|
SOQUE D'CATCHUPA E CONSCENÇA D'UM POV - (ÔNES 59/70) Jà naqél têmpe, qônde nôs era mnine, és tàva dône qél côlde d'catchupa q'bôbra plôde… Cosa cêrte é q'um ca ta conché ni um fîdje d'criol d'nha têmpe q'cunsigui scâpà dele. Pa du q'um ta lembrà, na casa d'tude nôs vezim, ma là na nôs casa, ondé q'nha Mãe Bia crià tchéu d'nôs. Ês tàva pô mnine qél babête debôche d'pescôçe pa ca xujàba rôpa! Se bô era piqnim, és tàva detôbe na ragôçe ô anton se bô era jà grandim, és tàva pintchôbe él na cadera, sentôbe… E nô
tàva gostà tônte, basta era cmé lêmbé
bîque e na caneca ca tàva fcà nem flâça!!! Fui assim
é q'despôs d'lête d'parida q'tude Mãe d'nôs
terra daqél têmpe criàba nôs na rîtme
daqél cantiguinha q'fcâme n'uvide e tchéu d'nôs
inda devé lembrà: - qem tem sê mnine gurdim, detàl
na pâia d'mîdje cubril d'pêgà sâia…
O cêrte é q'nôs tude dâ hôme q'amdjêr
na força d'nôs catchupa q'cavala e sés côlde. Cma catchupa sempre fazé parte d'nôs cultura, assim cma tchéu ôtes cosa, pra jà, él tchgà fazé tude difêrença entre nôs e fidje d'mandrôngue q'tàva bem d'Lisboa-Portugal, q'tàva bem q'aqél mentalidade colonial, jà ta dzé cma'Catchupa era cmida d'cavôle'… Na insulta jà pa diminuiba nôs! Anton, éss manera d'séus, d'crê cunsiderâba nôs inferior, fui sempre mûtive d'chatîsse na terra e ca tàva faltà stora ma ixêmple pa tistmunha… Basta um ta lembà d'um vêz q'um fîdje mâs bêdje d'Dona Maria (alfacinha) cris lombâba um amigue d'mêu, por nome d'Jaime d'Nha Luzia… Anton Jaime,
mâs nôv e mâ piqnim, intchi d'coràja, pintchàl
um sôque d'catchûpa, dà ptà mandrunguim na
tchon. Dona Maria
riagi log q'sé fîdje tchgà pêrte dela, tude
scavacôde, chéi d'ràiba, ela vrà, dzé
gritôde pa Jaime uvi: - "Eurico jà te tinha dito para
não brincares com esses pretinhos, pois eles sô comem cachupa,
comida de cavalo, por isso são muito fortes"! Jaime, zarôde d'éss xpressar d'Dona Maria, bà ta corré bà dzê sé mãe. Anton, Nha Luzia, rafilona, q'ca tàva mêjà na nhâme, nem lêvà abûze, bâ log q'um ràiba d'gàita ter d'Dona Maria, bà dzél p'ela tchâba d'sé trivimênte, qé na sé casa sés fîdje ca tava cmé sô Catchûpa…. E p'ela
spiàba bem côr d'sé fîdje Eurico q'era mas
scûre q'Jaime, ma q'pla graça d'Deus, nem catchûpa
q'era cmida d'Deus, nem pritûra d'parte d'pai d'sés dôs
fîdje, té hoje ca tinha és ptôde d'cama…
q'certeza! E Culcincinha, d'favor, qé na nôs terra, gente
brônque é qem tem dnhêr… Dzide ôlte e
gritôde pa tude gente uviba!!! D'certeza, desde q'Cab Verd é Cab Verd, éch diferança jà tàva ixistiba, entre aqés q'bêba pa mandà e nôs. Pa nôs Linga, pa nôs manera e cstûme d'vivé, nôs Cultura q'nô crià nôs mêz, etc… Ma pa môde
regime d'ditadura ma repêsson, no tive tchéu têmpe
ta ingli pêche pa rôbe… té qônde, bem
despôs, qés fim d'ônes cinquenta, pa cumçà
d'activà conscença d'um Pov q'certeza, jà tinha
él, sempre ta trabiàl moda tude Pov oprimide! Naqél têmpe, q'cumçàba ta bem, qés rajàda d'aràja frêsque, na méi daqél trublaçon d'Muvimente d'Libertaçon d'quâz Munde Inter: Africa, Merca Latina, etc… Nôs,
Cab Verd, ca pudia fcàba d'fora, nem pa trâz, mode sé
posiçon q'Deus dàl na Munde. Nuticias dirête ô
clandistine, jà tàva tchgàba na nôs terra
d'muvimênte na Angola, d'Agostinho Neto (1961), na Ghana d'Kuame
Nkrumah (1957), d'Tanzania d'Jules Nyerere (1962), ô na Kénia
d' Jomo Kenyata (1963) e d'tude qés Paìs d'Africa Ocidental
q'jà tàva stôde ta fêrvé, etc… Dia 3 d'Agoste
d'1959, no recebêba qél triste noticia em q'Valentes d'Pindjiguiti
fui Massacrôde na Guiné-Bissau, sem dô nem piêdade,
pa tropa português, cosa q'tchéu caboverdiano sistiba dentre
d'rialidade q'dênte marrôde e làgrima na ôie,
sem podé fazé nada pa qél Pov Rmon. Log, bem
tropa pa Cab Verd! Na Soncent, bêba uns pa cumpainha d'caçador
ma qôrtel d'Praça Nova, Jôn Ribêr, Môrre
Brônque, mâ qés dâta d'marûje, naqél
vapor d'guerra Vouga, traqôde na Cais Costàvel d'Porto
Grande q'despôs fui trocôde pa ôte, tchmôde
Lima, q'fazé gente d'Soncent tchéu misêria… Na méi
d'tude éch cosa, tive qél grande manifestaçon d'alunes
d'Liceu Gil Eanes, ta desfilà pa rua d'Mindelo, num grite comum
d'FORA SMÊNTE…VIVA QUIRINO. Semente d'Manga era um reitor
intrine q'parceba là pa Liceu, por nome d'Antero Simões
e q'màlta ca cria sabé d'él là pamôde
él era comissàrio d'Mocidade Portuguesa e agente d'PIDE!!!
Também,
na Ôlte d'Nho Lêle, pêrte daqés quarte, anêxe
d'Hotel Chave D'Ouro, ondé q'tàva morà uns PIDE
q'tinha tchgôde na terra, és ptâba bomba, flizmente
ninguém ca fri ningém… Mâ dzîde q'és
é q'ptà sés bomba, és mêz, pa justficâba
prisença d'mâs tropa na tchon d'Soncent. Nôs
orquesta, Voz de Cabo Verde, constituide pa Luiz Morais, Morgadim, Toi
de Dùdù, Franck Cavaquim, Jon Da Lomba, Djusinha, etc...
Q'fazêba sé primer grande exibiçon dia 1 d'Janer
d'1968, na Hotel Porto Grande d'Soncent e, três mês despôs,
na nôs Capital Cidade da Praia d'Santiago d'Cab Verde, ondé
q'tude fui sucéss, também tive grande impâcte na
tmàda d'conscença e unidade pa luta d'Independência
d'nôs Pov CaboVerdiano. Êss
é daqés cosa q'tchéu màlta d'nôs nôve
geraçon ca vivé, ma nô tem q'contàs p'és
fcà ta sabé, cma era um épca dificil, qé
nôs terra tàva invadîde pa tropa d'ocupaçon…
Era assim q'nô tàva ôial! Qés marûje, d'vapor d'guerra Lima, q'gente d'Soncent ca tàva gostà d'és, proveità um vêz pa bàss fazénne psicosocial, num gêste chéi d'hipocrisia, num jôgue d'Campionâte d'Cab Verde, entre Soncent/Santiago… Ês
entràba pa insûrra, antes de tude equipe, na Stade d'Funtinha
q'Cômpe d'Futebol chéi d'Pov, q'um grande cartaz, marcôde
'LIMA SAUDA PRAIA'… Dividi pa amdjôr podé governà!!!
Ma Pov d'Soncent fcà silenciôze, ca tocàs ni um
palma e pô log em côr, ta fazês: UUUUUUUUUUU…
Q'tude éch
cosa, imbiênte, na nôs terra d'Soncent-Cab Verd, cumçàba
ta vrâ prop pesôde pa tude gente, inda por cima, pa cabà
d'infêtà lugar, és cumçà q'sés
abûze d'força, ta chatià nôs Criolinha… Um dia ô
ote, cosa tinha q'rebentà e assim fui num daqés nôte
d'strêia d'um bom filme na Eden-Park… Tchûtcha d'Jorge
tàva ta passêà na Praça-Nova ma uns culiguinha,
qônde és fui persiguide p'um marûjona, fôrton,
d'vapor d'guerra Lima, q'pensà cma Soncent era sô d'séus…
Nhas gente, ô q'azar d'gàita pa qél marûje! Qé qél dia, él é q'fui rastîlhe daqél xpluson q'tive qél nôte na Praça Nova. Basta, se té hoje él é vive, inda él devé lembrà!!! Tchutcha bâ fazé Jorge qixûme, anton log Jorge bâ ter d'él, tmàl pergunta, és pô ta scuti, là Jorge bâzal um qtôpe… Bom sôque d'Catchupa dà qél marûje, qéi dentre d'tanque d'Praça Nova! Log bem parcé um data d'marûje, ma tropa madrongue, pa béss rmâ na Jorge, mâ és ca tive sorte, qé filme na Cinema Eden Park tàva ta cabà… Bâtcha,
porter d'cinema, q'oiàba qél cosa, bà ta corré
pa dentre d'Cinema él grità: - GUERRA na Praça,
nôs mâ és!!! Basta ca fui nem mistîde xplicà!
Pov tmâ conta d'sé cidade, és lombà Tuga
bem lômbode, té q'és fazês recuà pa
Qôrtel ma Cais Costàvel! Q'tude éch muvimênte, Pov, là ta tmà conscença dvagarim d'situaçon e ta sinti cma nôs ma és nñera mesma cosa. Pior inda é q'na dia siguinte, marûje d'Lima séi pa rua d'Soncent, ta fazé ronda armôde. Cosa q'fui
mandôde parà pa Sr.Augusto Miranda, q'na épca era
Juiz na Soncent, home ruspêitode pa tude gente, juntamênte
ma nôs grande admistrador Rendal q'também brazà
q'dfendé sé Pov verdiano… Fui prindîde um dâta d'gênte d'malta fixe, em q'lista é tão grande q'um ca ta podé pôs tude li na papel… Tchéu d'és levà na cara d'mon d'pliça, sem podé dà… Tristeza grande e geral na terra, ma là é q'Loreta bem sentà pêle, qé tchéu d'nôs verdiano cumçà ta fuji e ta cambà Guiné Conackry, pa bàss entrà na fila d'combatênte, junte d'nôs Grande Lider, hoje india, jà não mûte lembrôde e Pai d'Naçon Cab-Verdiana… AMILCAR CABRAL.
|