|
QUEL
CASAMENTE NA FUNDE DE MOQUE
Munquite
verdione natural de Bubista, subrin de Ti Iszê de Zulina que
tinha loja na linha de cruzamente de travessa de Praia de Bote ma
ponta de esquina de rua de Matijim, era um rapaz mute conversador
e tava vivê na Soncente diasá, ilha que sê Ti Iszé
trazeba el dês d’idade de cinc one, sende assim mute cunchide
na terra.
Sempre
bestide de brónc de bic de pê na cabeça, c’aquel
bunizim de pala que tava fazê inveja de malta jovem, ranjode
lá na Fábrica Favorita (antigue padaria de Matos) lugar
certe, ondê quel tava trabaiá quaz sempre. Ma traboie
ca tava faltal na terra, mode além de ser bom profissional
nada malondre (preguiçose), era também um home de palavra.
Buldonhe
de profission, quê el tava dá na tude cosa, ma sê
especialidade era pintá e caiá casa, naquel tempe que
tude pintura era fete que pincel na força de broce, quê
ca tinha pistola nem pincel rolada moda tem hoje em dia.
Sê
traboie era sempre fete na perfeiçon, expediente pa rapte,
assim, tude gente na terra tava regatial, sobretude quonde tava tchegá
tempe de festa de Natal e San Sulveste, época que tude criston
tava gostá de tem sê casinha limpim, caiode ô pintode
de fresc, pronte pa recebê vesita.
Magrim,
home de fibra na sê ligereza de muvimente, tava dá impresson
cma el t’andaba sempre ta corrê, ca tava pará, quê
nunca el tinha tempe. Basta se gente cruzaba el na rua e, tava dode
el fala p’um traboie, el tava reagi moda “Jon Buze”
personája Mindlense que também fecá cunchide
na Storia de terra pa sê resposta de:
-
“ Nem qu’um tem tempe um ca tem mode!!!”
Ma
de nutinha p’incontral, era sô bai naquel “Butequim”
de sê pai espiritual na pessoa de sê Ti Iszê de
Zulina que também era Bubistiane, ondê quel tava estode
ta fogá sês mágua naquel gruguim, ma bafa de tchitchorre
assode de violão na peite, pa ranjá manera de esquecê
Bela, sê amdjêr que sempre el gostá e que pla graça
de Deus tive el dode dôs fidje motche. Ma que inflizmente na
sigunde porte, ca pude resisti e tinha largode ês, sô
prei nês munde, o qu’era causa de tude sê grande
tristeza.
Esse
sentimente qu’era natural, fecaba gravode Munquite tão
forte na mimória ma na funde de sê coraçon, quê
log que coque tava sebil na tchife, el tava pô ta cantá,
ta contá tude gente quel storia del ma Bilinha, grande amôr
de sê vida, siguide daquês peripécia de sês
famose casamente quês fazeba na Funde de Moque e que fecaba
recunhicide pa eternidade, pa tude quem tive lá naquel festa!
Um pausa, e Munquite tava respirá funde, pa depôs pudia
continuá ta cantá, ta contá...
Foi
um Casamente pensode, cumbinode pa ês dôs, quê já
n’era sem tempe, anton ês proveitá pa bá
dasse quel crotcha dia de festa de Nossa Senhora da Fátima,
lá n’Igrijinha de Mote Inglês que tê inda
ta existi e ta fecá, justim lá naquel sebidinha de estrada
de Montona ondê qu’era casa de Cunque (Teodoro Gomes) na
camin de bai pa Sêlada de Baleia.
Enton
era quês dôs camiunitim, por nome de “Brumidjinha
ma Fincá Pau” carregode de gente, guiode pa Felipe de
Nh’Antonha Henrique Sena, ma Tuquim, quel que tinha ponta de
dêde rudonde moda quês martilim de bola, também
cunchide pa Bob de cmade Bidjuta Polpona de rua de Côque.
Pa
diante de tude quel pove e inda bem, pa mode quel trupida de femaça
de terra c’aquês dôs camiunitim tava ta dexá
pa traz, tava quel autemóvel de Nhô Leão Cohen,
marca Ford antigue de 1914, estile Dona Carolina, c’porta sem
vidre, capota de lona e um buzina de pêra sempre ta buziná,
pa mode pove na estrada ta sigui casamente, guiode pa Guilherme chofer
de Paloce de Governe na época, tude bajofe ta comandá
quel fila de corre, ta levá noiva Bela ma noive Munquite e
sês padrinhaja de casamente, Nhô Damatinha ma sê
amdjer Guilhermina pa noiva Bela, e Nhô Vasco Lopes ma Candinha
de Nhô Bil Macedo pa noive Munquite...
Munquite,
chei de grogue na buctche e deboxe de sê tristeza, cuntinuá
que sê storia ta fazê tude gente arri na sê linga
criol de Bubista que Deus dal e que depôs de tonte one el ca
tinha perdide. El fla, cma el tinha cuvedode tude quêr gente
de rebêra d’Asmancãs, Cadjau ma Maderal. Ma cma
pa êr ca tive camiunête, enton êr pa honral sê
casamente, bem tude :
-
Uns muntode na limária, ôtes na oze (burre), ôtes
na capode etc. Foi fête mas um pausa, basta tude gente espiá
pa el, ma el ca desarmá e cuntinuá c’sê storia
sempre ta ranhá na cordas de sê violão, moda se
nada fôsse.
Noiva
tude benitinha, bestide de brónc de vêu ma grinalda c’sê
maride na lode tude fadjode além ta bai, naquel Ford de Nhô
Leão Cohen que fazês honra pa sês casamente, pa
respeite e consideraçon quel sempre tive pa quel home sêrie
e trabaidor, na pessoa de Munquite.
Damatinha
que ca sabia cma Nhô Vasco ê qu’era padrim de casamente
de Munquite, fecá log imbutchode ta rogá na Deus, pa
Nhô Vasco ca basse fazê asnera e dá cobe daquel
bom ambiente de casamênte. E, temara el subesse?!... Quê
caquêr, home de pirraça e ás vez um csinha maldose
que tava ranjá chatisse sem preveni, moda Nhô Vasco,
nha tchon de Soncente ca tinha dôs e, quaz nunca tiva.
Cerimónia
na Igrijinha de Mote Inglês corrê tude dritim, c’Damatinha
ma Nhô Vasco bestide sês fote prête d’asa de
cavanhote, calçode sês sapatim de pulimente prête
bnitim, daquês que n’ê mistide ingraxá. Ma
quel sapatim de Damatinha, tava el pertode demunde ta doel na pê
prop pa matá, por via dum calim malvode que tava ta minal tê
funde de sê coraçon.
Foi
levode noiva pa Altar, deboxe daquel múseca de casamente que
tude gente ta conchê, tocode na orgão pa Sr.Sulveste
sacriston d’Igreja. Depôs na saída de porta d’Igreja,
foi quel grupe de Muchim Querena de rabeca, viola e bic que pegá
companhamente de noiva, siguide de tude quel pove pa trás ta
cantá Nha Meguel Pornore tê tchegá lá na
posente de festa.
Também
log que cerimónia cabá, Damatainha infrontode de dôr
daquel calim na dêde de pê, pa depressa dá de sola
bá trocá quel sapatim bnitim de pulimente pa ote bidjim,
brumêdje má molim quel tinha trazide num sóc,
prop bunzim. Basta pove que sube daquel sofrimente de Mata (numinha
de d’amizade) e que oial ta sei ta bai assim infrontode mudá
quel sapote, p’abuse dal fala :
-
Oh Mata?!... Cmanera ?!
Damatinha,
tude feliz de ter trocode sapote e saide daquel infer, bem ta tchegá
devagarim cum sorrise na conte de boca pa mei de tude quel pove, quê
el também sê boca ca tava lá, bá ta pontá
pa sê pê p’aquel sapatim bêdje desconce de
sê corpe ma coraçon, e bá ta dás sês
resposta, ta dzês cma quel sapatim lassim pa el era: - Puta
Velha!
Depês
de casamente casode naquel bnite dia de mês de junhe e pa completá,
gente continuá ta dexi a pê pa Funde de Moque la perte,
deboxe de son daquel rabeca de Muchim Querena, cumpanhode p’aquel
violão de mestre Ti Luis Rendal grande tocador, familia e amigue
de Munquite, Lela Preciosa e más otes tocador p’animá
ambiente, e assim fui... Amen!
Múseca
“pumping sweet”, boda ta corrê prop sabim, tude dritim...
Que pove de vez inquande ta rancá c’aquel Nhô Meguel
Pornore, sempre ta cantá desde mei dia té cinque hora
datarde. Cmida p’afronta e sem merrinha cma ca podia dexá
de ser. Basta, quel bom tchacina que Munquite recomendaba diazá
de sê Bubista natal é qu’era rei, fete cum bom fejon
pedra tcheu d’otes igridiente.
Coque
enton ca mistia nem dzê, quê sô sê Ti Iszé
de Zulina tinha trazide de sê butequim, dôs garrafon de
vinte litre daquel bom grogue de SanAnton e assim tinha pa bibê
á vontade e betá tê pa oie, deboxe daquel Sol
quente de ratchá.
Quel
hora sagrode d’abri “bole de noiva” bem ta tchegá,
c’tude quel pove feliz sabe contente ta espiá um sumbrinha
ondê gatchá daquel Sol quente. Já tinha alguns
deboxe duns amendoera ma tumbarinera que pra lá tinha, quê
quel calor tava prop ta sofocá pove!...
Nhô
Vasco, na qualidade de padrim de noive já tava bem carrosque
despôs de ter inglide bem inglide, inda más deboxe daquel
brazer de Sol ta dal na testa e n’era el sô, quê
também tude quel pove já tava que pê olte de tchon,
ôie esgaziode na mei daquel mistura de tonte bibida. Enton ês
cumeçá ta pedi padrim um descurse…um descurse…um
descur... Psssiiit, dzê assintença pa fazê silence...
Dôs
rapaz nove bem ijdá Nhô Vasco sebi derriba dum cadera,
ma el sebi log foi pa derriba de mesa pal pudia fecasse mas olte que
tude gente. Ma pove naquel sabura de festa nem ca dzê nada.
Sô Damatinha que já tava conchel na sês pirraça
quonde el tava embalá, ê que tapá oie e pô
mon na cabeça. Enton sigui moda de custume um tchuva de palma…palma...palma
e mas palma c’Nhô Vasco d’oie esgaziode, brumedje
moda lacre pa força de coque e sem palavra na boca pal podia
rancá que sê descurse. Pará, fecá ta bescá
ar pal pudia respirá pa cabeça pudia vrá clore,
tê quel cunsigui.
Derapente
bel quel inspiraçon, lá el pedi silencie más
um vez e tude gente calá. Basta nem mosca, nem musquite, se
tava uvide voá. El dexi de mesa, el sebi derriba dum cadera,
torná respirá funde e torná pedi pove silencio.
Enton, bom hme de descurse quel era, el rancá c’um senhora
descurse moda bel na ideia, sem fum-fum nem gaitinha, quê na
sê cabeça de fusca o principal era preenchê quel
espace na momente. E num delire, el rancá c’aquel descurse
que fecá na storia dum casamente na Soncente pa tude tempe,
e foi prop assim :
-
Enquanto que, Egas Moniz atravessava o estreito de Dardanelos a pé
e chuto!... Procedia-se a uma lavagem de mulas no quintal do meu compadre
Pidrim Bunucha!... Mulas essas, emprestadas ao amigo Jon Bintim, “que
pás cmê paia séc tem c’usá luneta
verde”!... Risarada, siguide dum monzáda de palma.
Enton,
Nhô Vasco continuá e fetchá sê descurse
cum:
-
Sem portanto, nada mais ter a dizer de momento nesta excelente quadra
festiva matrimonial, termino o meu discurso que eu espero tenha sido
muito prolixo e pouco profícuo, desejando muitas felicidades
á “prostitua da noiva e ao cabrão do noivo “!!!
Pove,
na mei daqel confuson de festa, coque e bafa, otchá smeme assim
aquel descurse de Nhô Vasco formidável. Enton, agora
é que foi palma, palma e más palma, siguide na continuaçon
duns gritim de boa Nhô Vasco. E assim descurse cabode, festa
pude continuá sempre naquel rabolice ma sabura de custume,
sem nada de especial ta perturbá lugar c’aquel pove tude
feliz e sabe p’afronta. Tive bodje té plumanhã,
siguide daquel tradicional canjinha de malagueta, sirvide na caneca
de madrugada. Depôs, tude gente cansode, entrá pa sês
casa.
Dia
dmingue pa trá espece, Munquite ma Bela fazê um grande
colde de pexe de bidion c’tude ingrediente (bobra, nhame, banana
verd, mindioca etc.). Ma, moda tradiçon ta mandá, quel
colde de pexe era sô pa ês sô, ma padrins de casamante.
De manera que cmida foi fete na quantia, sô pa cinque pessoa,
quê Nhô Vasco, ês leval pa casa na camiunitim, moque
sem podê dá corpe de si.
Hora
de mesa, ês já sentode ta bá cumeçá
de cmê, tchegá Nina ma sê maride e mas quate fidje
que sabia daquel colde de pexe, ma ês n’era cuvedode.
Quê
Nina ma sês mnine, pa esperteza tinha dexode tude pove cambá
morada ês, ês cambá la perte pa Borre Brónc
ba drumi na casa de Nh’Alfritim massongue. Bom, cma educaçon
ta mandá foi log ranjode ês lugar na mesa e, tude quel
cmida foi partide dritim chei d’amizade pa nove pessoa.
Nina
que era amdjêr de sê gorfe e qu’oiá cma cmida
tinha cabode derriba de mesa, argui e bá espiá s’inda
tinha más na caldera, ma el panhá foi baziu. E, cma
caldera já ca tinha más, Nina resolvê mandá
boca e bá ta dzê cma colde de pexe dvera tava prop sabe,
sô pena quel era poque. Enton Munquite, na sê serenidade
de custume vrá e dá Nina sê bom resposta, basta
tude gente que tava lá fecal contente t’arri, quê
el dzel :
-
oh Nina, n’ê colde de pexe quê poque! Gente é
quê tcheu!
Quel
bom resposta de Munquite, fazê Nina fecá que cara podre
na mei de gente, dá ela zará!... Enton Nina, chei de
raiba trançode c’vergonha, cma ca otchá nada pa
dzê, bem covás naquel descurse de Nhô Vasco ta
dzês mode quem quês tava prá lá ta dá
pa esperte quonde ês ca tava nem comprendê certes conversa
de gente?! Quê ela ao menes, n’era nium parva e qu’ela
sabia bem perfeitamente qzê que queria dzê “prostitua
ma cabrão”. Na momente tude quem tava lá fecá
imbutchode. Damatinha, Mimina sê amdjer ma Candinha de Nhô
Bil, inda tentá calmá cosa ta dzê cma Nhô
Vasco tude gente já tava conchel e sabia du’quel era capaz
que sê cabeça de fusca.
Ma,
quel conversa daquel trivida daquel Nina, foi moda um “batatinha
quente” ta sei de for quel betá quês gente lá
dente na mon. E a força de calmá jogue, ês consigui
tampal na marmita. Ma quel batatinha fecá sempre quente.
Dia
bá ta passá, Munquite ma Bela tude feliz na sês
“honeymoon”, té cum semana despôs quel alvicera
tchegá n’uvide dum subrim de Munquite, rapaz nove já
quintemanista de Liceu Gil Eanes e que tinha estode também
na casamente, ma cabeça de gata moda tude gente ca tinha el
tchode dá conta de nada. Enton el pô ta pensá,
e bem tmá fê de gravidade daquel situaçon, cosa
quel bem explicá sê tiu Munquite.
Munquite,
não mute convicide de tude aquel “conbersa que Nina tinha
flode” e agora confirmode pa sê subrim Nadir, pô
log ta benzê ta esconjurá dês dôs, ta dzê
cma el sabia cma aquela Nina era uma doida, que sê subrim era
inda rapazim nove e cma tude gente sabia quel Home P’el Senâl
Santa-Cruz ca tava gordá mnine. Basta Munquite, ca queria nem
creditá e pal creditá, sê subrim tive que jurá.
Também,
quonde ês comprendê gravidade de situaçon um semana
depôs, era tude quês dôs familia de Munquite ma
Bela juntode, saide na tchon de Soncente, ta espiá Nhô
Vasco pa bá matal!
Nhô
Vasco esperte moda rote d’Igreja quel era, tive uns tempe lorgue
gatchode ta andá que mede daquel pove betal el mon e que razon,
quê sês tava panhal, ês tava fazel tchoresque.
Ma
depôs cosa bá ta calmá, Nhô Vasco sempre
c’sê medona trançode na corpe bem reconhecê
sê erre e, bá na loja pedi Iszé de Sulina ma Damatinha
pas fazeba el paz ma sê fedjode de casamente, Munquite.
Enton
um dia lá na loja, Nhô Vasco sempre esperposente e que
sês dôs grogue de custume bem puste na corpe, pô
de joei e pedi Bela ma Munquite perdon lá diante de tude gente.
Um espetacle, moda de custume.
Enton
Munquite Bubistiano de gema flal, cma perdoode el staba. Ma que pa
brio d’home quel tinha na roste, nunca más pra vida s’el
tava trabaiá nem päpia ma el Nhô Vasco, e pa Nhô
Vasco fecaba ta sabê “CMA GENTE DE BUBISTA CA TA FEETA“
(furtá / robá / honeste)...
Zizim
Figuera ( José Figueira, jùnior )
V
O L T A R
|
