|
R E G A T A - MÁS UM DESPORTE RISCODE DE PLANETA SONCENTE Quel finish enton, era dvera chei d’emoçon, remador ta dá sês best pa sês bote podia vançá c’força, c’timoner na popa sempre ta gritás quel: - REMAAAAÁ DIABE!!!. Pove também ta gritá ta bem ta dexi pa ponte d’incontre de meta lá na prainha as vez ô Alfandega ô de Canal de Miller & Corys Moda Damatinha (João da Mata Costa) grande cricketman Mindlense tchegá de dzê, Salina foi sem dúveda Universidade de desporte cab-verdiane, ondê que Cricket, “the king of sports ”reconhecide p’inglês, foi primer desporte praticode na storia de Cab Verd dês de fim de sécle XIX. Pove de Soncente devê tude sê educaçon desportive baseode naquel rigor e “fair-play”que jogue de Cricket, ondê que nunca tava descutide decison d’arbite, sempre impô e tava brangi tude otes desporte. Basta, inglês na goze tê inda hoje ta dzê, cma Napoleão perdê batalha d’ Waterloo, mode el ca sabia ijgá cricket. Trás de cricket, inglês inda trazê ma ês um data de modalidade desportive que nôs tude hoje em dia ta conchê e que ja’m mentá n’otes storia que nem vale a pena bem torná repetis, quê ês fecá pa sempre ta fazê parte de cultura de Soncente que depôs pude exportás p’otes Ilha de Cab Verd. É de lembrá quel tarde em que Damatinha e Pedre Teodora na Tchã de Cricket, levantá Soncente em pese cara, naquel grande match de Cricket ( que motivada Nhô Roque pa ser Damatinha ) em que nô ganhaba quel grande team inglês Campion de West India (Antilha Inglês) de passaja pa Soncente, naquel “destroyer” (vapor de guerra) tchmode Sparow”. Na mei de tude ês desporte praticode c’seriedade paquel juventude de nôs terra que durante tcheu one sube passá mensaja, num época que tava ijgode p’amor a camisola, sem nada recebê em troca, sende fiel sempre a sês equipe sigunde sês convicçon e afinidade. Também tava praticode “Regata”, não de naviu de vela ô bote a motor, ma sim pa força de punhe daquês valente marinher remador de Ponta de Praia, sende tcheu dês de SanNiclau de tempe de pesca de baleia. Basta ês ca mistia treiná, quê remá era sês ganhe pon de tude dia, na mei de Baía de Porte Grande de Mindelo na Soncente-Cab Verd.
Tempe de Regata
na Ilha de Soncente Cab Verd ones 30 / 60 Enton, na nôs terra também tava organizode Regata qu’era cosa de grande prestige local pa valorizá cada um daquês team de nossa, que tava dá sês best na dia daquel grande participaçon. Assim, é de lembrá na tempe, quel dinâmeca de Damatinha (Sr. João da Mata Costa) t’organizá quês Regata de tude one na mês de Junhe na Soncente d’acorde c’tude quês negociante de Baía, Clubs e Captania de Porte. Enton, ta tinha más ô menes uns 10 (dez), 15 (quinze) ô senon más bote de 4 (quate) reme ta participá naquel Regata de tude one, cada um c’sê timoner sentode na popa de bote, betode mon na lême, pa comandá ritme e incorajá sês remador. Inda m’tem na mimória, alguns daquês bote que tava participá nesse tal Regata de mês de Junhe, cosa que tava cativá pove de Soncente e fazês bem tude p’orela de mar, que tava panhá desde de Puntinha tê Plurim de Pexe, pas besse oiá quel finish chei de força puste na Regata qu’era dvera sempre chei de emoçon (um fotografia li pa tistemunha). Tava participá naquel Regata: - Quel escalere de Captania de Porte que tinha um pinta de matá c’um linha bnite pafronta, má que nunca ganhá, más quel bote de Jorge Gregue (Karantonis); Joaquim Silva (Quim Chavinha); Lopes e Madera; Cucha; Pidrim Bettencourt; bote de Derby de Tiu Afonso de Pedre Antonha; bote d’Amarante de Siver; bote d’otes negociante de Baía que grinhassim ca ti ta bem na mimória e tinha quel bote de Sociedade Figuera que sempre ganhá quês Regata, ta corrê pa Mindlense e fui Campion um data d’one siguide. Basta, tude quês moce remador de Regata, era bons remador e dum contituiçon fiseca sem igual. Tude ês barra di aço, de peitaça ma muscle de broce cabode de criá pa sês profisson. Regata tava rancá, depôs daquel tire de pistola de bala séc, furnicide pa Captania de Porte, trode lá na “boia de fora”, quaz perte de Djêu, pa Nhô Tomás Djidjula. Enton, el tava bem naquel gasolina de Captania de Porte ta cumpanhá Regata, pa ca tivesse rabica nem passada pau que podia desclasseficá um qualquer que fazeba malandrice. Quel finish enton, era dvera chei d’emoçon, remador ta dá sês best pa sês bote podia vançá c’força, c’timoner na popa sempre ta gritás quel: - REMAAAAÁ DIABE!!!. Pove também ta gritá ta bem ta dexi pa ponte d’incontre de meta lá na prainha as vez ô Alfandega ô de Canal de Miller & Corys. E nôs Damatinha timoner de Regata na bote de Figuera, espectacular moda de custume, quaz róc de tonte gritá sês remador, quel remá diabe, vitoriose, entrá one sei one, tava mandás na fim de corrida pa pô quês reme pu’ar em sinal de vitória e abri quel bandera de Club Sportive Mindlense ta gorgoloteá na vente na proa de nôs bote que também era pintode d’incarnode brónc. Na fim, tava fazide quel intrega de Taça de Regata, na mon de timoner Damatinha, lá deboxe daquel Águia na Esplanada de Praça dos Aviadores. E depôs, pove de Mindlense tava tmal el, leval ta corrê ta gritá pa rua de Mindelo quel : - Club Spotive Mindlense hip...hip..hip... Uéee!!! De volta pa Marginal, ês tavav fazê quel break lá na Sociedade Figuera pa festejá quel vitória moda de custume, pa depôs ba leval lá na Sede de Club Midlense perte de Praça Estrela, ondê que nôs cumpade Libertal (Deus dal Céu), tava fetchal naquel “Montra de Mindlense” ric de Taça de tude espece ganhode suode cansode, pa tude quês valorose atleta d’equipa más antigue d’Ilha de Monte Cara e de tude Cab Verd. Hoje em dia moda Cricket, Rugby, Rudiada Pau etc., já ca ta praticode más Regata de nium espece na Soncente o qu’é pena quê el também durante tcheu one fazê parte de nôs CULTURA. Zizim Figuera ( José Figueira, Júnior) Comentário: Comentário: Comentário: Comentário: Comentário: Comentário: Stella Lopes stellalopes@verizon.com Comentário: Comentário: |
