|
QUÊS SEGUNDA-FERA DEBOXE DAQUEL ESPINHERA DE PRAÇA ESTRELA Fudjinha somá descolce moda de custume, ta bem t’andá na ponta de pê c’sês crove duride, ta esquivá d’incostás naquês pidrinha maldite de tchon de Tchã de Sumeter e Deus defendel de tocaba num sô dês, quê sê dia tava fecá log estragode chei de dôr tê funde de coraçon. Chei de deficuldade ma c’mute cuidode e sempre ligirin, ta bem c’gitim, na depressa de tchegá naquel segunda-fera lassim, deboxe daquel Espinhera Preta de Praça Estrela perte de Club Sportive Mindlense, ondê que tude gente tava bá juntá p’uvi alvicera de cosa de vespera (dia Dmingue) passôde na tchon de Soncente e, quel Fudjinha pa nada dês munde tava fecá sem marca sê ponte. Gente tava tchemal “Folha” em vez de Fudjinha talvez sô pamode el qu’era magrim ô pamode el que foi um grande admirador, daquel tal “folha seca” grande pontapê de Didi (capton de seleçon de Brasil), que parceba na Copa de Munde de Futebol na Suécia, one de 1958. “Folha”, grande amigue e cunchîde na terra, irmon de Jack de Beta, Mayca Barronque e Vula capton, deboxe de sê poc escola, bom na colc mental, tinha um mimória feliz pa fixaba e prendê d’uvide, tcheu cosa de nôs cultura e de cultura Brasiler que tava bai dês de Nordeste de Brasil, tê Rio de Janer. El tava conchê Jorge Amado escritor, Luiz Gonzaga múseque de sês baião, quel tava passá vida ta subiá ô cantá e compará c’alguns cantiga de nôs terra que tava na moda sima “Bô cabel já da’m na cara...” e más ôtes que ca ti ta be’me grinhassim na ideia. Um verdader enciclopédia ambulante de tude ês cosa que tava incantá gente de nôs Ilha de Monte Cara. El tava conchê Mangueira c’sê Escola di Samba e também quel trio rival infernal brasiler de foot-ball, Botafogo, Flamengo/Fluminense (o tal Fla/Flu ), quês dôs equipa sagrode e más rival de Rio, moda Mindlense/Académica na Soncente c’tude sês storia, ma sês samba, sem nunca el ter puste pê na Brasil. Pirracente moda el, ca tinha dôs na tchon de Soncente, inda por cima c’tude cosa d’arri quel tava contá cum descontra de matá tê fazê pove xixi na calça, na sê gête sô d’seu sempre serie, sem arri, o que tava faze’m lembrá, quel grande actor comic mercone, que na sês filme, nunca tava arri, pa nome de Pampelinas ô aliás Buster Keaton. Quel plumanhã lassim, Espinhera tava tude fluride de marel ta tcherê prop sabe, Sol já tava prop quente, ma cum tempe bronde quonde Fudjinha tchegá cumpanhode ma sê cumpade, Putche de Nha Sabina, más cunchide na praça pa ser um boys medente p’afronta, que tê um folha de mote se caíba de note na tchon perte del, cabel tava intchal na cabeça e era capaz log de sei ta corrê em perigue del sinti um cosa de coraçon. Ma naquel momente, Fudjinha ma Putche já bem ta tchegá na conversa ta lembrá cumpanher daquel bom arroz c’atum de malagueta, c’azeitona ma tomate fresc, quês tinha cmide de vespra, lá na Bar de Gêgê ma Alberte manquim, perte de Quintalona. Quonde pa depressa, parceba quel primer arreloce de dia dmingue pa segunda cum monzada de gente, ta bem pa traz de Djô de Jon du Chique que na época era guarda-rêdes de Mindlense, chei de raiba, cum bique grosse dum kile e mei, intchode dum soc que Curuca (Deus dás céu) tinha el dode naquel jogue de foot-ball Mindlense/Amarante de dia Dmingue. Rivalidade daquês dôs criatura, Djô keeper de Mindlense e Curuca d’Amarante, já tinha durode tchêu, quê tude ês tava passá vida ta chatiá cumpanher c’stora de quem qu’era, mas bom keeper (guarda-redes). Enton quel dia Dmingue lassim, num jogue de campionate, Mindlense/Amarante log na príncipe de jogue, Mindlense metêba Curuca, um senhora gole. Djô du Chique, proveitá log e pô ta grital dum baliza na ôte, ta fazel biogue, ta dzel cma el era um azelha e ta fazel um data menhoce, ma palhaçada que broce etc,. Curuca zarode, vassalá e ca pude guentá quel goze, proveitá um jogada, bem da lá de baliza deboxe ta corrê tê tchegá na Djô, na mei de confuson daquel jogada e proveitá pa bem dal quel bom soc na boca, pa log bai ta sei fora de compe ta corrê sem dá arbite tempe, ondê quel despôs foi castigode e suspense pa Federaçon de Futebol um one sem ijgá bola na Compe de Jogue. Djô, quel segunda-fera, tchegá na Praça Estrela, c’sê bic intchode ta perguntá tude gente pa Curuca, ta explicá pove, cma tude foi tão rapte, quel ca tive nem tempe de riagi. E, sô o quel tava pedi tude gente era pa dzel ondê que Curuca tava pal bass descontá sê soc. Afonso Coronel ma Canhota, quês dôs grande buzode de sempre e rote de Praça Estrela que sabia de tude cosa, proveitá log de situaçon, ês vrá pa Djô t’arri, ês dzel: - Quont’ê que bô ta do’ne se nô dzebe ondê quel está? Djô dzês, vinte escude cada um! Enton, pô’ne el já li na mon de favor primer ok ?! Dzê Afonso. Djô pôs sês nota de vinte na mon cada um, Afonso ma Canhota tude contente largá t’arri, ês dzel cma ês tinha ôiode Curuca quel hora mez, ta bai pa Caizim bá cagá. Djô, largá ta corrê pa Caizim log quel hora que tude quel trupida de gente traz del, el tchegá lá, tava Girolde pliça scocá-cáca qu’era guarda de Caizim, el perguntal chatiode dmunde : - Ondê Curuca? Girolde que ca sabia de nada, vrá dzel log cma Curuca, tava lá na gabinete numbre 2 (dôs)! Djô bai, cunquil na porta, Curuca inocente e em paz lá ta dá de corpe prop sabim, longe de pensá na Djô, vrá dzê: - Ô pessoa, quem bô?... Djô, chei de raiba, forton nem um touro c’sê voz grosse, vrá dzel, cma el era Djô de Jon du Chique e pal abrisse quel porta, quê el sô o quel queria era descontá sê soc quel tinha el dode a traiçon naquel jogue de dia Dmingue. Basta, nôs Curuca que já sabia cma Djô c’sê bic intchode tinha estode ta espial pa tude banda de tchon de Soncente, dês daquel dia dmingue, panhode de surpreza e sem sabê cmanera que Djô sube cma el tava lá, inda más na Caizim. Boca cumeçá ta vral margose, tê dal log goste de sabon trançode c’tcherrica que bel dum vez, na mei de tude quel trapaiaçon. Da lá dente, el vrá pa Djô, el dzel log cma el ca tava t’abril porta nem flaça. Enton Djô, respondel cma el também ca tinha pressa de basse da lá, quê já agora quel tinha el incontrode el ca tava ta bá largal. Depôs duns hora de conversa, nôs Curuca resolvê dzê Djô ok, ma a condiçon, quel daba el, um suquim bem devagarim... Djô, ca esperá pa más e dzel log Ok!!! Já bsote pensá naquel “suspense de cinema” de tude quês gente, tistemunha diasá traz de Djô ta esperá quel hora daquel soc. Bzote ca ta nem imaginá. Basta Girolde, que bem sube, du que tava ta passá, cma el era Plica Scocá-Cáca, guarda de Caizim (cagatore public) pa recebesse denher d’use daquês ratrête, bá log ta escoá da lá, pa ca dasse tistmunha, cosa prop de custume de terra, na época, quonde ta tinha quês rixa, ma guerra marcôde lá pa lode de Corê, etc. Enton foi um verdader cena de teatre, Curuca abride porta já preparode, marrode dente na quexada pa recebê quel soc de gigante Djô de Jon du Chique, inda c’calça mei na mon ta cabá de besti c’Djô ta dal quel grande soc guentôde. Nhas gente, foi one time (um cosa sô). Nôs Curuca levode sê bom soc, debangá da lá derriba dá escuá na sê broc de CAIZIM, ondê quel tinha estode antes ta dá de corpe, dritim pa mar. Foi um verdader espetacle d’oiá Curuca ta nadá, ta sei na praia tude borrode c’aquel pove morte de rise e nôs Djô de Jon du Chique ta bai tude bajofe, pamode el que já tinha descontode sê soc. E, sorte de Curuca ê que marê tava cheia, assim el caí foi dente de mar, quê se marê tava seca era log um chatisse. Assim, el ta sei de mar, Djô dexi, bá bescal ta dzel cma agora ês tinha fecode “all square”(impôte). Ês dá quel shake hands (monzada) e, moda de custume, tude quel stora de dmingue pa segunda-fera, bá cabá lá na butequim de madrinha Laura de Gaspar na Praça Estrela,deboxe de Mindlense c’uns grogue c’bafa de escabeche d’ôie-lorgue (pexe), especialidade de casa, c’tude pagode pa conta de nôs “big man” Djô de Jon du Chique que na funde tinha um bom coraçon. E assim, moda de custume, vida pude cuntinuá na tude sê serenidade, c’más um alvicera de segunda-fera betode pa traz que bem juntá ma tude quês ôte passode naquel fim de semana de tchon de Soncente, deboxe daquel Espinhera Fluride de Praça Estrela perte de Mindlense, c’tude sês gente feliz, sabe, contente.
Comentário: Olá
Zizim Figueira, Como é bom,estando longe de SONCENTE,como
eu e muitos outros no BRASIL há tantos anos, ler essas histórias
relacionadas ao povo de SONCENTE e que são coisas próprias
da TERRA ou do lugar,ao ler essa história parecia que eu
estava lá na Praça Estrela vendo a cena, e mesmo indo
para o CAIZIM lugar tão caracteristico de SONCENTE daquela
época.BELO TRABALHO . Um grando abraço do amigo Álvaro
Benrís Comentário: Comentário: Comentário: Viriato
Évora
viriatoevora@aol.com Comentário: Gilda B.Leite gildableite@gmail.com Comentário: Comentário: Comentário: Comentário: Comentário: Comentário:
Comentário: Comentário: Comentário: Comentário: Comentário: Comentário: |
