|
SOC DE CATCHUPA Assim dia 3 d’Agoste de 1959 foi recibide quel triste noticia na terra de Cab Verd daquel massacre que tropa português fazeba contra Valentes de Pindjiguiti na Guiné-Bissau, sem dô nem piedade, cosa que tcheu cab-verdiane sistiba na tude realidade c’dente marrode na quexada e làgrima na oie, sem podê fazê nada pa quel pove irmon Dês de tempe de “Caniquinha”, quaz ca tive mute mnine de nôs terra que cunsigui escapá daquel colde de catchupa c’bobra plode pa cumeçá e, depôs qu’idade ta bai t’entrá na corpe, passá a um ote velocidade e podê cmel c’ingron e tude otes ingridiente. Pa lembrança, lá na casa ondê que nha mãe Bia criá tonte mnine, quês ma piqnin, tava detode ês na ragoce puste quel babete deboxe de pescoce pa ca sujá ropa, quês ma grande também, ma sentode e, enton tava pintchode gente el na cadera, as vez qu’um csinha de lete coiode, cosa que nô tava gostá tonte, basta era cmê lembê bic e na caneca ca tava fecá nem flaça. E, foi assim que nôs tude daquel tempe depôs de ter mamode lete de nôs mãe, num época que ca tinha lete em pô “Dutch Baby” e otes cosa fabricode moda hoje me dia, nô foi criode na ritme daquel cantinguinha que tê hoje feca’m n’uvide de: - Quem tem sê mnine gurdin, detal na paia de midje, cobril de pega saia... O certe, ê que nôs tude, num espece de seleçon natural, nô dá home m’amdjer na força de nôs catchupa c’cavala e sês colde. Catchupa, assim cma tcheu d’otes cosa sempre fazê parte de nôs cultura e na época, jal tava fazê também tude diferença, entre nôs fidje de Cab Verd ma português que tava bem de Lisboa-Portugal c’aquel mentalidade colonial, ta dzê’n cma Catchupa era cmida de cavole, n’insurra, já pa tentá diminui’n. Enton, ês manera d’seus de querê considero’n inferior, foi sempre motive de mil e um chatisse, tonte na terra cma na Diáspora. E, exemple pa tistemunha ê cosa que ca ta faltá moda: - Quel guerrona na Praça Nova na hora de saída de Cinema Eden Park, que fecá na história, em que Batcha porter, filme quaz ta cabá, bem ta gritá pove pas bai quê era nôs contra ês. Enton foi batatada de meia-note que nunca más tava cabá, de malta contra quês maruje busode de vapor de guerra LIMA. O que dá lugar a prison dum data de fidje de Soncente que fecá revoltode e dês daquel dia maruje de vapor de guerra vrá ta fazê ronda armode, pa tude banda de rua na Mindelo. Cosinha dês li, tive tcheu na terra e depôs imbiente bem vrá prop mafe, quê aquês maruje de LIMA pa provocaçon, num jogue de Campionate de Cab Verd entre Sporting de Praia X Mindlense, entrá na Compe de Football antes de jogue cumeçá, cum bandera de propaganda scrite LIMA SAÚDA PRAIA, num tentativa ô pa dividi’n ô enton p’oiá se pove de Soncente tava reagi pas podia carregá parriba de nôs. Ma ninguém ca descosê e ês tê ê que fecá suje. Ma conte vai atrás, quê ignorança naquel tempe ca tinha limite e tude podia ser diferente se tava tratode gente c’consideraçon. Basta ‘m ta lembrá um vez que fidje de Dona Maria do Rosário (alfacinha-binde de Lisboa frisquinha) embora más bedje queris lombá um amigue d’infância d’nossa por nome de Jaime de Nha Luzia. Enton Jaime, más nove e ma piqnin, intchi de coraja log pintchá quel boys uns dôs gron de soc de “catchupa” na costela dá betal na tchon. Dona Maria, quonde sê fidje tchegá perte dela tude escavacode, ela riagi log chei de raiba e ba ta dzel gritode pa Jaime e tude gente uvida: - “Ó Eurico, já te tinha dito para não brincares com esses pretinhos, pois eles sô comem Cachupa que é comida de cavalo, por isso, são fortes assim”!!! Jaime, mei gogue, zarode daquel expressar desaforode de Dona Maria, bai ta corrê pa casa ba dzê sê mãe. Enton, Nha Luzia, rafilona, que ca tava “mejá na nheme”, nem leva abuze de criston, ba log qu’um raiba de matá, ter de Dona Maria, ba dzel p’ela dexaba de trivimente, quê graças a Deus na sê casa, sês fidje ca tava cmê sô Catchupa. E p’ela espiaba bem côr de sê fîdje Eurico qu’era mas escure que Jaime e p’ela fecaba ta sabê cma nem catchupa qu’era cmida d’Deus, nem pritura de sê fidje de parte de sê pai té hoje ca tinha ês betode de cama pla graça de Deus c’certeza. E Nha Luzia, inda crescental quel culcincinha de favor qu’ela ba ta dzel, gritode pa tude gente uvi, cma na nôs terra gente brónc era quem tivesse dnher. De certeza, ô no crê ô nô ca crê, desde que Cab Verd ê Cab Verd, exe diferença já tava ixisti, entre nôs e aquês que beba pa mandá. Pamode nôs linga, nôs manera ma custume de vivê que vrá ta fazê parte de nôs prop Cultura que pove de Cab Verd criá el mesme. Ma, pamode regime de ditadura salazarista, ma repesson, nô tive tchéu tempe, t’ingli pexe pa robe, tê quonde, bem depôs, quês araja fresc de fim d’ones cinquenta que cumeçá n’ar de tempe ta bem de longe p’activá consciença de pove que c’certeza já tinha el diazá ta trabial na sê consciença prop de pove oprimide. Naquel tempe, já alvicera na trublaçon daquês Muvimente de Libertaçon na Munde Inter: - África / Ásia / Merca Latina etc., tava ta bem ta tchegá de tude banda e nôs Cab Verd, pamode sê posiçon que Deus pol na Munde, ca podia fecaba fora mitida. Assim nuticia, direte ô clandistine já tava tchegá na terra sobre, muvimente na Angola, d’Agostinho Neto ma Holden Roberto (1961), na Ghana, de Kuame Nkrumah (1957), na Tanzania d’Jules Nyerere (1962), ô na Quénia d’Jomo Kenyata (1963) e de tude quês ote país d’África Ocidental que já tava estode ta fervê. Assim dia 3 d’Agoste de 1959 foi recibide quel triste noticia na terra de Cab Verd daquel massacre que tropa português fazeba contra Valentes de Pindjiguiti na Guiné-Bissau, sem dô nem piedade, cosa que tcheu cab-verdiane sistiba na tude realidade c’dente marrode na quexada e làgrima na oie, sem podê fazê nada pa quel pove irmon. Dês stora, bem sei log muvimente de tropa português pa tude banda de colonias. Na Soncente tchegaba uns pa cumpainha de caçador, pa qortel de Praça Nova, Jon Ribere, Morre Bronc e um data de maruje de borde daquel vapor de guerra Vouga que fecá tracode na Cais Costavel de Porte Grande durante uns tempe ma depôs el foi substituide pa ote tchmode Lima que tchegá de fazê gente de Soncente tcheu miséria. Na mei de tude exe contecimente, malta que já tinha tide uns contacte, rancaba c’aquel primer grande manifestaçon (politica) d’alunes de Liceu Gil Eanes, ta desfilá pa rua de Mindelo cum grite sô na garganta de “FORA SEMENTE…VIVA QUIRINO!!! Ora, Semente de Manga na época, era um reitor intrine sem personalidade, que parceba lá pa Liceu Gil Eanes, por nome d’Antero Simões e que malta ca queria sabê del, pamode el qu’era comissario de Mocidade Portuguesa e agente de PIDE. Também, lá pa Olte de Nhô Lêle, perte daquês quarte anexe d’Hotel Chave D’Ouro, ondê que tava morá uns PIDE, que tinha tchegode fresc binde de Lisboa-Portugal pa nôs terra, “ês” popa ês bomba, ma más pa intimidaçon, quê ninguém ca foi fride. Ma depôs pa boca de pove, foi dzide cma ês ê que popa sês bomba ês mesme, pa justficá prisença dês ma tropa na tchon Cab Verd. E assim foi, quê depôs tude Ilhas passá ta tem tropa. Nôs grande orquesta, “Voz de Cabo Verde”, constituide, pa Luiz Morais (Deus dal céu), Morgadin, Toi de Dudu, Franck Cavaquim, Jon Da Lomba, Djusinha etc., que fazeba sê primer grande exibiçon na dia 1 (um) de Janer de 1968, na Hotel Porto Grande de Soncente e três mês depôs na Capital, Cidade da Praia na Ilha de Santiago de Cab Verde, ondê que tude foi um sucesse e tive também grande impacte na tmada de consciença de pove pa unidade na luta p’Independência de Cab Verd. Ês ê daquês cosa, que tcheu malta de nova geraçon ca vivê, ma nô tem que contás pês fecá ta sabê, cma era um época bem dificil, quê nôs terra tava completamente invadide, pa tropa d’ocupaçon e, ês mesme, ma pide, sô que sês presença, sirviba pa consciensalizá pove. C’tude ês situaçon, imbiente na nôs terra de Soncente-Cab Verd cumeçá ta vrâ prop pesode pa tude gente inda por cima pa cabá d’infêtá lugar, ês cumeçá pa abuse de força de poder ta mexen c’nôs Criolinha. Assim, um dia ô ote, cosa tinha que rebentá e assim foi motive daquel guerra na Praça Nova na saída de Cinema Éden Park e bem otes guirrinha que tive pa defendê honra de nôs terra ma de nôs Criola, quê ês pensá cma terra era d’seus. Ma também, naquês dia lassim ês cmê bons soc de catchupa. Basta dês dess dia, ca fui nem mistide explicá ninguém nada, quê pove (num aspecte conjuntural), tmá conta de sê cidade e ês vrá ta lombá tuga, bem lombode, tê que fazês recuá pa sês quortel ma pa cais costavel e obrigás passá ta fazê ronda. Pamode tude exe muvimente, pove, ba ta tmá consciença devagarin de situaçon e sinti cma nôs ma ês, n’era mesma cosa. Pior inda ê que na dia siguinte, quonde maruje de vapor de guerra Lima saí pa rua de Soncente ta fazé ronda armode, cosa foi mandode pará, pa Sr.Augusto Miranda (grande sumidade fidje de terra), que na época era Juiz na Comarca de Barlavente na Soncente, home mute respeitode de tude gente, juntode ma nôs grande admistrador Rendal que também brazá que defendê sê pove verdiane. Pamode stora de “Soc de Catchupa”foi prindide um monzada de gente fidje de terra, basta Staçon de Pliça intchi de gente e lista era tão grande qu’um ca ta nem podê pôs tude li na papel. Tchéu dês levá na cara de mon de pliça português, sem podê dá também. Tristeza, foi grande e geral na terra, ma lá ê que Loreta bem sentá tuga pele, quê foi da lá pa diante que tcheu verdiane, cumeçá ta fuji e ta cambá, Guiné Conackry, pa bass entrá na fila de combatente, junte de nôs Lider que ta merecê tude respeite AMILCAR CABRAL. As vez ca mistide mute cosa pa pintchá um pove pa revolta... Pa nôs foi sempre quel “Soc de Catchupa” ê que mostro’n nôs diferença e o que tê hoje fazê sempre nôs FORÇA!!! Zizim Figuera (José Figueira, jùnior) Comentário: Comentário: Comentário: Comentário: Comentário: Comentário: Comentário: Comentário: Z.Figueira,
Como te disse da ultima vez, não estou muito treinado a ler
o crioulo, por isso o faço devagarinho para poder compreender
e relembrar expressões que esta diaspora roubou-me. Depois
tiro uma grande satisfação de ter lido todo o texto
que acho muito bem estructurado tendo em conclusão compreendido
tudo sem problema. Vou até te dizer mais, pois fui "criode"
a caldo de cachupa e sobrevivi sempre forte como um touro. Bem hajas
amigo! Forte abraço Miguel Comentário: Comentário: Comentário: Comentário: Comentário: Comentário:
|