|
MOQ RAPAZ JANOTA QSÉ STILE SO DSEU BOINA PRET FOT GRAVATA Q PÉ NA TCHOM MOQ, rapaz janota q'cé stile so d'seu, bòina prêt, fòt q'gràvàta, mà sempr q'pé (sqolç) na tchon, qé él mà sapòt catinha mut festa. Home cunchid na Pov pa grand bailarin, animador d'festa e q'cé goste dmaziòd, pa paròdia. Assim, MOQ fcà q'cé nom também na Storia d'nos terra cma réi d'bom na passà Capotona, Cadjumbim, Finàdo mà Canilinha (Gongons d'nos CabVerd) pàu, sempr qél tàva saì, d'madrugàda, daqés bòie d'fràlda d'Mindelo. Tud és
tàva passà vida ta guitàl, qé tud és
tinha gràça d'bàfàl, pa lévàl
mà és pa fund Infer Stocha Calderon… El nascéba
na Sintanton, Ponta d'Sol, subrim daqél mufin e pirraçent
d'Jon Dàdana, trazide e registòd na Sãocent, robòd
dos one d'idad, na Regist. Jon Dàdana é d'aqél, q'nun d'cés pirràça, ptàba dos cég un moeda na tchon d'scàda d'smént, na saida d'porta d'Igreja, pa fazé barulh, dspos él fcà d'longe e él dzés: - é pa bzot'sdos! Un daqés cég, vrà paqél ot, él dzél qont'é q'él dob? Qél
ot respondé: - é bo é qél dà e é
pa no parti! Es bà ta tchgà pert d'cumpanher, dspos és
qnhà na guerra! No entant, nos MOQ, q'éra na épca também bom marinher d'bord d'falùch, sempr q'ocasion tàva parcé, él tàva imbarcà p'as Ilhas, ora na Senhora das Areias, Gavião, Neptuno e màs q'parcéba, pàl bàss ganhà un truquim, qond él tàva stòd, na cé québra. Dàlà,
d'éche viàja e d'volta pa Sãocent, él tàva
trazé sempr mil e un Stora, méz d'ots Ilha, d'PàFinBài.
Flòd cma él era VIDENT, qé cé mãe,
pol ramèla d'catchorr na òi qond él néscé,
paqé assim era cé distin, traçòd e lid na
Livr d'St Ciprione… MOQ càtàva dsminti e él
tàva cuntinuà, ta contà cés vintura, d'incontr
de Midin mà Médon. Na SaNinclàu, nun bòdje pa Senhora da Làpa, nas Queimàdas, él dançà tud un note, mà un tchtùcha, bnita pàfronta. Cma qél mnina tàva q'friu, él ptàl cé càsòq na costa pa protégél. Na méi
daqél fulia, MOQ dà banda, qél mnina dsaparcé
na fmàça, jà MOQ ca oiàl màs. Anton,
un home bidjim q'tàva là, nun qont, sentòd ta fmà
cé canhote, dzél cma nñera mistid él spià…
qé ela jà tinha bòd. No dia siguint,
qél home, qél càtàva nem conché,
lévàl té Sumtér d'Vila Ribeira Brava, justim
drriba daqél cova, ondé q'ANA GOMES, fui interròd
e là MOQ incontrà cé càsòq. Anton
qél home dzél, cma él nñera primer, q'aqél
cosa là tàva ta contçé! Qé jàl
tinha cuntçid, mà ots e cma tud qél note là
él tinha dançod era mà qél cunchid dfunte,
d'CADJUMBIM ANA GMOES! MOQ, cma
nada càtàva métél méd, él
panhà cé càsòq, él ptà na
costa, él séi ta bài, ta subià, moda se
nada fosse!!! Pa tud lugar, q'MOQ bàss, COSA RUM tàva
cumpnhàl sempr, mà o él tinha sorte, o cé
ONJ DA GUARDA é q'tàva gordàl?! Marinher d'passàja pa Bobista, MOQ trzéba màs un stora, nun butzod, prop sabim, ondé q'tornà parcé na festa, màs un daqés mnina bnita, q'sempr tàva pursiguil. Nos MOQ, conquistador moda él éra, pchà mnina log pa conversa e rancà na màs un cunquista! Mut conversa q'mnina ta dàl bola, MOQ rancà mà ela nun pé d'bòìe, sempr na conversa! Mà moda ta flòd na terra, cma qél HOME P'EL SNAL SANTA CRUZ ca ta gordà mnin… anton uns mnin, d'càsa d'butzòd, q'tàva gatchòd dboch d'mesa, tchmà MOQ és bà dzél: - Uààà… bucé ca odja cma qél amdjérr q'bucé stà ta dançà, tem Pé d'Cabra?! MOQ, manhoze
moda él era, bà caladim panhà cé Rosar d'Sont,
q'cé Mãe tinha él puste, pa sguòrd, qond
él néscé. El ptà qél mnina, él
na pscoç… dà qél mnina, séi pa janela
fora, ta voà, tmòd d'lùme!!! Tud gent spantòd…
t'oiàl ta bài…ta bài… Na Jnela, Sintanton, él tive un rapariga, mà él tive q'cabà q'aqél csament, mod qél mnina là, tud véz qél bà spiàl, tàva passà cé vida, q'ROB SPUNDROD (fudcera) na ladera, ta catà fjon!!! MOQ, jà cansòd d'tud éch chatisse d'viàja, d'stora mà q'un truqim na bolse, bem sentà banca na Sãocent e là él bem otchà un gzinha d'calma. Mà
paròdia, él tinha él na sangue, e tud éch
cosa era màs fort q'él. Assim bà q'tchgàba
Sòbd d'Mari Santissma, él tàva bà pscà
cé cumpad Marcél, grand tocador d'bantche, também
home d'cé pagode, là na canalim d'padaria d'NhoAnton Djudjim,
vzim d'Nho JonMilona, p'às saìba na paròdia! De tud éch stora, un q'marcà MOQ màs, fui un vez na Sãocent, él ta séi d'un fnhenga, d'Cavoq Brumédj, là pa Montsusség. Persiguição q'un Canilinha dàl, ta corré tràz d'él, mà jàl sabia cmanera q'él tàva dfendé él po ta corré na ZIGZAG! Assim, cma
Canilinha, q'càtàva podé corré na ZIGZAG,
qé cé currida tinha q'ser so na linha recta… tud
cés ussim, d'cavéra qél era, tàva qéi
pa tchon, temp qél tàva cré compòs, pàl
tmà cé forma e vrà, u q'él era… Senhor
MOQ jà tàva stòd bem longe d'tud prig. Nem Capotona,
nem Canilinha càtàva dzanimà d'persigui MOQ e nem
MOQ também se tàva dzanimà d'dféndé
d'és. Nun madrugàda q'tinha tchuvid bem tchuvid na Sãocent, q'Pràça Strèla chéi d'poça d'àga d'tchuva q'nos MOQ, sabe content, tud na dscontra, ta làvà cés pé d'terra brùmédj, dentr d'un poça d'àga daqés, dspos d'un noitàda bem passòd na Farnand Pàu. Capotona, q'tinha él siguid, tud qél note, tchgà q'cé voz roqe, fànhoz e jà ta cantà vitòria, qé diàzà él tàva conché MOQ e vontade q'él tinha d'bàfàl era grand. Anton, Capotona dzél: - Hààà MOQ MOQ?! Dspos d'tont one, té q'infim, un dia, jàm panhòb! MOQ ca dzarmà e él cuntinuà ta làvà cés pé. MOQ respondél: - Panhòm?! Mi, MOQ d'éss li… à qélé!!! Capotona chei d'ràiba, replicà: - MOQ… MOQ CA BO INTENTOME???!!! Séi fora d'éss poça d'àga e nobài!!! MOQ dzél: - pa dondé??? Mi dali un catita séi nem flàça qé un tita làvà nha pé e tmà cuidòd qé olà SOL ta bem néscé!!! Pa insulta,
MOQ vrà dzé Capotona cma s'él cria lévàl
qél dia là, pàl antràba dentr d'aqél
poça d'àga pa bà bsqàsse él!!! Anton,
Capotona dzanimòd, màs un véz vincid e q'un ràiba
d'màtà d'MOQ, réspondél: - Hààà
MOQ… MOQ, dvéra dvéra bo é bitchent, porqé
bo sorte é un ter mrrid d'constipoçon e un cacré
mrré dos véz!!! Cma Sol tàva ta néscé,
Capotona tive q'bài… turcid, sem podé lévà
MOQ, mà tive q'bài! Marcél
e qés cumpanher d'paròdia d'MOQ, bem ta tchgà,
MOQ tud imbutchod, ta cré contàs o q'él tinha cabòd
d'vivé. Es dzél cma ca mistia él contà nada
qé déss véz li, és também és
tinha EL oiòd e moda pa un inqont, és ca dàl nem
temp d'dzé nada, log cé cumpad Marcél, pegà
naqél Bantche Màgic, él rancà caqél
cantiguinha impruvisòd qés tàva cstumà cantàl
qond él tàva oià Gongon: - Olà viva nha
cumpenhr… oi désd q'mi nñoòb… un; Oòb
nun sala d'bòie, màs un gzinha un tà mrré…
Détòd nun boa cama, cbért q'un bon lonçol,
fazé bafòd, fazé guéguéz… màs
un gzinha, un tà mrré… Assim, qél
cantiguinha pude cuntinuà q'un dàta d'gent ta bem ta tchgà,
na méi daqél màgic inqont, daqél despertar
d'dia, prop d'nos Mindelo d'Sãocent Cab Verd, q'MOQ,màs
un véz vitorioze e q'aqél SOL d'LUZ d'DIA ta po tud cosa
na cé lugar. Zizim
Figuera (José Figueira, jùnior) |