vapurim que tava custumá trazê ága de Tarrafal de Monte Trigue-SanAnton pa Soncente, tinha frode. Enton, Jon Alvacora, um daquês pescador famose, fidje de terra bastante cunchide e importante na mei, mode era daquês valente que tava custumá sempre pô pove quel pexe na prote pal cmê, tchegá lá na Barbaria sem sabê de nada, um segunda-fera plumanhã, cum cabelon ma um barbona cabode de criá, tamonhe de manhã, pa fazê, despôs dum data de dia mitide na pesca de lorgue, lá pa Deserta (Santa Luzia-Djeu Bronque-Djeu Roze). Enton Jon Alvacora, despôs de ter betode Djondjon, sê subrim, bençon e dode quel bom dia de Deus pa tude gente uvi, cosa que tude gente log respondel!... Jon Fibrinha, barber de dia, cumpanher de Ti Place, log mandal sentá e, naquel ritme de expediente pa rapte, cumeçá pa tral cabel escovinha one time, despôs de ter el cabel cortode, bem cortode, Jon Fibrinha fazê um pausa, pará um bocode... Lá, Jon Alvacora, que era mnine de casa, otchá estronhe quel pausa de Jon Fibrinha e dal log fala ta dzel: - Oh, boy, what about esse barba?! Jon Fibrinha fecá muque ta pensá dôs vez e despôs dzel, bom ok e, enton el continuá sê traboie, el panhá sabon em pó pa barba daquel que ta tcherê prop sabe, comprode lá na drogaria de Djandjan, e cumeçá ta betal naquel putim de fazê prute prute de sabon pa barba e ta betál cuspe de sê boca, ta mexel c’aquel pincilim pa trançal té espuma de sabon cumeçá de parcê. Jon Alvacora trá log um solte daquel cadera pra fora, prop chatiode, descunfiode, cum raiba que só Deus ma el sabê!... El vrá pa Fibrinha num ton grave, el perguntal: - Oh, Jon, afinal esse é o quê?! Jon Fibrinha, que tava custumá arri mute poque, vrá que sê cara séria lá na mei de tude quês gente, el dzel: - Com muita pena, nh’irmon!... Adeche Jon, godzide bô n’sebe cma já tem uns dia lorgue que Vapurim, ta variode rastode na rastador cum broque na tanque d’ága, que nem ága Vascona ma Maderal se já tem na tchon de Soncente?! Jon Alvacora, sempre descunfiode, pensá cma era goze, quê devera c’aquês data de dia cambode lá pa Deserta el ca podia nunca duvenhá quel situaçon, inda más custumode c’aquês goze de Barbaria!... Enton, chei de raiba Jon Alvacora argui, trá denher de bolse, bá ta longá Jon Fibrinha valor de sê traboie e, na rafiladeza ta mascá taboque, sem gaguejá na sê voz roque rastode, dzê que voz olte pa tude gente uvi: - Ooohhh... Fibrinha, mi é fidje de pobreza, ma mi n´é tchuque!... E bô podê dexá, quê um sabê cma bo aguinha bô tel li gatchode só pa bôs mnine bnite! Ma ca ta fazê nada! E, pa esse reste um ti ta ba cabá de tral lá na Barbaria de Jon Monque! Basta tive um silencie, e despôs tude quês gente lá na barbaria, espiá pa cumpanher, ês largá t’arri, quê uns boys que tava lá sentode t’uvi quel conversa vrá pa Jon Alvacora, ês dzel: - Ommm, bai na hora de Deus, quê lá na Barbaria de Ti Jon Monque, qu’esse falta d’ága que prei está, p’ês fazê gente barba, ês ca tita betá cuspe na potim moda li na Fibrinha! Lá, ês tita cuspi gente el diretamente na cara! Foi log um risarada geral ta sei que força, da lá de dentre de barbaria, siguide dum “Diun… Diun.. Diun… Tlão”repicode naquel “SINE”, que tude gente de rua ma vezim que já sabia, tive de bem log ta corrê juntá na porta de Barbaria de Ti Place, sô pas podia oiá quem quel que tinha basode sê FNINHA (MINTIRA)?!... E assim, risarada tive de fecá más nimode, que tude quel pove ta participá naquel paródia, ta espiá p’aquel moce, que log abri na tchada, ba’mbora, quê jal sabia qsê q’aquel tocar de SINE queria dzê!!! Uns dia despôs desse passaja de Jon Alvacora na Barbaria, bem parcê um vente na Soncente que pô tude pescador na terra... Enton tinha tonte falta de pexe, que nem cavala se tava otchode na pedra de Plurim ta vendê. E, cma quel vente ca queria pará, pove d’orela de mar, na sês superstiçon, cumeçá log ta dzê cma era maldiçon, mode n’era normal um ventania daquel que terra sempre ta rudiá, té ta fazê fenil! Enton, num dia que vente calmá um csinha, bem parcê um moia de posse voador (pexe voador) ta bem de San Pedre. O que foi um verdader salvaçon pa pove e, pô tude gente admirode c’aquel moia que Deus mandá de ceu e vrá log assunte de conversa pa tude banda de Ilha de Monte Cara. Cma ca podia dexá de ser, done daquel monzada de pexe, que n’era nem más nem menes que Sr. Jack Camila cobe-chef de San Pedre, pescador strong, talvez segunde home más forte de Soncente, daquês tempe, despôs de Nhô Faustino de Maderal, tchegá tude bajofe, na galantaria e um data de cantan cantan, lá na Barbaria de Ti Place, ta contá pove cma el ê que tinha trazide quês tonte juvita (carrinha) lugode, carregadim de pexe de San Pedre, pa besse matá pove de morada fome! E, el fecá sempre naquel lenga lenga, d’etc, etc, malagueta...Ta pensá cma uvide de cada um era tchequer!.. Ma, cma naquel lugar ca tava faltá curiose, tive um daquês “rote busode” de Barbaria que parcê pra lá e dzel: - Oh, Nhô Jack, devera, devera, bsote foi salvaçon desse pove! Ma bocê bem contone cmanera que bsote consigui panhá tonte pexe assim, despôs de tonte dia de tormente, sem pescador podê panhá nada?! Enton Jack Camila, na tude sê firmeza que certeza, tmá tempe de rolá sês manga curte de sê camisa, pa quês muscle de broce podia fecasse ta subsaí más e, el rancá log ta contá sê storia, ta dzê cma, sentode trás de casa lá na San Pedre ta dá de corpe, bel um ideia na cabeça! Assim, el ma sês fidje e cumpanher pô ta betá padoce de queje de cabra ralode na mar e foi c’aquel tipe d’ingode quês fazê tude quês posse voador parcê na mar!... E, enton ês proveitá!!! Mal el fetchá boca, sei log quel SINE DE MINTIRA, “Diun…Diun…Diun Tlão!”, tocode pum corajose, que ba ta tocá bá log ta dá milha que mede de reaçon de Jack!... Basta tude gente largá t’arri e, Jack Camila vrá que sê calma d’home prop forte e segure del mez quel era, e que ca tava nunca busá de sê força, ma tava impô respeite!... Só el perguntá quem que tinha el tocode na SINE?! Ninguém ca piá! Basta, nem mosca nem mosquite se bô tava uvi ta voá quel hora, tude gente fecá muque e ninguém ca respondê, quê quel boys já ca tava nem pra lá... Jack vrá mau dmunde e, cma ca tive resposta, el panhá sê boina, jal ca nem trá cabel lá na Ti Place, sô el pô pê na mama de cadera e, el sei pa rua ta bai ta tchiá… Ma, cma naquel Barbaria ca tava cabá pirraça, enton foi vez de Capton Jesuíne, natural de DjaMoie, mestre d’ilhas e costas e dono de naviu REX, que devera na época era naviu de vela más rapte e corredor, cunchide na tude mar d’Ilhas de Cab Verd. Grande amigue de Ti Place e dode n’equipa de Clube Sportive Mindlense, que naquel tempe tava ta mandá na Campionate de Soncente sem nium derrota, cosa que fecá na storia de terra e fazê Capton Jesuíne criá um slogan, prop dseu, que sempre el tava repeti diante de sês amigue q’era: - REX NA MAR, MINDLENSE NA TERRA! Capton Jesuíne tchegá tude feliz na Barbaria pa ba tra cabel, log Ti Place mandal sentá e cumeçá sê traboi. Enton, na base daquel amizade quês tinha pa cumpanher, amigue bedje e fixe, ês rancá num conversa nimode, daquês que pove tava gostá d’uvi e que ca tava faltá nunca lá na Barbaria. De vez inquante, tava ta sei um gruguim que Ti Place ta tinha lá especial na sê armore sô pa sês amigue. Quê la ca tava vindide nium espece de bibida! Quonde cosa quentá, Capton Jesuíno, imbalode, que sê voz olte e roque, dzê pa tude gente uvi cma REX tava prop limpim e el tava ta ba sei de rastador n’Wilson dritim pa mar, quel dia mez! Ti Place, que já tava conchê bem sê amigue Capton, pô log lume na banca e crescentá: - Rex, limpim???!!!.. Hum?!.. Enton, agora é quel ti ta bá corrê!!!... Capton Jesuino, sem pensá, respondel log tude nimode cma naquel ote dia plumanhã, log cidim se Deus quizer, el tava ta bá “tumá café na SanBicenti e djanta lá Maio!!!”... Diun… Diun… Diun...Tlão!... Sei log quel tocar de SINE, que pove ta bem ta cumeçá de juntá! Capton Jesuíne, que comprendé situaçon, quê log lembral naquel SINE, já ca dzê más nium palavra e quel risarada, moda de custume, intchí log tude conte daquel Barbaria de Ti Place!... Quê assim era vida sempre nimode daquel lugar bençuode de Deus, ondê que tude criston tava cunsigui otchá sê posente... Na 1987/1991, tude vez q’um tive na Soncente, um tava ba tmá quel bençon lá na Barbaria de Ti Place, que inda el era vive, e djunte no fartá d’arri ta lembrá tude quês stora de nôs gente daquel tempe ma sês monte de pirraça. No falá daquel bonque d’uril quês tava sirvi pa trá nôs mnine cabel, c’aquel corte ratchode na mei moda um livre, nôs sempre t’arri, quê Ti Place, parcende que não, era também home de sê partida!!! É de lembrá cma enton, despôs de mute conversa, tude quês one q’um bai, el tava dzem sempre pam entrá e basse oiá um surpresa que té inda el tinha lá gordode pa recordaçon, só pal oiá s’inda um tava ta lembrá?!... Enton, mi chei de curiosidade, um bai ta corrê e, tal ca fui nha esponte, um incontrá quel “SINE DE PANHÁ GENTE NA MINTIRA”, de tonte recordaçon inda lá, moda quês brinquede mute desejode que mnine nunca ta esquecê nem ta gostá de perdê!... Enton, Ti Place inda em vida, bem que tude sê calma, pegá naquel corda de SINE, el toca quel, “Diun… Diun… Diun... Tlão” e t’arri el dzem pam oiasse cma té inda el tava lá ta dá conta de recode!!!... Ma, já ultemamente, n’agoste de 2006, quonde um tive lá, foi cum grande tristeza cum sube de morte de nôs grande Ti Place. E, um otchá quel Barbaria de nôs rua de San Jon, que foi lugar de tude aquês recordaçon de nôs infância e escola de vida de tonte geraçon, que nunca no ta podê esquecê, betode pra lá pa tchon, bandonode moda tcheu cosa de nôs terra que marcone, e sem quel SINE, calode pa nunca más fazê quel “DIUN… DIUN... DIUN… TLÃO!!!…” pa panhá mintirose!... Zizim Figuera (José Figueira, Júnior) Comentário:
Antonin Marques tonimarques29@gmail.com
Comentário:
Comentário: Comentário: Comentário: Comentário: Comentário: Comentário: Comentário: Comentário: Comentário: Comentário:
Comentário: Comentário: Comentário:
Comentário: Mais digo com todo o respeito pelo teu trabalho que espero um dia a quando da publicação do teu livro de "Storias" que espero também seja já, poderão ser introduzidas nos bancos das nossas escolas para os mais jovens. Pois actualmente por causa do tal "alupec" muitos se encontram numa confusão danada que nem sabem o que escrever. Pois
foi-lhes complicado o sistema mais do que faclitado. Foraç
e até próximo domingo como sempre. A malta toda gosta
e sagradamente leem as tuas estórias com zelo, alegria e boa
compreensão seja de que Ilha forem. Pois tenho aí mais
do que provas. É bom continuares a escrita no estilo Claridoso
que nos deixaram uma boa obra hoje sabotada por partidários
do PAICV, mesmo por uma corja de sampadjudos frustrados. Aquel abraço
Jorge Comentário: Comentário: Comentário: Comentário: **** Alias, atraves di es purtuges bera li, ta odjadu ma nhu ka e un omi kultu. **** Klaridozus ka dexa un ortografia uniformi nen pa kada (o alguns) varianti di nos lingua kifari pa un uniku standarti. Basta leitor ba konsulta konpilason faksimiladu di revista CLARIDADE pa odja ma kada Klaridozu ta skrebeba di se manera, un mesmu Klaridozu ta skrebeba kada ora di manera diferenti, sima da-l na kabesa, ku bazi na regras ortografiku di skrebe otu lingua (lingua di Tugas) i non ku bazi na regras ortografiku konsebedu pa linguistas dibididu pa sirbi nos lingua medianti un pertinenti investigason di fonolojia di lingua kabuverdianu. **** Purtantu, ortografia di nos lingua na revista Claridade - enbora kes artigu e louvavel - ka pode ser referensia pa skolas di nos tera di sekulu XXI. **** Di mesmu manera ki ortografia di Zizim Figuera - non obstanti ser louvavel ses kronika i/o kontu - ka pode ser referensia pa skolas di nos tera pabia kada ora Zizim ta skrebe di manera diferenti i, ademais, el ka e linguista nen el ka publika investigasons di nos lingua i, pa kaba mata, Zizim ta skrebe sima da-l na se kabesa di leigu na linguistika i non na bazi di rekomendasons di linguistas spesializadu na investigason di nos lingua. **** Nen si Zizim paga-m, N ka al dexaba-el nxina nha fidju lingua kabuverdianu! **** Pa termina, N ta lenbra-nho ma kenha ki aprova ALUPEC foi Governu di MpD, atraves di Dekretu-Lei nº 67/98, di 31 di Dezenbru di 1998, in 5º Suplementu di Boletin Ofisial nº 48, I Serie (nhu konferi lisin: ://alupec.kauberdi.org/decreto-lei-67-98.html - ka nhu skese po, na prinsipiu di es link: h t t p).
**** Konven sklarese-nho inda ma, na obra-prima disel (O DIALECTO
CRIOULO DE CABO VERDE – un livru di gramatika + leksiku), Baltazar
Lopes da Silva, lider di Klaridozus, uza skluzivamenti alfabetu fonetiku
pa skrebe palavras di nos lingua (ku uzu di “K” pa reprezenta
son [k] i ku uzu di mesmus letra utilizadu pa ALUPEC pa reprezenta
tudu kes otu son di nos lingua, exseptu pa nazalizasons i sons palatal).
**** Purtantu, Sr. Jorge Cleofas Martins, nhu ta papia so padja. Comentário: Comentário: Jorge Cleofas Martins jorge.cleofasmartins@cvtelecom.cv |
