|
RIOLA D'VEZINHANÇA Mari d'Monte, ma sé maride, Nhô Jack Sarafim, tinha tchgôde naqés dia, binde d'Dakar, lugar ôndé q'és tàva ta vivé, jà tinha uns data d'ône, sem bem pô pé na sés prop terra d'Soncent-CabVerd q'Deus dâs. Nhô Jack, patriota, hôme d'trabôi e bom pai q'él era, tinha sempre na cabeça qél ideia fixe, moda tude fidje d'terra, d'um béss pa nunca mâs voltâ. Assim, qél ône laçim, él proveità féria d'scôla d'sés dôs fidja, jà grande, q'tinha cabôde Liceu na Dakar-Sénégal, prônte jà pa entrà n'Universidade, mâ sé fidje Serafim, inda rapazim d'sés nove ône. Ês cambà
Soncent, na Novas d'Aligria, naviu q'na épca tàva na
moda pa qés viàja laçim, mode sé qualidade
d'trabôi, sé Capton Alberte e tude sé brilhante
equipe. Viàja fui mûte bôa, sem prublèma e assim és pude tchgà q'ajuda e puder d'Deus na Porto d'Salvamento! Basta, Nhô Jack ma tude sé familia e qél Pov dzimbarcà naqél dia bem quente, d'mês Julio, na cais d'Alfandega, debôche d'um bom pé tchuva. Té Cnisse catraêr
(azul e brônque, nome q'és pôl, mode él
era Derby) q'tàva conché Nhô Jack, bà log
ta dzél: - bi Jack, môçe, cma um ta contente d'oiôbe
e bô é d'costa boa, qé jà bô bem
e bô trazêne té tchuva mà bo! Seja bem-vinde!
Seja bem-vinde! Qés cumpanher d'bôte,
pô ta gozà q'Cnisse, ma Cnisse q'jà era marinher
bêdje ca nem ligàz. Anton él cuntinuà ta
isdà Nhô Jack, amdjêr e mnines, dsimbarcà.
Dà là d'sé bôte, él bà ta
dà sé subrim Matà Gôte fala pa bàss,
ta corré, bescà Armandim Morais, q'sé tchêrêra
(nome q'pov butzàba q'él um sô taxi q'tinha qél
vês na tchon d'Soncent). Assim fui, qé Armandim
bem ta tchgà, ma Mata Gôte e sé taxi, Nhô
Jack, antes d'bài pa casa, meté mon na bôlse pa
dàss Cnisse um gorgêta, ma él ca ceità,
ma él bà ta dzél p'él bàss na Paz
d'Deus, qé despôs és tàva oià là
driba na Monte, rua d'Matador Bêdje! Là és séi ta bài, Mari d'Monte, Nho Jack ma tude sés fidje, na taxi carregôde, pu'riba q'pa trâs, té q'jà ca tinha mâs lugar, ôndé pô cosa na taxi, ma Cnisse, fcà ta gordà rêste d'bagàja p'Armandim béss bescà despôs… Nho Jack, ma tude sé
familia, bà morà na casa d'sé rmãn Djûla,
têmpe d'spià, um casa mâ grande qé là
na Djûla, casa era piqnim, ma coraçon era grande, tamônhe
d'nôs Ilha. Na dia siguinte, despôs
d'és ter scançôde d'viàja, bem cumçà
vzita d'familia ma dstribuiçon d'incmênda pa primes,
subrins ma alguns amigues. Là naqél rua, tude qés
mnines, familia d'Ti Jack ma Mari d'Monte, tàva ta séi
da là log calçode, sés sandàlha d'plâsteqe
(mas cûnchide pa plà câca) e ta tchepà q'um
ligria d'matà qés grande pirinha d'côr q'tàva
cstumà bem d'Dakar, tchmôde tangal… Mute ligria naqél rua, mute pov ta bà, ta bem spià Jack ma sé amdjer e fidje q'tinha um data d'ône ca tinha binde pa sé terra, Soncent. Nuvidade na terra, alviçra cûrride na tchon d'Soncent, anton Mané Sûrde q'era prime dirêite ma Jack, bà spiàl também e cma él otchà cma és tàva là mute ingotchôde na qél casinha d'Djûla. Anton, él dzé Jack, p'él ma sé familia, bà morâsse n'um casa d'séu q'tàva baziu, là na rua d'Antône Nola, pêrte d' Bar d'Capitcha, pegôde mà Dublinha, antigue sêde d'Amarante. Casa, devra era grande e tinha um armaçon d'loja, cosa q'fazé Jack inda fcà mas contente. Assim, sem isità, log n'ôte dia, és mudà d'Mônte d'casa d'rmãn Djûla pa casa d'rua d'Antone Nola, d'prime Mané Surde. Jack, instalôde, tude fliz e chéi d'boa vontade, mandà bà trà licença pa pôsse loja, él impregà um subrim d'séu por nome d'Djâssa q'na fim, era amdjôr fregûes d'chuclâte daqél loja. Ma, pa Nhô Jack,
qél loja era mâs um xperiencia q'ôte cosa! Familia, pôque à pôque bà ta cstumà q'vezinhança, basta Mari d'Monte, mãe svêra, daqél educaçon inda d'geraçon antigue, na principe, mêz ta vivé na Dakar, ca tàva tchà sés fidja nem séi d'casa. Dôs amor d'criolinha scurinha, dvera dvera, prop bnitinhas, por nome de Sabina ma Puldina… Q'sés mini-sainha travâda, q'uns argôla d'brinque d'ôreia, grande e rudônde q'tàva dâs um style mute particular à parte, q'pôs ta pô tude home d'Soncent e d'zona na'Catumba d'fogue'. Es tava andà sempre
djunte, sempre q'um surrize mûte be iducadinhas e qônde
és tàva passà, ôndé q'és
passàba, tude gente, home q'amdjêr, tàva fcà
n'adimraçon… Serênâta, d'nôte na pé
casa, ca tàva cabà, era quâz tude nôte,
q'aqés moçe tude paixnôde! Mà, agora tchegà
na és era ôte stora, q'mãe Mari d'monte, sempre
q'cuidôde p aca tchà scûpli… Mari d'Monte, na principe tàva té ta pensà cma era pa ela q'aqés moçe tàva stôde ta bà ptà qés mûsqa. Ma sperta, moda él era, él tmà fé, cma era pa sés mnininha… Anton, cumçà riola, qé tude qés amdjer daqés home d'zona, cumçà ta fcà ciûmes pa mode qél data d'serênâta q'ca tàva stôde ta tocàs nem um gzinha. Intchûça
bem cumçà ta fca cada vez mas fôrte qônde
Lêla d'Câia, bem pegà na violon, pa bà fcàss
ta isdàs, cumpnhà tocatina d'serênâta, q'nñera
tônte pa él, ma sim mas pa sé cumpâde Juvenal
q'tàva quàz ta fisgà Sabina q'era mas velha e
mas bnita e tàva stôde ta dàl bola… Ciùmes, riola, cara
ranhôde, sôque na boca, era quaz tude dia na zona, pa
mode tônte d'uvi falà daqés dos criaturinha, bnitinha
d'Deus. Um dia té Antonha d'Bala, fortona nem um demôna,
caçà Fudjinha, magrim nem um fulhinha, d'bela-sombra,
cabeça, fui prêcise pov pa ta corré ptàl
um balde d'àga friu p'ela pudia largàba cuitadim d'nos
Fudjinha q'tàva quâz ta dà 'carga d'quâte'. Assim, tude qés
amdjer d'zona tàva na pé d'guerra ma tude sés
maride pa mode qés Mnininha. Anton, runion na casa d'csturera
Caia, mà Alice d'Mario, ca tàva cabà… Era
uvi na um, bà levà na ôte, qônde tava séi
qés pate-pate d'fadiga, tude és tàva argui vôz,
ma dêde log és tàva pontà pa casa d'Caia,
ta dzé cma ela é q'tinha dzîde!!! Ma Caia tàva
cunsigui arrmà cosa sempre. Cosa bà t'infêtà, té q'tchgà qél riolona, q'pô tude pov na camin, qé alviçra tchgà n'uvide d'Caia, cma Lela sé maride, também tàva na intchuça tràs d'um daqés mninha, por nome d'Puldina q'té pudia ser fidja d'um hôme grande, moda Lela… Cosa era prop'Mintira d'Riola', sô pa pudéss pôba 'Lûme na Banca', qé Lela era um home mute sêrie e ca pudia ser!!! Ma, 'Demône' infâdà, Caia dsafôràda, chéi d'raiba na corpe, ca sperà pa tôn, ela guità Lela séi q'sé violão, cosa q'Lela tàva fazé sem ser gatchôde, qé moda um dzé era mas pa isdàss cumpanhà qés serênâta ma sé cumpâde Juvenal… Madrugada inda lusque-fusque, Lela tchgà na casa, tmôde sés dôs pitrôle là na Nho Jack ma sés côlega. Qonde él sebi scâda, prà jà, él ca pude entrà na casa qé porta tàva tranqôde, cosa q'nñera d'cstûme e inda por cima, él otchà sé 'Vilisse' rmandim, fête, puste là na rua… Êl largà sôque na porta, té q'Caia bem parcé ta dzél cma p'él bàss morâba ma Puldina d'Dakar-Sénégal,
qé criola d'Dakar é q'tàva na moda e là
ja nñera sé casa. Lela dsuriantà, él dzé Caia, entrà é q'él tinha d'entrà qé él é q'tàva pagà sé renda! Caia, na sé râiba, respôndel cma qél laçim nñera prublèma. Lela, triste tentà xplicàl situaçon, ma ela sempre na farripa té q'ela abril porta, mà ela bà ta dzél log clôre, cma d'ela jàl ca tinha nada e q'nñera pa tocal q'nem um dêde!!! Lela, chateôde sem
dirêite d'incostà na sé amdjer, nem d'detà
drriba d'cama, q'sé cabeça d'gâta, él dzé
Caia cma jà q'era assim, anton él tàva ta bà
MATÂ CABEçA… Oh Pov, ô q'laride na qél
lorgue d'Dublinha, q'um madrugada daqél… Caia, somôde
na varanda ta grità pov: ULI LELA DEBÔCHE D'CAMA TA SERRÂ
SÊ CABEÇA!!! Pov, bem ta argui d'cama,
vêzins e amigues tude bem pa bem socorré Caia! Ês
sebi scada, entrà na casa, ba trà Lela debôche
d'cama p'él ca matàsse cabeça… Pa spônte
e rizâràda d'Pov, és otchà Lela debôche
d'cama, mâs fui ta serrà um BALÔIE d'TENTÊ
q'sé serra d'carpinter q'él era!!! U q'levà caia
ta pensà cma era sé prop cabeça q'él tàva
ta serrà… Cosa fazé log alviçra d'zona,
na méi daqél malta buzôde d'sempre. Despôs, Nho Jack,
cma qél cosa ca tàva ta rendél nada pra là,
naqél lujinha, em q'sé prop subrim é q'era amdjor
fraguêz q'él tinha e também pa mode mute concurrência
d'loja d'Nho Lacuênha Ma Pudjim etc… él resolvé
panhà sé familia e tornà cambà Dakar,
ondé q'jàl tinha sé vida arrmôde. Juvenal cambà Dakar trâz d'Sabina, pessoa ma qem él casa e tive ôite fidje.Puldina, despôs bem pa Soncent, amdjer jà grande e sempre bnitôna, nunca um sube mà qem q'ela casà?! Chatisse é q'bâda d'tude qél familia pa Dakar, cabà riola, cabà alviçra, cabà mentchûrqera, tude cool, tude nice… Mà Mà Mà… Nôve mês despôs e pa tabêla, rua d'Antone Nola, ma tude qél vezinhânça baté recôrde d'nascença d'mnine… Mute Cuincidênçia, NÃO???!!!
|