|
NA FORÇA DE LETE DUM PARIDA
Tanha Fina, irmã de Fluripa d'Olte de Bomba, tudes'dôs
amdjer inda nova na flôr d'idade ta rebentá de toque,
tive de separá de cumpanher, naquês dia lassim, despôs
de tonte one ta vivé djunte na mesma casa, lá ondé
que sês mãe criás desde piquenim, quê
pa Tanha mãe d'oite fidje, na vespra de nove, lugar já
tava ta fecás prop ingotchode e, té ta saís
de poque… Anton,
Fluripa que pla graça de Deus, já tava ta trabaiá
e que té inda ca tinha tide fidje, fui obrigode cum czinha
de tristeza, de proveitá quel quadra de Natal, pal fazesse
sê separaçon, desmudá e basse morá lá
pa Tchã de Calapáda e cumeçá um nova
vida, pa despôs basse morá em fixe, lá pa mei
daquel rebolice de Tchêtchenia na Soncente. Tude
ês chatice, pamode sê irmã Tanha que ca queria
sabé de descançá, sô ta pari, e inda
ca tinha mute tempe qu'ela tinha tide um par de gema… Assim,
na tude quel sê filosofia barote de ter fidje, quê Deus
é que dexá!... Lá tava ela, más um vez
cum barrigona tamonhe de manhã, ta torná esperá
mnine. rublema
é que naquel tempe, ca tinha ecografia, anton ela tava passá
tude quel tempe, só ta pedi ''Nosse Senhor Jesus Criste''
pa defendel de torná tem gema, quê senon era log um
chatice, ter de podê sustentá más dôs
boca nesse catchupa, deboxe de tonte pobreza… Flizmente
que Deus uvil e, pa sponte de tude gente, du que bem desse vez fui
um matchim d'oie aberte, prop scritim, um czinha piquenitchim, mode
el qu'era de sete mês, ma fortim louvar a Deus e chei de saúde…
E, pa mãe Tanha, el ca tava fecá esfrençode,
quê pa ela ês tude era ''djize same'' e dode nô
num só tripa ... Morode
naquel casinha fete de pedra e borre, coberte de paia ma coipe de
pau de carapate, trazide da lá de Monte Verd, pa sês
Olte, deboxe daquel sombra onde era sês casa, sempre lumnhode
pa quel candirim de pitrol, pa tistmunha e use de tude dia e, de
tude cosa lá dente de casa, moda gordá lume pa pegá
fagon, lumenhá casa etc…etc… Fui
lá qu'ela ma Djê de Nha Chiquinha, sê cumpanher
que cabá d'ijdal medjorá quel casa que mãe
dexal, ijdode pa sês cumpade Djindja ma Spirre, tive quês
monzada de fidje na pobreza, ma sempre que mute amizade, respeite,
paz e amor. Sr.Djê,
bom pai e cumpanher, home de traboie na stiva de vapor de mei de
Baía de Porto Grande, nunca faltá sês fidje
c'aquel três por dia derriba de mesa… Sô
quel era, daquês home de rua sem posente, cunquistador que
tava corrê que tude rote, lá ondê que tava tcherel
saia… Ma Tanha, na sê bom intendimente, ca tava ligá
pa nada desse munde, quês cosa Djê, quê pa ela,
Djê pudia bai e torná bem, quê lá qu'era
sê casa, e el é qu'era sê motche de certeza e
cabá, dá lá el ca tinha más pa dondé
bai… Tanha,
um strong d'amdjer bnitona, já era custumode na criá
fidje sem merrinha, bem mamode na lete de sês dôs bom
peite que Deus dal… Basta té jal era cunchide de tude
gente lá d'Olte de Bomba, pas er um Mãe carinhosa
que sempre sube cuidá de sês fidje e, ás vez
té de fidje dus'otes cabode de nascé, que sês
mãe ca tava podé dá vencimente na lete, pa
sustentás… Anton,
log naquês dia, despôs de nascimente de sê ultme
fidje Tchubim, Tanha bem parcê cum prublema ta chatial, quê
Tchubim mnine nascide de sete mês, tava ta fecá gordim,
ta mamá drete pa sê tamonhe e pa sê idade, só
quel ca tava ta podé dá vencimente, na tude quel rebera
de lete que peite de mãe Tanha, tava ta fabricá… Basta
era tonte lete, ta bem de veia de peite de Tanha, que tinha ela
más era ta sofré, chei de dor dia e note, c'aquês
dôs máma tude ratezode sempre ta esgritchi lete pa
tude banda, nem quês bica de casa d'inglês de nôs
terra, na tempe de tchuva… Sofrimente
de Tanha era tonte, té que vezinha tava bem tcheu vez por
dia esfregal ôlie de calipte na peite, pa ijdal escambrá,
ma era cosa que ca tava durá mute, quê assim, quês
paraba d'esfregal, quel dor desusperode tava log torná bem… Anton
num tentiva d'esleviá Tanha, de tude quel sofrimente, fui
betode mnine que gente grande, lá pa quês Olte de Bomba,
ma Calapáda, Spia, Tchêtchenia, ma Ilha de Madera e
tude quês banda pra lá perte, ta spiá um casa
ondé que tivesse cadela parida que catchurrim nove, pa bá
pôs ta máma na peite de Tanha, pas pudia tral tude
quel lete e eslevial de tude quel dor, pa desconce de sê corpe…
Tal era custume de terra, quonde exe cosa tava contecê, c'alguns
amdjer parida de nove… Quel
hora lassim, n'era hora de nada, quê cmade Tanha Fina, cuitada
tava pra lá infrontada, desusperada ta torcé de dor…
Ma, nôs tude sabê manera que nôs criol é… Apôs,
n'é lá dente de casa, daquel hora, que cumpade Djindja
ma Djê, ta resolvé sei cum pate-pate de fadiga, ta
descuti prublema de colé dor que tava doé más
tcheu derriba desse Munde?!..
Anton cumpade Djê, done de casa que ca pudia fecá por
boxe, replicá ta dzé cma n'on, quê era dor n'uvide!...
Mari
Curvim que tava ta bem ta tchegá, ma sê filha Funny
Eyes e que ca tinha nada ver c'aquel conversa, ma cum oreia sempre
ta rastá, reagi log também e bá ta betá
de seu, ta dzês pas calasse boca, quê cma ''dor de porte''na
Munde ca tinha igual !... Fui lá que cumpade Djindja, pirracente sem igual, vrá que tude sê façura, dá pô tude quel pove t'arri, quonde el dzé Mari Curvim, cma ela anton, ca divia nem falá, quê ela nunca tinha levode um pontapé ''n'ingrão''… Agora é que fui arri!...
E, cumpade Djê, bem ta corré log pa cumpade Djindja,
ta estendel mon e, bá ta dzel, pal dal quel monzada, quê
lá, sim senhor, el tinha metide um gol da merda… Fui
andode quel dia lassim, um data de camin em vão, sem incontrá
p'azar de vida, um só cadela parida que catchurrim nove,
pa pudesse fazé Tanha quel traboie de lete demás na
peite… Cosa qu'era prigose e pudia té rebental que peite
e ela ser obrigode de bá lancetal na Spital, cosa qu'era
prop um afronta! Casa já intchi de gente pa socorré Tanha, na mei de tude quel desusper, sem podé incontrá um soluçon… Anton, bem parcé Nha Mari Narcisa, um cmade antigue de sê mãe , que trazê ma ela, um ideia que pudia salvá Tanha, daquel situaçon…
Ela pedil colcença de favor, tchmal á parte, leval
pa traz de biombe la dente de casa e dzel baxim, deboxe de tude
quel respeite, dum cmade de sê mãe: - Ô mnininha, amdjor é bô mandá tchemá na tude segrede, nha cumpade Antunzim, irmon de Zidel, home d'idade, ma de fama e respeite, que tem salvode préi, tcheu Mãe de Parida, nexe situaçon… E,
moda jame dzebe, na segrêde hum !… Livronde de pecode
seberba, limpá boca, bá ta cuspi na tchon, quê
mi, mi n'dzebe nada ok?!... Tanha,
infrontada de dor, ca midi dôs vez, pedi tude quel pove colsença
de sê casa e mandá log um daquês mnine de séu,
bá tchemá Nh'Antunzim, quel home de respeite já
bastante vançode n'idade, pa besse socorel, quê ela,
já ca tava ta podé más!... Nh'Antunzim,
home modeste, servental sempre desposte a ijdá pove, sem
esperá pa más, pô pé na mama de cadera
e largá log bá ter de Tanha, pessoa quel ca tava conché,
ma jal tinha uvide falá. Na tude seriedade, log quel tchegá,
Tanha ta gemê de dor, tchemal à parte e pol sê
prublema tude na descontra!... Nh'Antunzim
que já tinha custume daquês situaçon, escutá
Tanha c'atençon e despôs, que sê buquinha motcha,
sem nium dente pa tistemunha, respondel cma pa el n'tinha nium prublema,
pa tral tude quel lete que tava lá ta fazel tonte mal e,
quaz tá ta cré prejudical!... Anton, cma lá na casa já ca tinha ninguém, quê Tanha dantes tinha puste tude gente na rua, p'assim ês pudesse trabiá na descontra… Log, ês entrá lá pa reservode de casa, traz daquel biombe!...
Tanha, despôs de tonte manobra, lá cunsigui destacá,
quel soutien que tinha ela, sês dôs grande máma
rechiode de lete, completamente socornode e tude teze… Nh'Antunzim,
que tinha bode más era pa sê traboie, sem nium maldade
na pensamenter, sempre deboxe de sê iducaçon e respeite,
pedi Tanha colcença e log bá ta betál boca,
naquês mámona, pal pudia cumeçá sê
manobra de tchepá,… tchepá,... torná tchepá…
pal trasse Tanha tude quel lete, que tava ta fazel mal… Assim,
log naquês primer tchupe, ma buqenhada na máma de Tanha,
el betá uns golpada daquel lete lá pa tchon, ma despôs,
el vrá ora t'inglis, ora ta betás fora, pa tchon!... Cosa, bá ta bai, Nh'Antunzim que sê buquinha motcha, sempre ta tchepá na máma de Tanha, cuntinuá ta fazê sê bom traboie!...
Prublema é que na mei daquel sabura de tchepá, Tanha
amdjer inda nova na força d'idade, imbalá e cumeçá
ta sinti vice ta sebil na corpe… Ma ela, traz daquel biombe,
el só ma Nh'Antunzim, longe d'oie e boca de Munde, cuntinuá
ta guentá quel situaçon, tude na respeite pa quel
home d'idade!... Ma
Tanha, infrontada de sabura, daquel tonte tchepár de lete,
esquecé e vrá pa Nh'Antunzim cum voginha prop doce
e perguntal: -
Ôh Nh'Antunzim, bocê ta segure cma bocê ca crê
más nada, pa nô cumpanhá esse litim, hum…??!!! Nh'Antunzim,
um ônje na idade de sê inocência, que ca tinha
cumprindide nada du que Tanha queria, na seguimente de conversa,
respondel cma: -
PA CUMPANHÁ QUEL LITIM ?... EL QUERIA ERA SÓ UNS BOLACHINHA…
SÓ UNS BOLACHINHA !!!...
|