|
NHÔ FRAGUINHA --- UM ÊRRE D’ESCRITA QUE CSTÁ CORE E assim foi, ma p’abuse ô êrre tê hoje ninguém sube quê sô Manin Estrela e más ninguém ê que podia firmá. Ma cma jal morrê, el levá quel segrede ma el pa cova e paz a sê Alma!... Quê na hora de escrevê quel carta el pô: - Caro amigo,.... Podia ter a bondade de me enviar “ 1 0 2 macacos “ em vez de 1 ou 2 macaccos, o que tava fazê um erre de “cento e dôs macóc”.Um verdader chatice!!! Nh’Antunin Cunote, depôs dum note mal drumide pamode mosquite, argui log cede sentode naquel mutchinha (bónc) de custume, na porta de sê casa na rua de Moeda, esparajode ta trá uns long femaça naquel canhatin bedje tipe “Johnny Walker” quel tinha trazide já tinha um monzada d’one de borde dum Blue Star Line que passaba na Baía de Porte Grande ta bai pa Sul. Basta daquel hora lassim, nium de sês vezim e amigue moda Jack Cunquelicôc , Manin Estrela, Ti Silva, Mnine Pirú, Capenga vendedor de lotaria, Damonse e más otes personája madrugador daquel rua, tê inda ca tinha dode sinal de vida. Mêmê Ove, sê fidje, que ca tava custumá drumi d’note mode problema de nerve, espantode, perguntal c’voz baxim: - Adèche papai, quaz hoje bô dexá LUA inganobe mode ês clareza? Cuidode pa bô ca vrá moda Djê de Chiquinha quonde el tava inganá c’LUA que Gongon (alma d’ote munde) tava custumá cumpanhal tê sê casa la pa quês funde de Farnande Pau. Antunin Cunote, zarode daquel conversa de Mêmê Ove, ba ta passal log uns dôs pascoçada e, ba ta escunjunrá c’mede de praga de boca de sê fidje, daquel hora de madrugada inda más em jijum, ca ba caísse el derriba. Uns hora depôs, dia ta bem ta clariscê, quel gole de pena de tcheu core lá na quintal de Mã Balica foi primer naquel rua ta rancá e coroá dia de sê cantar bem prolongode prop de “Gole Múseque”, moda tava usode tchmás na terra. Enton, Manin que já sabia daquel capoera la na quintal de Mã Balica, tava mandá log Mêmê Ove ô Djondon de Bolinha de Nhône de Derby, bai ta corrê dá Mã Balica fala, pa ranjal ora uns ovim fresc pal tmá cafê ô uns borrachin pal fazê colde ô assá na brasa. Naquel dia lassim, la na rua de Moeda, tude cosa tava ta parcê ta corrê suave, smeme assim c’aquel stora daquel despertá avançode na tempe de cumpade Antunin Cunote que tude gente daquel rua já sabia log cedin, pamode quel linga pintode de sê fidje Mêmê Ove um mnine mei “taná” (anormal) que já era custumode de passá na casa de vezin tude dia plumnahã, pa ba manhentás sês cafê c’catchupa guizode e, tava bai ta contás tude cosa quel oiaba que passá naquel rua tonte didia cma dnote, pamode el quaz que nunca tava podê drumi. De siguida, Sine na Cumpanhinha Inglês Nacional (Cª de Carvon daquel tempe), cumeçá ta repicá, cum toc final pa vapor de Norte e dôs pa favor de Sul, moda de custume. Log, quel pessoal cumeçá ta sei de tude banda c’reme, crôc ma forqueta na mon ma na ombre, direçon Praia de Bote pa bai betá bote na mar pa negoce na borde de dôs paquete que tinha cabode de tchegá quel hora mesme, um Mal Real e um Blue Star Line inglês. Enton, na mei daquel confuson, bem parcê Franguinha ma Jon Fabal que tava custumá negociá era c’aquel bote de Nhô Studante de rua de Morguin, tude desorientode num expediente pa rapte, bem espiá s’Antunin Cunote podia vanças uns 4 (quate) ô 5 (cinque) macóc pal vendeba na borde de Mala Real ma Blua Star, quê sês 10 (dez) últme macóc, el vendês tude uns três dia antes, num paquete que tinha passode na Baía e el esqueceba de pedi Nhô Studante pa mandá incmendá más de Tarrafal de Santiago. Antunin Cunote qu’era home sempre de bem e bom fê, dzês cma inflizmente el tinha inda lá dôs, ma um era de casa e quel ote el era dum pessoa que jal tinha promitide. Franguinha ma Jon Fabal, tude zaraode c’aquel situaçon sei ta espiá ricurse ma em vão.Enton, ês ba ter de Nhô Studante pa contal sês mágoa e Nhô Studante enton dzês cma ês divia era ter diantode pedide de macóc pa Tarrafal, era diazá, quê ês sabia qu’era cosa que tava ta vendê bem na borde de vapor de turista naquel época. Enton, Nhô Studante qu’era um home de expediente, proveitá log daquel passaja de sê amigue Capton Jesuino e sê naviu Rex qu’era n’altura e sem bajofaria, naviu más rapte que tinha na área de Cab Verd, pal pedi moda de custume a Manin Estrela pa escrevel quel carta ta incmendá quês macóc na Tarrafal de Santiago pa sê bom portador e amigue. Manin Estrela, sempre pronte pa prestá gente sirvice, log betá mon na pena e escrevê quel carta de Nhô Studante ta pedi “ 1 (um) ou 2 (dois) macacos” pa sê amigue na Tarrafal de Santiago, pas podia daba quel bom portador qu’era Capton Jesuino pa trazês quês macaquin inda de volta. E assim foi, ma p’abuse ô êrre tê hoje ninguém sube quê sô Manin Estrela e más ninguém ê que podia firmá. Ma cma jal morrê, el levá quel segrede ma el pa cova e paz a sê Alma!... Quê na hora de escrevê quel carta el pô: - Caro amigo,.... Podia ter a bondade de me enviar “ 1 0 2 macacos “ em vez de 1 ou 2 macaccos, o que tava fazê um erre de “cento e dôs macóc”.Um verdader chatice!!! Quê, sem sombra dum dúveda, cma macóc tava ta vendê bem na borde de paquete na época, Capton Jesuino, quinze dia depôs tchegá na Baía de Porte Grande carregode de sês 102 (cente e dôs macóc) moda foi pedide na carta. Foi log um afronta, Captania mandá tchemá Nhô Studante que dzê log cma el tinha pedide era 1 (um) ô 2 (dôs) e não 102 (cente e dôs) macóc. Smeme assim foi recuperode uns 20 (vinte) ma quês otes foi tude mandode pa trás pa Tarrafal de Santiago de Cab Verd, dondê quês bem. Foi um êrre que cstá core! Ma Manin Estrela, sempre firmá cma el tinha escrite “1 (um) ou 2 (dois) macacos” e não 102 (cente e dôs). Ma, cma copia de carta ca tinha pa prova, ninguém pude prová VERDADE e REX trazê tude quês 102 MACÓC que durante dôs dia e dôs note, intchi Baía d’Ilha de Monte Cara de GRITE ma GUINTCHE de MACÓC, ta esperá sês dia de volta. Zizim Figueira ( José Figueira,Júnior)
Comentário: Comentário: Comentário: Comentário: Comentário: Comentário: Comentário: Comentário: Comentário: Comentário: Gregório Ramos grigaramos@hotmail.com |