|
NEWTON DJERÊ - UM BOXER DE LEGENDA João Augusto Newton (Djerê) de sê nome de nascença e baptisme, nascê na Soncente dia 20 (vinte) de Junhe de 1908, de pai Newton, natural de Serra Leoa (Freetown) costa ocidental d’Africa, binde pa Soncente trazide p’inglês na tempe de carvon, e de mãe verdiana natural de nôs Ilha de Monte Cara ô de Georges Washinghton Head (moda inglês tava usá tchemal)... Newton Djerê, um boxer de legenda mode sê “peak boo style”, que n’era cunchide d’otes boxer de terra e que tava fazê tude sê charme e segrede, estile que despôs tcheu boxer na terra vrá t’usá. E, era assim quel tava cunsigui fintá tude aquel que tchegá d’infretal na boxe na época!... Um boxer de legenda sim, mode sê estile sô d’seu!
Newton Djerê home de forte moral e exemplar, ca tava femá nem bibé, só pal pudia mantê na cuntinuidade quel exemple que jal tinha recibide de escola daquel malta más antigue de desporte, tchmode geraçon de Salina. Assim na sê qualidade mute especial de bom boxer, el era cuvedode e tchegá de pertencê quaz tude quês escola de boxe Soncente (Nh’Antunin Mercone; Quim Chavinha q’um pertencê; Bans; e despôs ja na sê idade el tava custumá de vez inquante ijdá Artur Boxe ma sês pupile) pa isená malta praticá nobre arte. Djerê fui sê nome de guerra na “ring” que pove de Soncente butzal pa sempre e que fecá registode na livrona de “história” de desporte de nôs terra. Inda rapazim, nha pai levaba mi pam basse oial ijgá na Verbena de tempe de Mota Carmo, lá na Corte de Tenis de Castilho, cosa q’era um beleza d’oial, sô mode sês esquiva de cabeça que ca tinha nium ote boxer na Soncente que tava igualal. Aliás, fui lá q’uns dia antes el tinha ijgode ma Jon Cabral quel jogue em quel Djerê ingataba na corda e Jon Cabral proveitá log pa dal más de 30 (trinta) sóc que graças a sês esquiva de cabeça Jon ca tchegá de certal nium e pove chei d’admiraçon rabatal de “ring” e dal vitória sem jogue cabá... E, el tava fintá adversare que sê mon esquerde sempre esticode pa diante naquel estile de “peak” e depôs “boo” quonde el tava resolvé fazê quel ataque rapte nem relompe que ca tava dexá adversare nium hipotse, nem tempe de pensá ô respirá, o que tava fazê tude sê força naquel manera intligente d’ijgá.
Pa falá um csinha del, Djerê tinha sê um metre e oitenta (1,80 m) e era um home bem cunstiuide de sês oitenta quile (80 kg) de muscle, sem gaguejá. El tava morá na Canalim de Nh’Antone Djudjim ma Mari Antonha sê cumpanhera e, mãe de sês sete fidjes em que na mei dês tinha um mnininha qu’m conhecê bem por nome d’Hirondina que tava ijgá boxe que nem tude rapazim motche, prindide ma sê pai. Djerê, tude sê vida, desde principe de tempe de carvon e despôs de passaja pa diesel sempre trabaiá na Cumpainha Inglês de Millers & Corys. Quaz tude mnine, tinha grande admiraçon pa el e despôs cma el era amigue de malta e em especial amigue ma nha pai Djô Figuera, quonde m’cumeçá ta treiná boxe, el tava sebi sempre la na salon de sociadade Figuera, pal ba oiá nôs malta jovem de grupe de Pá Quim Xavinha ta treiná, ma nunca el tava dzê nada... Té q’um dia, mi que nhas 21 (vinte e um) one cma diasá m’tava estode ta treiná boxe, malta de nha rua, ma malta de Liceu e tude quês gente de Club Spotiv Mindlense que sempre fui nha equipe, otchá cma já’m tava pronte pa entrá na “ring” pa’m basse fazê um “challenge”. Cosa q’assim fui! Ma lá enton, Djerê sende nh’amigue resolvê bem atuá e, pô luva ma mi pa insena’m e trame um mozada daquês defeite por falta de experiença, cosa que mute m´fecá ta devel e pa sempre. Pa quel “challenge” de mi ma Titine Boxer (Celestino Pires) que na época era Campion de pese médio de Cab Verd, em que pamode nha pese, m’tava entrá na sê categoria, nô ijgal na mês de Junhe de 1960 lá na Éden Park, bilhete esgotode (foto anexe) m´ganhal (modestia á parte). Djerê, tava fazê sparmat ma mi e tava bai ta explicome quês esquiva de cabeça, sóc “hook ô crochet”, “straigth” ô direte, uper-cut e manera de ijgá ta trocá pé etc etc... Jimy, um inglês que tava bai treiná ma nôs el tava da’m era preparaçon fisica (corrê, remá, saltá corda, etc..) Na realidade e moda tude gente tava dzê Newton Djerê era sem duveda daquês boxer más técnique de Cab Verd mode sê facilidade de trocá jogue na ringue, ora el tava usá sê tateca de “peak boo” cma derrapente el tava mudal e vral na “counter punch”( jogue d’espera) sobretude naquel trocar de pé, cosa que poque boxer té hoje sabê fazê... Moda el tava dze’m sempre, um gaje podê tem más pese que bô, ma se bô “use the brain”(usá cabeça) bô ta betal na tchon one time... Enton, el tava bai ta mostra’m quês ponte froque de tude gente: - chin (ponta de quexada), plexus solar (boca estome), lever (figuede) e basse... El ijgaba, ma tcheu boxer binde na carvoere ma na tanker estranger daquês que passaba na Porte Grande de Soncente Cab Verd, sempre naquel bom ritme e ta sigui linha daquês grande boxer que honrá terra e cubri’n de glória, moda Chete de Nh’Antone D’Ana, Lady e mute otes home de sês pancada... Djerê, moda tude home de força, ca tava falá mute e tinha um presença que tava inspirá respeite na tude sê serenidade, ma sem ser mau. Assim el tinha tcheu amigue. Tude fim-de-semana especialmente dia dmingue plumanhã moda era sê custume, el tava besti tude de brónc de bic de pê té cabeça que sê tchapeu de Panamá (brónc) e el tava bá pa Praçinha d’Igreja dá sê amigue André Ingraxador fala e descuti boxe ma quel bedje mercone reformode de nome Nhô Capute, tiu de Tuchin de Nh’Antonha Guimar. Despôs el tava cuntinuá, era passá pa Praça Estrela moda tude criston, ba dá Nhô Pitra, grande contador de storia de cosa de terra, quel fala... E, quonde Nhô Pitra tava pô ta falá, era “mnine tchequer fagon”, quê nô ca tinha direite de dá um piu. Quê riqueza de storia que tava seí de boca de Nhô Pitra, mnine de Soncente nascide e criode na Salina ma Rua de Morguine, era tão forte que silence tinha que tem pa tude gente uvi... É de lembrá Newton Djerê, já c’um certe idade ma pese, quonde el fazê brilhante demonstraçon de técnica de boxe na Éden Park, ma Armando, irmon de Jotamon, e que tude pove gostá. Naquel note de nha combate ma Titine, fui daquês ultme vez q’nô tive junte, quê despôs m’bai pa Sal, nô fecá desapartode ma nô tava mandá cumpanher mantenha pa nha pai Djô Figuera e nha tiu Pidrim Silva. Uns one despôs, já na França, m’recebeba quel triste notícia num carta de nha pai, ta dzeme cma Soncente, dia 31 d’Agoste de 1975 tinha pirdide Djerê, sê amdjor boxer tecnique de tude tempe, home pa quem passá pa mon tcheu geraçon de jovem verdione na escola de nobre arte que sempre fui boxe, na respeite de “man to man” e regra de marquês de Cantherbury, trazide pa inglês tê Soncente de Cab Verd.E assim desaparcê nôs Djerê ô João Augusto Newton, mas um daquês grande personaja de vida desportiva Mindlense de Soncente Cab Verd que come home exemplar e de bem ta merecê e devê ser registode pa sempre na Livrona de História de Valor de Gente de nôs terra...
Comentário: Zizim,
Hoje enches-te o meu dia bem como o de toda a nossa comunidade caboverdeana
cá em Sidney-Austrália com essa linda e maravilhosa
estória sobre o nosso grande boxer, amigo e homem de bem que
foi o nosso e bem nosso NEWTON DJERÊ. Rapaz a malta de cá
te diz mil vezes obrigado por todas essas lembranças e recordações.
Pois como se diz na vida "RECORDAR É VIVER" e com
toda a razão. Olha nem mais palavras se tenho para te dizer.
Excelente esta estória que vai enriquecer a parte histórica
de Soncente Cabo Verde de tudo o que tens feito de importante pela
tua/nossa terra. Mantenhas Terencio Comentário: Comentário: Comentário: Comentário: Comentário: Manuela Chantre Barros m3barros@aol.com Comentário: Comentário: Comentário: Comentário: Miguel
M.Monteiro mucimdereberabote@gmail.com
Comentário: Comentário:
Comentário: Ola Zè,
falando do Djere, foi bastante bem conhecido no nosso meio desportivo,deixou
o nome dele gravado para muitos que lhe conheceu de perto, eu tive
a oportunidade, ele foi meu vezinho em tempos que morou na Ribeira
Bote rua 10, depoies mudou-se para calazinho de nho Anton djogin,
era bastante educado respeitava toda gente, grande e pequeno. Tambem
ele gostava de encinar a tecnica que so ele sabia, com aquel jogo
de cabeça, era sò ele, Zè a historia dele era
fantastigo. Zè tu cada Domingo, aprsentas uma sorpresa dos
nossos HIDULS, parbens Zè, daqui vaie aquelo abraço
amigo Januàrio Comentário: |
