|
ROCEGA DE CARVON - NA SALVAÇON DE POVE D'ILHA DE MONTE-CARA ( ONES 50/60) Dzide
cma Pove é que ta fazé "história" ! Assim,
Pove de Soncente d'imbigue ligode na sê Baía de Porto Grande,
ondé que de tude tempe, el lutá pa sê subrevivença
que sês mil e um stora pa contá, pude assim criá
desse manera "história" de sê prop existença... Na
tempe de caniquinha, Ponta de Praia ma Praia de Bote, fui um verdader
scola de vida, ondé que tava prindide nadá, remá,
merguiá, brigá, sem contá c'aquel grande contacte
ma stranger que sirvi tcheu pa nôs pa prendé ôtes
linga. Basta, dôs cosa mas importante que tude mnine tava prendé,
log na sês primer posse, pas pudia firmá na lugar era NADÁ
e dzé quel FUCK YOU!!! Stora
de mnine de Ponta de Praia é tão famose e cunchide, q'um
vez num daquês primer Jogos Olimpicos que fui na Helsinquia(Finlândia),
Rito Alcantera criol black na terra de gente bronque, tive stora má
um boys na saída de Compe de Jogue, já pronte pa bá
brigá, quonde um ote boys, bel pa traz e dzel n'uvide: -
DAL UM CALÁCA DAQUÊS DE MNINE DE PONTA DE PRAIA! Rito dzé cma, quel cosa dal um corája tão grande té quel cunsigui ganhá quel guerra... Despos, quonde el bem pa agradecé quel boys, el tive tempe de notá, só quel era criol, ma pena que jál tava ta bai lá longe e nunca más el oial.
Apôs,
fui naquel tempe de carvon, quonde Mala Real, Blue-Star Line, paquetes
de nome e ôtes vapor de carga tava passá pa nôs terra,
carregode de passager ô carga, na sês linha de navigaçon,
cosa que nimá durante um monzada d'one vida de Porto Grande,
ma nôs Cidade de Mindelo, qu'aquês Mnine, na mei de tude
quel muvimente, tive de proveitá pa prendê scola de vida,
sempre cumpanhode e ensinode pa quês home más bedje chei
d'experiença. Um
vez formode naquel scola de vida, ês tava passá ta ser
na sês familia, más um home de traboi, pronte pa trazé
quel truquim pa casa que tava ijdá garanti quel panela na lume
de tude dia.
Smeme
assim, c'aquel esperança que fui lançode na ones cinquenta
de binda dum Rafinaria Holandês (Standard Oil) pa exploraçon
de pitrol binde de Curaçau ( Ilha holandês d'Antilhas)
que fui tropedeode na Assembleia Nacional de tempe de Portugal e que
pudia ter evitode camin de S.Tomé. Cosa
bem vrá prop mariode pa nôs terra, c'aquel mudança
de "vapor de carvon pa diesel" o que fazé mute gente
mudá de rume na terra e spiá vida d'ote manera. Uns
embarcá pa estranger, ôtes pa SanTmé ô anton
vrá pescador etc... Ma, na mei dexe profisson, já tava
existi "Rocegador de Mei de Baía de Porto Grande" que
cuntinuá sês vida normal de rocegador quês sempre
fui, na sês rocega, ta prestá pove grande sirvice....
Pa
ês, era quel betar de bote na mar tude dia log cidim, pa basse
lá pa funde de Galé, panhá buze cabra, buzona,
cavole marin, porque-spin e tude o que besse na rede, quês tava
descontchá, limpá, puli vrá bnitim, pa despos vendé
na borde pa sês subrevivença, moda sempre fui sês
custume... Ma sês traboie de verdade era rocegá quel carvon...
Pa
instrumente de traboie, ês tinha quel armaçon de fer moda
um boca aberte, c'aquel rede fete de corda grosse trançode, bem
trabaiode e tude largode pa trás moda fim de boca de rede de
pescador. Na
parte deboxe daquel armaçon de fer tinha moda um lamena que tava
bá ta rastá na funde de mar, puxode pa força de
reme ma broçe de rocegador... E, cma naquel tempe Porto Grande,
ca tinha draga pa limpasse Porto, pove anton tava tchemás rocegador
ô home de limpeza de funde de Baía. Exe
raston de fer pa rocega, antes de pô rede, tava otchode ês
linhode na tchon lá na rua de Côque perte de Ferraria de
Toi Ferrer, junte de casa de Nha Gadjome. E, ês era uns verdader
obra d'arte que tava saí de mon de nôs artista ferrer Maika
Barronque, Rufine, Martilhone, Delfim, cabode de completá p'aquês
artista fazedor de rede de corda trançode, la na Praia de Bote,
moda Brune roçegador, Nai, Jon Pampim ma Dade pescador, antigue
guarda-redes de sigunda de Mindlense.
Na
tempe de crise de carvon, rocega bem vrá ricurse grande de pove
de Soncente e el durá tcheu one, o que fui normal, quê
durante tude quês one antes, carvoer passá ta descarregá
pa guardá, na nôs Baía de Porto Grande tonelada
e tonelada de carvon, binde de Cardif ma Newcastel (Inglaterra) pa vapor
a carvon. Assim,
de vez inquante na descarga, quês chute ma lingada de carvon que
tava scupli e bai pa mar, contra-mestre, ca ta tinha tempe de mandá
pará maquena nem nada, quê pa inglês " time
is money " assim tude quel carvon fecá pra lá ta
juntá uns data d'one na funde daquel mar de Baía.
Moda
ja-m tinha explicode antes, pove de Soncente desde principe butzá,
quês carvon de Nhôcasse (Newcastel) ma Cardiff. E, antes
na tempe de fartura, niguém tava pensá naquel mina de
carvon de funde de Baía, quontamá pa panhal, quê
tude gente tava más era custumode na usá, quel carvon
fresque de Cumpainha, na sês fagon de lume de casa, fete de lata
de pitrol baziu, cortode quel boca derriba, fazide um pôi de borre,
guentode p'uns firrim travessode, pa pudia guentá quel panela,
na hora de pol na lume e cum boca aberte pa lode, pa lume pudia ser
ventiode... Esse tipe de fagon na épca, tava otchode el na quaz
tude casa de Soncente, mode el que tava dá conta de recode...
Carvon
fresque tava otchode el de venda pa tude banda de nôs terra, ma
especialmente lá pa lode de Praia de Bote, bem sirvide p'aquês
"Amazona" amdjer nadadera e de sês fuga, moda Biquessinha,
Taivon, Djena de Tunguinha, tude ês, panhadera de carvon na lantcha
que tava fecá fundeode perte de praia...
Basta
era um bescar de vida não sem risque, quê na mar tinha
tubarão que tchegaba té de panhá Pole de Nha Prisca,
num daquês façanha de panhá carvon na lantcha. Também
tinha quês guarda de carvon de quintalona na Cumpanhia Nacional
ma Millers, ma de lantcha que fecá na storia, moda Nhô
Barone que tava pô quês gente pedra na Canal de Millers
e Nhô Damonse guarda de lantcha fundiode, que quonde el tava panhá
um que sóc intchide ô sem intchi na borda de lantcha, el
tava gritás: -
Bô n'tem bote?... Anton mar é quê bô bote!!! Tempe
de crise bem ta pertá e, moda naquel dzer de pove de "cabá
carvon, carvon ca tem", num terra daquel que nem arve se tinha
pa fazé lenha, quê quel poque de "tarafe" que
tinha lá pa Rebera de Vinha ma Cumpainha d'Oleo, fui tude quebrode
pa fazé lenha e cendé lume na fagon de três pedra
de pobreza.
Fui
anton despôs, mute tempe despôs é que Brune, Cesar,
Tchátchá, Aimonca, tude ês caquer, home de sês
grogue, que sempre ganhá vida (catá-assá) sô
na rocega, bem tmá fé dum conte de Baía de Porto
Grande ondé quês tava custumá rocegá, cma
tude vêz quês tava ta sebi sês raston de rocega el
tava bem sempre chei de carvon, quês era ubrigode a betá
na mar, pas pudia panhasse sês buze ma otes marisque limpim...
Anton,
um dia na morada que pove tava pra lá mute ta reclamá
falta de carvon, Brune tive ideia na mei de sê quebra, de ba oferecê
Maika Barronque um padoce de carvon-cardiff de rocega lá na Ferraria
de Jon Fliner, rua de Matijim pal experimentada na forja. Quel carvon
pegá lume dritim, anton Maika reagi log e ba ta dzé Bruno:
- pshiiiit!... Boca fiuza ok?!... ca bô dzê ninguém
moce, quê esse cosa é ore que bô tem li e se bô
tem mas bô ba bescá quê Jon Fliner ta feca ta comprobe
el pa forja fullop!... Brune
fecá caladim, sô el dzê sês colega du quel
tinha descubride... Assim, na dia siguinte log cidim, ês rancá
pa lorgue ba rocegá justim lá ondé que Brune sabia,
antes de Sol raiá e quonde era mei-dia, jás tava de volta
ta rastá sês bôte carregadim de carvon-cardiff ,
c'aquel denhirim quente na mon la de Ferraria de Jon Fliner, quê
Jon pagás cash!!! Ma
quel descoberta de Brune, ca durá mute, quê Aimonca que
sês dôs coque na butche que ca sabia gordá segrede,
fazé alvicera corré log na lugar. Anton, dá lá
pa diante, tude quem pude rancá ta panhá quel carvon,
depusitode um data d'one na funde de mar de nôs Baía de
Porto Grande, pa vendel... Sei na el brobe, quê el era de graça.
Organizaçon,
na esquema de panhá quel carvon na funde de mar, n'era cosa facil,
quê tude tinha que obedecé moda na espece dum ritual bem
sincronizode, moda num orquesta, c'aquês bôte bem especial
aberte pa traz, ondé que tava lançode corda ma quel rocegador
de fer, fete pa nôs buldonhe Jon Pampim... Tinha controlada maré,
ma vente de viraçon dente de mei de Baìa, pamode currente
na funde de mar que tava isdá tcheu, na hora de rocega. Descuberta
dessse carvon, motivá e dá lugar a abertura dum nove tipe
de comerce que intchi na rua de Cidade de Mindelo e durá um data
d'ône, pa sustente d'energia na terra e pa bolse ma barriga de
tude quel que ca fosse malondre pa basse rocegá. Era
só viste, tude quel muvimente que rancá, desse descuberta
de Brune ma Maica Barronque: fui fabricode más raston e bote
de rocega, Nhô Liz Badiu, Nhô Henrique, Nhô Fiél,
Nai más uns rapazim aprendiz, muntá um comerce de corda,
la derriba na rua de Muralha na Monte, ma na Praia de Bote, ondé
quês tava passá dia inter, ta fazé corda desfiode
na fibra de carrapate pa vendé. Esse
situaçon de bescá ricurse na mei de Baía, sirvi
mas um vez pa prová cma verdiane é um pove buldonhe que
ca ta inrascá, pamode sê valor Inteligente Universal...
Rocegador de Baía de Porto Grande de Soncente Cab Verd, fui um
home valente, mestre dum profisson que n´era tude gente que sabia
ô pudia fazel... Quê tude quel muvimente que tava parcene
facile d'excuçon, tinha sês regra dure de respeitá.
Durante tcheu tempe, Rocegador de Baía d'Ilha de Monte-Cara, fazé sês bom traboie ta dá sês força produtiva na nôs Sociedade, nem sempre recunhicide moda divia ser... Ma é de lembrá, e ulim li ta screvel que fui graças a ês que quaz tude Pove de Soncente, inda pude cendé durante tcheu tempe sês fagon, pa pô quel panela de midje de tude dia na lume... Nunca Pove de Soncente na épca fecá ta devé tonte a tão poque valente moda Rocegador!
----------------------------------------------------------------------
---------------------------------------------------------------------------------------------------------
|
