|
INTERRE DE CLAUDINA MANCA Quel one lassim, Soncente tinha dode tchuva drete, que rebera ta corrê pa mar e tude quês chatice d'inxurada que pove já ta custumode na recebê, quonde esse milagre ta contecê. Ma, moda ta dzide na terra, p'um catchorre ingordá um burre há morrê e, cma quês dique que Mota Carmo (admistrador) mandaba fazê na sê tempe, e que tê inda ês t'ixisti lá pa quês banda de Pedra Rolada, guentá!... Anton, cma tude quel ága intranhaba deboxe de tchon, bem parcê esse lugar na Soncente que pove butzaba por nome de Rebera de Paúl. Um stora ingraçode que tcheu gente d'hoje india é capaz de nem crê creditá, quê hoje pra lá já ca tem rebera, mode casa que fui fete na extensão de tude aquel lugar, sem rei nem lei, o que ligá "one time" Rebera Bote, Fonte Francês, Monte Sussegue, dá estragá tude quel beleza natural, godzide pamode progresse, nhas gente! Anton pove, cma ága tava ta revê deboxe de tchon, cosa que durá tcheu tempe, ês proveitá logue cada um de fazê sês hurtinha pra lá, cercode de pau de bombadera ma charutera (planta) e arame farpode, pamode cabra ma burre ca entrasse de note pa ba cmês sês prantaçon. Tude espece de planta fui prantode lá na Rebera de Paúl, nome que pove dal, mode quel tonte virdura que parcê de rapente lá na rebera, té que gente tava oial de longe... Basta moda voz de pove dzeba, cma bodzê natureza diasá tava estode ta goitá quel tchuva, pal podia exprimi tude sê beleza naquel virdura e fecaba ta contrastá c'aquel sicura de custume de nôs terra! Pa flecidade de pove, quel cosa durá tcheu tempe, basta era piquenique derriba de piquenique, tude dia dmingue que Rebera de Paúl sempre chei de gente, quê tinha midje verde pa fazê midje ingron, bobra ma mandioca e batata pa colde de pexe, ma batata doce. Tive quem tê prantaba uns dôs bananera que tchegá de dá banana. E, pove marabidjode de tonte marabijda, ca pude resisti, ês tral log um cantiga: Oi vamos
imbora pa Rebera di Paúl Pa nô
ba oiá quês
gente que mon na tchon quês
gente que mon na tchon ta fazê
midje ma fejon Rebera di
Paúl ê um paraíso Sala di visita
di Mindelo Di branco
ma preto... ( B.LEZA ) Cantiga esse
que fecá pa sempre na storia de nôs terra! Rebera tava
stode nimode, assim ta tinha sempre uns fenhenga, ora lá na
Didida, ora lá na Claudina Manca. Más
certe lá na Claudina, cunchide pa sê bom mon de panela,
tude sobde de note tê madrugada, que tava cuntinuá dmingue
c'aquês piquenique lá na hurtinha de sê cumpade
Delfim, ondê que nunca tava faltá nada pela graça
de Deus!... Sô qu'às vez da tarde, quonde tinha jogue
de futebol na Compe de Jogue, ela tinha que ba abri ága pa
ijgador tmasse bonhe e pal pudia ganhá um truquim. O que já
n'era prublema, quê Hirondina, sê subrinha, já
tava podê tmal conta de casa. Naquel one
de bonança e santas graça, tude gente morode pa quês
banda tava estode prop fliz de vivê na mei de natureza, quê
cmida tinha à vontade e Hirondina, Zabel ma otes de sês
culiguinha tava tude ta esperá tem mnine, ma na respeite. Um dia plumanhã,
tinha manchide que mute vente e pescador ca tinha pudide betá
bote na mar, mode bandirinha preta que tava la tope daquel mostre
de Captania, ta gorgoloteá na vente, pa sinalá mau tempe.... Anton, c'aquel
falta de pexe que tinha na terra, bem parcê um vendedera ambulante
binde de morada lá pa Rebera Bote, perte de casa de Tite de
Nhô Posse ta vendê uns "fambil", pexe que tem
pele dure ma, despôs de pelode, sê carre é fine
e mute bom pa cmê... Tite, pa curiusidade, perguntá quel
mnina de dondê qu'aquês pexe tava ta bem. Vendedera dzel
cma ês tinha side panhode na costode daquel naviu por nome de
Mar Novo, que tava fundeode diante de cais de Taqueilas (cais de Mota
Carmo) na Puntinha. Tite bem
ta tchegá, el espiá quês pexe na guelra ma na
oie, dvera dvera ês tava ta parcê prop frisquim. Cma era
um sobde, el na sê boa fé comprá quês pexe
pa Claudina Manca, que despôs tava dal sê denher. Log
el manda Bei de Xangai, sê nitinha, pa basse ta corrê
longá Claudina tude quês pexe, p'aquel fenhenga de sobde
de note, de Maria Santíssema. Fui um verdader
ligria pa tude quel pove, que tava prop inrascode que stora daquel
tchuquim que Chala de Bite tinha matode pa festa, lá pa Farnande
Pau, ma qu'inflizmente quonde ês abril, el tava buze (doença
de chaveira). Log Hirondina
ma Zabel pô quês pexe na tamper moda de custume e quonde
Claudina tchegá de sê traboie de bomba d'ága,
tude contente cum risim na conte de boca ela dzês, bunzim dmunde
nhas mnininha, ês pexe sirvine dente d'hora, ês é
p'um calderada e assim fui, quê bodzê sês subrinha
tava ta duvenhá, quê jás tinha cortode tude quês
pon de caldera (mandioca, nhame, batata, banana verde) lavode, puste
na ága. Tchon de
borre de casa de Claudina tava bem trabaiode, barride, betode ága,
calcode, secode e betode vela raspode na tchon, moda pa tude boie
de tcherê-cadera, prop pa criston ma sê dama podia deslizá
amdjor na hora dança. Naquel muvimente
de gente sempre t'entrá ta sei lá na casa de Claudina,
moda s'ela fosse "Godfather", e despôs c'aquês
cuvedode de boie ta bem ta tchegá, lugar intchi fullup!...
Boie rancá pa dez hora da note, na ritme prope sabim daquel
coladera que tava na moda: Manhã
cede no ta bai… Passá
dia na Baía Pta rede
no ta bai Panhá
pexe pa escabeche... Oh mnininha
de morada Hoje é
dia d'exibi Besti bô
saia travada Moda Bia
de Bibi!... Tude normal,
num imbiente sem vaidade, naquel ritme de múseca "pumping
sweet" e tude quel pove formode um sô corpe alem ta bai,
ta diverti sem ranjá stora!... Volta de
meia note, fui fazide um break, quê tchon secá, pas pudia
torná preparal mode quel poera ca sebi na sala. Anton, Claudina
proveitá e mandá sirvi log quel calderada de pexe, quê
canja pa madrugada já tava na lume. Primer prote bem pa dona
de casa, siguide de cada um sê vez, quê lá etiqueta,
moda quel buzode de Tchucé tava custumá dzê, ca
fui cuvdode na sês festa... Três
hora de madrugada, ô que abole lá naquel lorgue de Fonte
Francês, cum data de gente ta sei de sala de boie ta corrê
pa tchada que tcherrica... Cuitada de Claudina Manca nofragode sem
podê mexê... Flizmente que cumpade Delfim, más
otes gente que ca tinha cmide daquel calderada de pexe pude levá
Claudina, despôs de lavode, num cadera pa Spital. Dzide, cma
tude quel chatice fui culpa daquel calderada de fambil, um pexe que
ta custumá estode na costode de naviu e ta gostá de
cmê quês buzim ma lapa que ta criá derriba daquês
forre de "cobre", o que provocá quel intoxicação
geral, pa quem que cmel. Esmoregal também é um pexe
de lorgue que gente ta devê fazê atenção
na cmê mode sê figuede envenenode, mode um espece de plancton
quel ta cmê na olte mar... Claudina
ba pa Spital, ês dal sulfatiozol ma ela cuntinuá ta desidratá
sem pará, trançode cuns prublema de coraçon qu'ela
tava custumá sinti, ela cumeçá ta fecá
fraca sem sustente... Quês
otes gente tive más sorte, quê Antone Catoque, que tava
lá na festa que sê bicicleta, largá pa casa de
Djandjan ba dal fala, que dexi log pa drogaria na morada junte ma
Matoche, bá bescá ramede e despôs cambá
Fonte Francês ba socorrê tude quel Pove que "Limonada
Lactea"... De graça, sem recebê nium toston e fui
o que ijdá tude quês gente safá rascada. Dôs
dia despôs, nôs Claudina Manca morrê na Spital,
que cumpade Delfim, Tite, Djô Ía, Cuque e tude quel pove
de Rebera remorsode, t'otchaba cma ês divia ma era ter ela dexode
lá na sê casa, quê talvez ela tivesse safode s'ela
tivesse tmode também quel ramede de Djandjan!... Ma cma morte
nunca é culpode?!... Paciença! Na storia
de vida de pove daquel Rebera, nunca tive interre de pobreza ma grande
e tão bnite, na tude sê força de solidaridade
que ta fazê parte de nôs CULTURA e que nôs pove
sabê mostral nês momente que tude quel MORABEZA, AMOR
E CARINHO... Antonin Martina
de Monte Sussegue, Nhô Queitone de Lombe, Nhô Faustino
de Bela Vista, quês grande artista fazedor de caxon, dexi tude
pa Fonte Francês quel dia, cumpanhode pa sês ajudante
ma tude quel pove pronte pa ijdá... Ês fazê Claudina
Manca um grande caxon prete forrode por dente, que fita doirode na
parte de fora... Caxon fui puste lá na mei de casa, pa um ultme
adeus c'aquel altar sebide moda de custume. Ela ca fui levode pa Igreja,
quê ela era Racionalista Cristâo, de casa de Sr. João
Miranda. Na dia siguinte,
pa três hora da tarde, tude quel Pove desabá de tude
quês Rebera (Rebera Bote, Fonte d'Inês, Fonte Francês,
Farnande Pau, Monte Sussegue, Passaron), gente de Morada e d'otes
parte de Soncente que sês lincim brónc, pa bem cumpanhá
quel interre de nôs grande Claudina Manca, que sirviba tonte
gente na sê vida, e leval tê sê ultma morada. Interre fui que múseca, guentada quel "Djosa quem mandobe morrê", pa Lorence Pilinha, Marcel, Franque e más figurante... Na borda de cova, fui quel "Hora di Bai", pa fetchá interre, que tude quel pove rinquiode que sês lincim brónc ta saná pa despedi de Claudina e ta tchoral que sentimente... Zizim
Figuera (José Figueira, Júnior) |
ººººººººººººººººººººººººººººººººººººººººººººººººººººººººººººººººººººººººººººººººººººº
|
Comentário: Zizim, Irmão verdiano companheiro e amigo de infância. Como sabes porque és Geógrafo, a diferença horária entre Sidney-Austrália e Cabo Verde neste momento é de 11(onze) horas. Pois para Leste é sempre mais tarde e, por cá neste momento são 18 h 20 ou sejam 6h20 pm como dizem. Por isso todos os domingos como fico em "standby" sobre as edições do Liberal que muito agradeço. Me considero um previlégiado pelo facto de ser dos primeiros na diáspora a ler as tuas emotivantes estórias e noticias da nossa Terra. Esta última crónica como todas as outras está lindamente bem escrita reforçada daqueles acepipes linguísticos que sempre enriqueceram o nosso idioma, tais como: fenhenga, boie de tcherê-cadera, música pumping-sweet e outras expressões mais, que logo me vieram ao espirito. Só quem não conhece ou não quizer aceitar é que não pode compreender este estado da alma de coisas vividas por nós. Me lembro bem da Claudina Manca mais a Didida e aqueles célebres super bailes de terra batida atrás de Compe de Jogue que apesar de todas as precauções da parte delas as organizadoras que tão bem relataste aqui na estória, não nos impedia de sairmos de lá dentro no dia seguinte todos salpicados daquela terra "bromedja" de Rebera de Fonte Francês. Obrigado Zizim por continuares todos estes anos a assegurar valorosamente esta rica mensagem de coisas da terra para as nossas novas gerações. Olha até os meus filhos graças a ti e tuas estórias já dominam com aprumo o nosso Criol e lá vão passando a mensagem aos seus colegas e amigos caboverdianos aquei vivendo. Em conclusão e numa só palavra adorei mais esta com aquele nó no peito de SODADE. Grande abraço e
bom domingo Terencio Terencio Lopes terencio.lopes@yahoo.com.au |
ººººººººººººººººººººººººººººººººººººººººººººººººººººººººººººººººººººººººººººººººººººº
|
Comentário: Bom dia Zizim, Acabei de ler a tua estória e melhoraste considerávemente em estilo em relacção a outra versão que já conhecia o que é admirável. A estória encorpora um aspecto muito bonito da nossa vida e podes crer que apreciei muitissimo a tua descrição do velório e funeral que fazem parate integrante da nossa cultura( o culto dos mortos). Acho ali muito importante a maneira como sabes transnitir aos novos o que eram funerais de outrora Gostei também da descrçõa dos pratos, do pitoresco dos nossos personagens, de tudo, como sempre gosto nas tuas estórias. Beijinho
da tau amiga e sempre admiradora NAT Natália Lima da Luz natalialima luz@cvtelecom.cv |
ººººººººººººººººººººººººººººººººººººººººººººººººººººººººººººººººººººººººººººººººººººº
|
Comentário: Zizim, Ess stora ta más forte du qi um soque na stome. Pove lá na Associação tita bá gostá. 'M ca pude nem resisti uns lágrima teimose que dexime pa cara boxe de tonte sodade. Pra lá era nha zona ondê cum morá e 'm conchê tude esse pessoal e más alguns que fazê parte de nha infância que tude afecto de mnine de pobreza que nô fui. Felizmente pa tcheu de nôs cosa mudá, ma nunca nô esquecê de dondê que nô bem e nô ta cuntinuá da dá nôs help sempre que nô ta podê. Bem hajas Zizim de tonte
lembrança ma recordação.Bom dmingue e um bijim
YO Yolanda Dias yoldias@aol.fr |