|
JON
POP'SÉQ (STORIA I)
Mindelo
ones 40/60
Naqél temp, q'Baia d'Port Grand, catàva càbà
vapor e q'aqél muviment d'comerç tàva
sustentà tud qél pov d'Sãocent e Ilhas,
e pa ca ter sempr, d'usà cma "Té Got d'Mané
Jon tàva ingordà na gémada" xpresson,
romantca e poétca d'nos Serge Frusoni, usod pa mostra
qél força d'vivé, d'nos terra.
Ess
xpresson, fora à part, Sãocent q'cé fartura
na épca também sempr tive cés figura
q'tàva e tà fazé part daqél palq
teatral d'cé dia a dia. Sobretud naqél temp,
qél méi d'Baia q'tà là fui un
verdader palq d'teatr na qual tud aqél q'fui cé
actor, nunca tàva scàpà d' passà
na cena.
Naqél
convulson, daqés barulh d'ptà bote na mar, poq
tàva importà, qual é hora q'fosse, pa
bà ganhàsse qél pon d'cada dia, suod
cansod, pa pudéss crià cés fidj, fui
durant ones, romaria d'tud un pov, na méi daqél
Baia d'Port Grand, ondé q'tchéu déz,
tchà cés vida.
Também
tinha cés pirràça e cés pirraçent
q'cés guerra entre és, na tud linga qés
tàva dféndé amjor, en q'inglés
era dominant, q'cé FUCK YOU, primer cosa q'tud mnin
d'zona e d'Sãocent inpése tàva prendé
desd d'berç.
Actors
era tchéu, e s'un bem dàba pa screvé
tud cés nom li néss storia, éch pàgna
catàva tem lugar e era precis cumçà pa
Djo Figuera nha pai, q'Deus dàl céu, Da- matinha
e milhares d'figurant moda Nh'Antunim Cunot pai d'Mémé
Ov, Nho Jack Cunclicoq e màs e màs…
Jack
Cunclicoq é daqés q'cé nom fcà
gravod pa sempr na méi d'Baia e na négoç,
pamod un vez, él dàba Capton Jesuino, un carta
pàl lévàba un amig d'céu na Tarrafal
d'Santiago pa mandàl (1 ou 2 macacos) pa vendé
na bord. Mà cma él inganàba na scrita,
él scrévé (1 0 2 macacos). Qé
él sabia lé poq e prà jà él
sabia sinà cé nom, o q'pa él e muts na
épca, era un grand cosa.
Anton
fui un azar da gàita, qé Rex naviu d'Capton
Jesuin, q'otchàba qél cosa un bocod stronh désd
princip, parcé ta entrà na Port Grand, q'cés
102 macoq, ingone d'scrita d'Jack Cunclicoq… bsot duvnhà
o q'fui dspos???
Ess
é so pa bsot oià cma Stora d'éch li tà
tinha un data e quàz tud dia naqél nos Baia
d'Port Grand, sala d'vsita d'Mindelo, d'Sãocent Cab
Verd.
Mà hoj, éss stora ta cuntinuà é
q'nos Jon Pop Séq, personàja SURD, négociant
d'Baia, cunchid d'tud gent, figura mut spécial, pamod
cés Storia famoz e cés pirràça.
Pa cumçà e pa ciùms d'mut màlta
jovem, Jon Pop Séq, o q'mut gent ca sabé, por
iss un ta dzél li, fui talvéz, primer cantor
d'RAP na Mundo Inter.
Qond
él tàva stod tmod cé coq, nos ta lembrà
d'él, là dentr d'Bar Micà d'Senhor Hilas
Miranda, rua d'Sanjon, ta cantà qél célebr
cantiga, na ritm d'RAP, q'té inda catinha na Mundo,
s'nha mimoria é boa?! RAP bem cunchid e apreciod pa
tu qél malta buzod, d'Jon Fliner (Myka Barronq, Lexandr
d'NhoToi Lùlù e màs e màs, q'tàva
cumpanhal na cé fulia, ta tocà palma q'força,
na mon, pa ligria d'qém q'era spéctador: "Nasci
por malandro…malandro eu sou…fàca na cinta…tchapéu
dizàbado…O Senhor Màrio? Mi faz favor di
dizer…quantos peixes tem o Mar…???" El tà
cuntinuà: "Come on side…come on guéla
(girl)…a long john side Speak many languich (language)…Speak
méricone…"
El
tinha cé bote q'Alxandrino Carvalho dàl p'él
fcàba ta pagà d'poq, e là él tàva
bà pa bord, fazé cé negoç, apsàr
d'cé SURDEZ, q'inflizment él tive e moda él
tàva contà, pamod un Topét'Igùg
(Papeira) q'Saromp mal curod qond él era mnin.
Assim,
él càtàva suportà q'gent subiàl
o fazé qél gést d'po mon na boca ta fingi
subiàl. Era tud un probléma, él tàva
vrà agressiv, chéi d'ràiba, mà
él tàva xplorà aqil bem, qé s'bo
qizéss calmàl, bàsta bo ptàl un
coq là na Bar Micà d'Hilas Miranda ondé
qél tàva stod sempr.
Un
sexta fera, d'plumanhà, q'tud gent na ponta d'squina
d'rua d'Praia ta sperà Màla-Real antrà
na Port ta bem d'Nort pa Sul carrégod d'passager ta
bài d'viàja d'turism pa Brazil/Argentina. Nos
Jon Pop Séq tàva là naqél guarita
d'Càiz N°1, féte d'madera drriba d'mar q'maré
cheia ta dà d'corp (càgà)… Faca
un daqés buzod d'Ponta d'Praia intchi un bald d'àga
d'mar bem dvagarim… e puff, dàl un bonh, d'boch
pa rriba…nos Jon séi dàlà dentr
furioz!!! Riso e màs riso na tud qél Ponta d'Praia!!!
Qél
dia là, jàl ca bà pa bord e él
bem sub cma Fàca tinha sid pog pa fazél qél
goz. El bà quechà na pliça! Mà
cma Fàca dsaparçé uns dia…cosa bà
ta calma moda tud qés quecha inocent e pirraçent
sem maldad q'pliça tàva recébé.
Anton na dias siguints, Sobd/Dming, Hilas mà tud qéz
màlta d'Ferraria d'Jon Fliner, pa consolàl,
resolvé fazé un super match d'futebol.
Bar
Micà D'Hilas contra Bar Belmar d'Nha Bia d'Bar, amjer
d'Zacot, chaufér d'obra d'Port, tud és d'rua
d'Sanjon.
Equips
fui organizod! Pa bar Mica cative prubléma qé
és linha tud qél malta d'Ferarria d'Jon Fliner
e guarda-redes era JON POP SEC. Equipa d'Bar Belmar, Zacot
ranjà qél malta na chaufér d'obra d'Port,
d'Càiz Costàvel. Tàça era qés
dos Mnin, Tchoff (Arlindo) d'Hilas mà Biàta
e Zé d'Bia mà Zacot.
Anton
dia Dmingue, tud gent pa Rbera d'Julion, là pa lod
d'colà sanjon, pa bà oià qél parodia.Rizàràdas,
siguid daqél bon Coq, té pa oi. Pa qem q'partçipà
na cota, tinha un super arroz q'fàba, q'un scabèche
d'plombeta, preparod paqés Dona Biàta e Bia,
q'tàva ta speràs!!! Assim fui qél tard
imperdoàvel e impagável q'nos Jon Pop Séq
na baliza…un verdader régàl.
Dspos
d'tont pripécia e q'tud qél pssoal quàz
fusquim q'Jon Pop Séc puste n'andor e ta cantà
cés RAP, un tràz d'ot !A pont té q'jàl
tinha sqiçd e perdod qél bald d'àga d'mar
d'Fàca, és dos braçod, ta tmà
coq, séi té na ratrot…q'JOHN tud fliz!!!
Maravilha!
Tud corré mut bem e tud gent diverti d'mund nun ambient
prop caloroso. So é q'na fim tive un piquen drama na
ora d'intréga d'tàça q'era Zé
d'Nha Bia d'Bar Belmar a Nha Biàta d'Bar Mica q'tinha
ganhod! Bia, q'ca sabia, cma Zacot tinha puste cés
fidj d'tàça e q'credità cma éla
era ubrigada a intregà cé fidj na Nha Biàta.
Anton Bia, po joéi na tchon e ta tchorà, pdi
Biàta d'ismola pa tchàl q'cé Zé
porqé era so él so q'és tinha. Mà
cosa cabà ràpt qé tud qél malta
era dvera fixe e amiga,és po tud ta consolà
Nha Bia q'tàva chéi d'emução e
assim tud gent antrà fliz pa morada e ta cantà
un cantiguinha q'tàva na moda qél vez…
REINATA…
REINATA… REINATA… A MINHA VIDA É UMA SERENATA…
Zizim Figuera (José Figueira,jùnior)
|