|
NÔS GENTE - E UM DIA DE TRABOI NA SONCENTE D’HOJE EM DIA Pa quem conchê Soncente-Cab Verd c’sê Mindelo cosmopolita dum vez e sê bnite Baía natural de Porte Grande, que tava recebê quaz cem vapor carregode de gente, carga e otes cosa binde de tude parte de Munde. Num forte movimente que tava garanti pove dum manera ô dote quel panela na lume de tude dia. Quel movimente na “Rua de Lisboa”, chei de gente, cada um ta falá sê linga, ma ta ser sempre cumpanhode pa nôs Ciçarone que tava levás pa tude banda pa mostrás terra, naquel tempe de Lombe, London Bar, Scotand Bar etc. Era, Cafê Royale c’sê bom presentaçon sempre c’porta aberte, c’sês acorde melodiose de ta sei de lá dentre, na trompete de Morgadin, pione de Tututa, violão de Tchuff ma Lela Preciosa e Ude na bataria. Era vapor na Baía de Porte Grande e traboie pa tude gente! O que tava motivá tude um deslocaçon daquel pove trabaiador d’nossa, binde de sês área de posente moda Monte Sussegue, Rebera Bote e d’otes lugar de terra, c’sês ponte de fazê quel “break”pa dasse dôs dede de conversa, ô pas carregá sês farnel antes de bai pa traboie, fazida compra na rua de Matijim. Ô pa tmá quel bom grogue antes, pa corpe podia reagi e dás coraja pas betasse mon c’força na traboie, ô pa dás quel desconse de corpe datardinha depôs dum dia luta pa sobrevivença na mei de Baía. Era assim, quel Soncente dum vez c’tude sê charme particualr. Quel Soncente de pobreza, ma de respeite pa gente más bedje, na quem, tude mnine tava tmá quel “bençon” e palavra solidariadade na vezin era rainha. Um situaçon que ca tinha razon d’existi pa pove de Soncente e mesme pa Cab Verde se tcheu cosa tivesse tchegode a tempe e side fete drete na nôs Ilha de Monte Cara. Mute gente ta custumá dzê cma ta parcê’s tê cma Soncente nascê pa ser maldiçuode?! Ma, não!!! N’ê Ilha quê maldiçuode, ma sim quem que tava e ta mandá ê que vral assim e tita cuntinuá ta dexal bai pa lâma. Pr’além de nôs “Património” que tem side nês ultme tempe sempre demolide e estragode sem consultá ningúem, ô enton se tive consentimente de demoliçon prop de gente de terra, problema ê ote, ê que tive cunivença. Hoje em dia, cma já fui trode pove de Soncente tude sês hipotese ma possiblidade de ponte d’encontre moda sês famose “Praça Estrela” dum vez, c’sê “Espinhera” que tava fazê sombra p’abrigá gente na sês passája pra lá, Pracinha d’Igreja, tê quês Barbaria nimode ondê que tava sabide d’alvicera ma cosa de vida de gente de terra, mesme binde na carta pa quês que tive sorte de sei pa estranger. Nôs pove de Soncente, um pove curiose que ta gostá de ser informode e n’ê vontade que ta faltal, ma sim matéria informative quê bem poc. Hoje tem “Parlamente” quel pracinha quês fazê diante de Tribunal Nove, ma sô pa ijga uri ma carta e contá partida.El ca tem quel calor nem de Praça Estrela nem dum Pracinha d’Igreja ô quês “Jackasse” de vendê cmida na rua de Matijim, ondê que ta tinha sempre tcheu gente, quê la n’ê um ponte de break. Dzide cma tê gora, nôs gente te estode ta espiá um lugar de “break” daquês dum vez ondê incostá.Cosa normal, quê tude na vida tem de ter sês ponte de referença. Quonde m’tava na Soncente, tude dia plumanhã cidim volta de cinque hora e meia, m’tava rancá pa Laginha a pê e moda tude gente m’tava ba da um goitadela na Montra de Djibla que vrá um ponte “break” de gente de Mindelo-Soncente. Era leitura e comentare, o que tava faze’m prazer d’oiá cma tcheu daquês malta sabia lê, o que n’era caso daquel tempe antigue. Quês boys tude de saquin na costa, rume “Cais Costavel – Enapor”, pa bai espiá traboi, tava juntá tude dia daquel hora, la naquel Montra de Djibla ponte “break”de sês informaçon. Pa cmida ês tava comprá sês bolacha de cavala frite, ô otes ingrediente la pa banda de Cais. Enton, na conversa ma Arlinde e Vicente dôs boys fidje de gente cunchide e nhas amigue d’infância que tava la de passaja pa basse espiá traboie, nô metê conversa e lá enton, ês desabafá c’mi ta dze’m cma felizmente, tê inda na Soncente tem quel “Montra de Djibla” na rua de San Jon que sempre num grande esforce e na continuidade ta bai ta fazê sês “Açon Social” c’imaja ma escrite, dum manera desinteressode, ta procurá sempre informá pove de cosa de nôs terra e de Munde inter. Lá nô imbalá na conversa, enton Arlinde e tude quês colega d’seu dze’m cma na Soncente, naquel tempe que n’era tude gente que tinha televisão, sempre que ta tinha um cosa importante na Munde (moda guerra de Golfe, Copa d’Munde de Football etc,) Sr.Djibla tava pô log televisão na rua pa tude gente oiá, a ponte tê de pliça bem, pa fetchá rua e evitá passaja de corre naquel rua, pa pove podia fecasse descansode t’oiá televisão. Cosa que tude quês gente aprová cum csinha de pena de ca ter tide más, quê depôs quaz tude gente passá ta ter televisão na casa. Conversa tava nimode, ma Arlinde dá um grite d’alerta paquês moce, ês sei ta bai pa depressa ta corrê pas podia tchega a tempe e ser tchmode na lista de traboie na Cais, pa garantiba quel pon de dia. Quê senon, sel ca tivesse quel ocasion de tra quel dia de traboie la na Cais, el tinha vrá camin ta corrê e bem oiá sel tava otchá lugar pa trasse um dia de traboie na Estrada e, se tivesse?! Dôs dia depôs nô incontrá na camin de Tchã Sumeter, el cabá de conta’m más um csinha de sê vida, ta dze’m quel n’era malondre quel tinha cunsiguide fazê sê decime segunde que boas nota, ma cma bolsa agora ê poc e contode na dêde, el era ubrigode a fecaba naquel dure finaçon de corrê tude dia log cidim de plumanhã, bai espiá traboi na Cais ô na Estrada, pal podia cmê, tal era destine del ma tcheu de sês colega de mesme idade. Quê cosa ta bem mau pa nôs tude prei Zizim e, li ca ta c’traboie. O que cada dia tita bem ser pior e essse cosa tita bem ser prop um afronta. Mi, na nha ponte de vista pessoal, dês de tempe de “Caniquinha em que Gote de Manê Jon tava ingordá na gemada”, ês situaçon na Soncente ca tinha razon d’existi. Embora hoje em dia, tude cosa ta nôs mon, ê mistide pensá sériamente na situaçon de Soncente que parcê’m também ê CAB VERD. Zizim Figueira ( José Figueira, Junior) Comentário: Comentário: Comentário: Comentário: Comentário: Comentário: Comentário: Comentário: Comentário: Comentário: MaguyAlfama
maguyalfama@gmail.com Comentário: MaguyAlfama Fragoso maguyalfama@gmail.com Comentário: Comentário: Comentário:
|