|
JUVITA
Moda Damatinha, home de mil partida, na sê tempe de rapaz nove, sempre janota ta tcherê sabe de cabel lubzode de brilhantina “Yardley” trazide de borde de Mala-Real inglês, bom desportista tonte na football, cma na cricket ma golf etc., tava custumá dzê quonde um mnina bnita tava passá pa el e ca tava ligal: - Sabe qu’é boa e não liga aaaa geeente!!!. Enton, malta tava otchá quel expresson d’seu c’tonte piada, quês ca tava podê fecá sem largá quel rintchada de rise, menes el que tava fecá sempre c’sê cara séria quaz ta cismá, mode quel ideia fixe de diasá quel tinha pa quel padoce de fema de nariz rebitode por nome de JUVITA de rua de Murallha, também cunchide pa rua d’Escadinha. Cosa qu’era dvera e Mata (Damatinha) tinha razon, quê tude vês que Juvita mnina pura, carregadera de Cais d’escola d’Antonha de Bill ma Mana de rua de Suburbana, plumanhãzinha tava dexi pa morada e passá n’avenida marginal deboxe d’oie galose daquês monzada de manhente, era sô c’sê cara p’u ar,sei ta bai, c’sê rebolar de cadera, t’andá derriba du quê d’seu, sustentode paquel chaile prete-violeta marrode na cintura, sem espiá pa trás, quontamá pa passás carton. Um, pamode ela sende mnina nova c’sê tchutche pa casá, ca ta tinha tempe pa quês cosa lassim, mode também tempe de ba espiá vida na Cais qu’era cosa más importante naquel momente, ote, pamode ela ca tinha tempe pa perdê sobretude ma quês home casode de gente. Juvita, n’área de carga de Cais de Soncente ligode a antigue armazem de Cais d’Alfândega, já foi, pamode evoluçon, daquês últme geraçon de carregadera de cais, quê “Cais Costável” já tava ta temá forma quaz na fim de construçon e sistema de carga expediente pa rapte, também já tava ta temá ote rume e cumeçá um nove era na vida social de Soncente. Dali tude ês história que marcá, más um passaja na vida de Porte Grande de Mindelo na Soncente Cab Verd e tude sê pove que durante quaz um sécle e mei vivê de braçal, servental, na tempe que mecáneca pa carga na Porte Grande inda era bastante reduzide p’alguns “wintch ma pau de crêne”. Sende, tude reste de traboie de Porte fête pa valente, tonte pa broce d’home cma pa cabeça d’amdjer, moda maior parte de nôs tude sabê e quem que ca sabia agora ta fecá ta sabê li na más ês mensaja que tita bai nês storia. Juvita, amdjer lutadera, fradera de vida lá tava bai tude dia log cidim paquel Cais Bêdje de descaraga, fête de madera pegode ma Cais d’Alfândega, ondê que tê inda tava estode ta tchegá tcheu carga de mei de Baía, binde de borde naviu das Ilha, ma pa negoce de casa comercial na Soncente, binde na paquete de Lisboa- Portugal. Enton, ela na sê expediente pa rapte ê que tava dirigi tude quel orquesta de carga derriba de Cais, quê assim que carga tava ser desimbarcode ela, tava log pôs sês marca, pa quês ote ca traba ela sê pon de boca e assim junte ma sês cumpanher, podia saí ta dá quel expediente d’intrega de carga de gente. E, assim naquel “struggle for live” ela ma quel puquin de cumpanher carregadera de cais qu’inda fecá pa tistemunha, lá tava ta bai ta frá vida devagarin, completamnete despriucupode, sem pensá, na do que tava ta bês pa trás, sem pensá na futur. Bem contecê que Ricardo Tristão, home frador de vida também, casode ma Dona Tanha de Nha Rosalina de Jon Bête, professora, mãe de Nini ma Pexe que tinha loja e tava morá trás de Telegrafe Inglês, tava estode diasá ta estudá volume de tude quel carga derriba de Cais Bêdje que Juvita diasá tava estode ta marcá. Enton, el mandá bem d’estranger um camionitim de marca Peugeot, daquês c’caixa pa trás e mola forte qu’era vindide pa francês, na país ondê que tem deserte moda Libia, Tunisia etc., fête prop pa resisti tcheu carga. Assim, log naquês dia el dexi pa Cais Bêdje e, dum sentada, el intchi sê camiunitin e sirvi c’satisfaçon um data de gente, c’sês carga levode tê casa cum prece negociode pal podia ganhá cliente. Assim, c’sê camiunitim “guela de tubarão”, derriba de Cais já ca fecá ta fecá mute carga e quel reste de “Pove de Carregadera de Cais” revoltode, sem nada podê fazê, tava descompô Ricardo Tristão de tude nome ta dzel cma el era de “cú lorgue e otes mau expresson... etc”, ma el Ricardo, tava fazê d’oreia de surde e ca tava ligá nada daquês storia. Enton, pa vingança quês “Carregadera de Cais”, zarode pa mode Ricardo qu’era espiçode (dôde na dnher) moda sês colega JUVITA, cascal quel camiunitim nome de JUVITA, nome que pegá e fecá registode pa sempre n’anal de história de tude quês ote caminuitim (JUVITA) de mesme tipe (Peugeot) que tchegá depôs na tchon de Soncente Cab Verd. Más um prova evidente, daquel bom espirte d’humor de gente de Soncente, que quer seja na ligria ô na tristeza, tem sempre quel últme tóc espontaneo pa salvá situaçon cum rizarada. Apôs, ê prop assim ô gente querê ô gente ca querê, quê na funde el ta fazê parte integrante de nôs cultura ô de nôs auto-cultura. De nôs verdadera JUVITA, ela cuntinuá sempre bnita t’andá sempre c’sê nariz rebitode p’u ar sem passá pove carton. Depôs, ela largá vida de carga na Cais, casá ma sê tchtutche cum ca ta bem dzê bsote sê nome nem flaça, ês cambá Brasil ondê quês ta tude drete chei de fidje ma nete e ta manda’m sempre mantenha na carta. ZIZIM FIGUEIRA (José Figueira, júnior) Comentário: Caro
Mano, Não me parece que tenha passado muito tempo sem dar
sinal de vida mas se calhar tens razão. É com imenso
prazer que leio as tuas saborosas crónicas. Pois fazem-no
muito bem em recuar com agrado no tempo. E desejo-te como sempre
muita Força na tua luta. Da minha parte, cá vamos
indo, pagando o preço da idade. O papá dizia "ô
triste jus da idade "...Que o novo ano te traga surpresas agradáveis,
muita força,muita luz. Um abraço com carinho da Mana
Gaby Comentário: Comentário: Comentário: Comentário: Comentário: Comentário: Comentário: Comentário: Comentário: Comentário: Comentário:
Terencio Lopes terenciolopes@yahoo.com.au |
