|
QUONDE AMOR É MÁS FORTE Junzim, natural
de Figueral de Rebera Grande, fidje de Tomázia irmã
de Ti Dalujinha, ma Meguilim lavrador honeste, trabaiador sem merrinha
qu'iducaba el, deboxe de sês fanoque, dôs broce quel tive
pirdide ta ganhá vida na pedrera, ta pô dinamite, na
tempe das seca, lá pa quês cabece de SanAnton. Bem sinti
vida ta crê corrês pa trás, quê sé
pai Meguilim, pa mode situaçon de pobreza na tempe das seca,
fui obrigode a hipotecá sês casinha ma quel pedaçim
de tchon de sêquer, ondé quês tava plantá
sês mindioca, nhame, midje, fejon e otes pon de caldera qu'era
sustente de casa. Cma quel
one lassim fui tempe de crise, quê tchuva demorá de tchegá
na Ilhas, tcheu dês lavrador perdê sês terra, as
vez té p'um quarta de midje, pal ca faltasse fidje na mesa
pa cmê, mode praze d'hipoteca que tava fetchá. C'aquês
grande chefona chei de dnher e tambaque chei de midje ta stragá,
ta dexá pove morré de fome, que ca tava perdoá,
quê bodzê ês tinha era um pedra na lugar de coraçon. Pai Meguilim,
desgotose daquel situaçon bem morré e assim Mã
Tomázia fui obrigode de bá trabaiá ora na strada,
ora na na cais de Ponta de Sol, quonde trabói tava parcê,
pal pudia garantiba sê fidje Junzim, quel panela na lume de
tude dia. Junzim que
sempre trabaiá bem na scola sem perdê um one, durante
vida de sê pai Megulim, tinha cunsiguide sempre bai studá
pa Liceu Gil Eanes, ondé que deboxe de tude quel sacrifice
de sê pai, nunca perdeba um one e cunsigui fazê sê
exame de quintone, quel passaba que boas nota. Anton, moda
el tchegá de contá, el vrá ta passá note
e más note em bronc sem podê drumi, detode lá
naquel cuzenhola de fortuna de tete coberte de paia, chei de bróc,
ta contá strela na ceu. Um casinha, quel ma sê mãe
tive de fazê pa safá rascada lá p'um tchon de
governe na bera de strada e, que vrá nim de tude sês
sonhe. Margura pa
el, naquês dia lassim era bem grande, d'oiá dia ta bá
ta passá, sem el na pussiblidade de podê bá cuntinuá
sê scola na Liceu de Soncente, inda más que fome na barriga,
quê du que Mã Tomázia tava ganhá era bem
puquim, sconta dês cmê, um verdader catá assá,
moda criol ta dzé... Sorte quel
tive é que quonde fome tava pertal demás na barriga,
el tava rancá a pé lá pa Mar de Francês
via Cova, na bordera de Val de Paúl, ondé quel tinha
um tchutcha que nunca squecê del, nem bandonal, por nom de Juaninha,
um amiguinha d'infância fidja de gente que tinha com quem e
quês namoraba gatchode na Soncente, tude quel tempe quês
tinha stode lá na Liceu. Junzim sempre
tive um grande paixon pa sê Juninha, ma lá na SanAton
naquel situaçon de rique ma pobre, el fidje de pobreza ca tava
nem pensá tentá tchegá perte de Juaninha pa manisfetal
sê amor, pamode familia e também quel monzada d'irmon
que tava gordal, pas ca basse cail derriba. Ma Juaninha,
sê amiga, sê paixon, sê confidente, ês era
tude pa cumpanher. Basta Junzim, tinode na scola moda el era, naquel
tempe de Liceu sempre ijdá Juaninha que tude amor a vencê
na scola, só pas pudesse cuntinuá sempre djunte e, assim
fui té ela cunsigui fazé quintone. Log que Junzim
tava tchegá daquel caminhada de Ponta de Sol, via Cova que
fome na barriga, na Paúl. Juaninha, já ta tinha el preparode
um bli de lete, cuns fongue de banana qu'ela mez tinha fete que tude
sê amor. Anton, Junzim na sê fome, tava cumeçá
ta bibé e cmê rapte, ma ela tava calmal e pedil pal cmesse
devagar, quê tinha más. Anton, Juaninha
mute feliz, proveitá daquel hora pa dzel cma quel one lassim,
s'ela tinha passode na quintone, fui graças a sê ajuda
e que sês pai já tinha ela promitide, cma ela tava ta
bai cuntinuá scola, na Liceu de Soncente. Pa Junzim,
um tristeza bem grande cabá pa invadil sê coraçon
c'aquel noticia, só de pensá d'oiá sê cretcheu
ta bai cuntinuá scoal, o qu'era normal, ma que pa el chei de
possiblidae e tude pa vencê, nada era possivel fazê, pamode
quel situaçon de familia d'seu, que bem travá tude,
num verdader desgraça sem ricurse. Assim, bem
tchegá tempe de scola e Juaninha imbarcá na faluche
pa Soncente, junte ma sês quate irmon que tude one tinha responsablidade
dela e tava guardal d'horas minguádas. Smeme assim, ês
tava ta sigui um czinha esleviode de chatice, quê ês sube
cma Junzim, tava ta fecá. E, da lá de longe na cais,
el tava ta sisti quel partida, triste c'oie chei d'ága, sem
podê dá se quer um grite... Ma, pa consolança
um bilhitim de Juaninha smeme assim inda tchegá na sê
mon em qu'ela tava dzel, pal fecasse descansode, quê ela ca
tava ta bá trocal pa nium daquês buzode de Soncente. De esperança
pirdide e que cosa ta bá piorá, pamode ida de sê
cretcheu que tava matal sê fome c'aquel CANECA DE LETE, pa terra
longe de gente gintiu, Junzim tchegá midi uns dôs vez
na debangá de rotcha, quê tude cosa de vida tava ta bandonal. Moda ta dzide
na terra: - quem quê bom fidje ca t'infrontá, sobretude
quonde sê destine ta traçode, quê Deus ca ta drumi...
E, Deus uvi Junzim!!! Assim, fui
mandode um stafeta pa depressa pa Figueral de Rebera Grande, bá
bescasse Junzim pa bem cdisse n'Admistraçon de Pont de Sol. Basta mede
trancal na corpe, log quonde stafeta tchegá ta dal recode de
basse cdi na poste. Ma despôs el destimi, quê el era um
bocode fulashe (ca tinha mede de nada) e cabá na sê conscença
el sabia quel ca tinha fete nada de mal, ês largá ta
bai. Quonde el
tchegá na Ponta de Sol, Nhô Jon Serra, senhor admistrador
na épca, dzel cum cara séria: - oh rapaz,
bá pa depressa prepará bô mala, quê dnher
pa bô bá cuntinuá Liceu na Soncente já
parcê!... Junzim, spantode que dôs lágrima teimose
ta dexil pa cara boxe, ca queria nem creditá e log bel na ideia,
um data de cosa sobre pruvidência devina etc... E, inda um csinha
scunfiode, el vrá pa sr. admistrador ta perguntal cmanera ? Anton, fui
lá que sr. admistrador explical, cma finalmente tinha valide
a pena el ter insistide ta screvé tude quês carta pa
Merca, ta pedi sê Tiu Zac help, quê finalmente, el tinha
respondide ta dzê cma, d'ago pa diante, já que bô
é um rapaz studiose, el ta fecá ta pagobe bô scola
ma tude o que bô mesté na Soncente, porque el também
querê, pa bô ser um home de bem! E, pa Mã
Tomázia, também problema tava ta bá cabá,
quê Tiu Zac, na carta, também prometê fecá
ta mandal sê santdzole tude mês, pa assim Junzim pudesse
sigui viája tranquile pa Soncente bá studá, sem
remorse de dexá sê mãe pa trás ela só. Anton Junzim,
despôs de ter ranjode sê mala e ter bá tmode quel
bençon sagrode na sê Mã Tia, sê Mã
Tomázia e ter despedide de tude quês gente de sê
aldeia. El embarcá na faluche Carvalho, pa Mindelo bá
studá, cum força de matá. Moda era
custume tude one, malta chei de ligria, tava bá pa cais incontrá
quês cumpanher de más um one de vida scolar, ta bem de
SanAnton e otes Ilha, pa bem studá na Liceu Gil Eanes. Ela ca pude
resisti, sei log um braça siguide dum beje na boca de Junzim,
lá diante de tude gente e pa desesper de sês dôs
irmon, Tomaz e Alfritim que ca fecá nada contente e vrá
brute dmunde que Juaninha, ta perguntal sel tava doida e log ta meaçá
Junzim... Ma Manel
Eduine, um amigue d'infância de Junzim que tava lá, bá
log ta dás fala pas tmasse bem cuidode, quê na Junzim
ês ca tava pô mon, que senon... Anton, Nhô Bertole
guarda d'alfandega bem ta tchegá que sê chicutim deboxe
de broce, ma sê voz roque e cunsigui pô cosa na lugar. Assim, vida
de Scola de Junzim na Liceu Gil Eanes pude cuntinuá, el sempre
que bons resultode, studante serie e trabaiador. Da lá, fui
pedide sê Tiu Zac pa cuntinuá ta ijdal, e Tiu Zac anton
mandal pa Lisboa-Portugal studá Medecina, cosa quel aceitá
log e dzê AMEN! Pa Junzim,
tava ta bá ser vida nova, nova vida... Má cma jal tava
ta sinti sê corpe, ideia na sê tchutcha, amor de tude
sê vida, amiguinha d'infância, confidente, cumpanhera
que sempre sube, naquês momente de margura e tristeza de sê
vida, não só consolal que boas palavra, cma também
limental c'aquês CANECA DE LETE na sês hora de fome, o
que impedil té de morré de doença fraca. Nhô
Quim Ramos, preparal sê mala pa depressa pa Lisboa, quê
jal tinha só vinte e um dia pa stode na Soncente. Tude já
tava pronte pal cambasse Potugal pa sês estude na Unversidade
de Medicina. Cosa ta correl
tude depressa que tempe ta sail de curte, smeme assim el ranjá
manera, el cambá SanAnton, bá despedi sobretude de sê
Mãe, familia, amigues ma cumpanher de miséria. Assim quel
tchegá, alvicera já tinha curride na terra, anton um
amigue dal sê mula imprestode, log el cambá moda de custume
pa Paúl via Cova, ma só que desse vez, el bá
cumpanhode de sê Tiu Cai, de padrim, home serie de barba respeitode,
directe pa casa de Juaninha, pas basse falá ma pais dela e
orientá p'amdjor sês relaçon de noive, moda tradiçon
sempre mandá. Fui um verdader desgraça, quê pais de Juninha q'otchá Junzim poque, pa quel relaçon ma sês fidja, dzê Ti Cai ma Junzim, crú na sês barba cara, cma lá ca tinha hipotse de pensá naquel union, quê sês Juaninha já tava diazá promitida a um grande " Senhor de Terra" (casamente ranjode p'interesse)... Que ca mistide
nem mentá nome, li nesse storia, pa ca fri ninguém. Juaninha,
tude inocente sem sabê czé quel tava dzê, fui trode
de scola, ela ta bai tude drete na sexte one, obrigode a casá
pa salvaba situaçon de familia que tava sês quebradon. Pa ela, situaçon
vrá um verdader drama, dês daquel decison de sês
pai, sem se quer consultal ô pedil sê opinion. Ela tava
passá vida ta tchorá, quê ela ca queria sabê
nada daquel casamente. Juninha,
rabentode por dente, lá cunsigui feji de casa na mei daquel
trapaiaçon, sebi lá pa quês cabece ta gritá,
pa tude gente pudia uvil e dezinbutchada ela dzê pa Junzim:
- oá,
bô sebe cma dês que mi ma bô ta cuntcê, nunca
ninguém tmobe mi, nem ta tmobe bô lugar, que bô
tem na nha coraçon!... Bô ti ta oá esse enel que
stei, bô tita leval ma bô, pa nunca bô squecê
de mi, té dia que Deus quizer, quê bô é
quê amor de nha vida e mi um t'amobe, ti dia q'um merrê!!! Anton, diante
de Junzim ma Ti Cai, ela rufená quel anel daquel Senhor qu'ela
nem sabia quem era, lá pra boxe de ladera ta tchorá
num mistura de desespere, raiba e trisreza. Ti Cai, ba
t'andá pa diante que dôs gron d'aga teimose ta dexil
pa cara boxe, só pal pudia dexasse quês dôs criatura
de Deus, ês dôs só pas pudia falá na sês
vontade. Junzim, rapaz
serie respeitador, dexi de mula e dá Juaninha só um
beje na boca de despedida, log el rancá ta bai cum saluce e
guiza ta pertal peite, té tchegá na Ponta de Sol, el
só ma sê Tiu Cai, pa consolal. Despôs
de tude esse drama e desse triste stora de separaçon pa força,
dexe dôs criston, vida cuntinuá e, Juaninha tive que
casá a força, pa salvá terra de sês gente
e Junzim sigui sê carrera de Medecina, formode na Coimbra, despôs
colocode de Sub-Director, num Hospital na Lisboa. Juaninha
ma Junzim sempre sem podê squecé cumpanher, manté
contacte pa carta scrite durante tcheu tempe... Ma, cosa devagarim,
bá ta calmá. Uns one despôs,
Juaninha bem quei bastante doente, prop mal a ponte qu'ela fui mandode
pa Lisboa d'urgença, bá tratá. E, pa ironia de
destine ela fui internode precisamente lá naquel Hospital que
Junzim era Sub-Director e dator de nome. Tratamente
de doença de Juaninha era prop core e, té aquel Senhor
da Terra sê maride, pa força de cisrcunstança,
otchá tratamente core e dzé cma el ca tava ta bá
podé pagá tude quel tratamente de sê amdjer. Junzim, bem
sube d'entrada de Juaninha na Hospital, pa nome de sê maride
e pa respeite de profisson e quel Senhora Dona, el bá ter de
sês colega ma pessoal que tava trabaiá ma el, el pedis
pa cuntinuaba tratamente come se nada fosse... Quê quonde ela
Juaninha tchegá, ela tava um poque muribunde e ca tava ta conchê
ninguém. Graças
a quel bom tratamente, tmode ainda a tempe, Juaninha cunsigui safá
e cumeçá t'arribá, té que saúde
pô na camin e ela torná incontrá sê ligria
de vivê, ma sempre sem oia Junzim, que manté sempre sê
distância, embora quel chama nunca tivesse pagode na funde de
sês coraçon. Juaninha,
sempre qu'ela tava podé, ela tava procurá sabê
pa gente d'Hospital sês tava conchê um Sr.Dr.Junzim de
Cab Verd, ma lá ninguém ca sabia quem era esse Dator
Junzim, quê lá el era cunchide pa Senhor Dr.João
Livramento Fortes. E, Junzim
que tava stode ta sigui quel tratamente de perte, ca queria torná
vivê quel drama que fazel tonte sofré naquel épca,
e dexal té inda tcheu cicatriz gravode na funde de coraçon.
Bem tchegá
hora de Juaninha saí d'Hospital pa basse pa SanAnton. Anton,
ela bá pa caixa, sabé czé qu'ela tinha que pagá
pa quel tratamente... Quaz qu'ela tava desmaiá, quonde ela
oiá quel contona. Ela dá um grite e dzé: - oh nhas
gente, usis oá que mi n'tita bem podê pagá esse
conta q'tei, nem qu'um vendé tude nhas terra la pa SanAnton!!!... Anton, quel
amdjer na Caixa cum surrise, dzel cma ela ca tinha nada pa pagá,
quê Sr.Doutor João Livramento Fortes ( Junzim ) já
tinha tude pogue e tinha dexode um cartinha pa ela... Na leitura
daquel carta, ela pude sigui tude quel desfilar de sê vida ma
vida de Junzim e sês grande amor de tude tempe, ma sês
saparaçon naquêl dor em que ferida nunca ta cicatrizá...
Inda más pa prova, Junzim metél quel anel de recordaçon
de sês separaçon, quel dia lá na Passája,
na carta e dzel: - Tratamente
ta tude pogue, assim bô ca tem nada que priocupá nem
dzé niguém, quê esse é um problema, só
de mi ma bô... Pa tude nôs amor que nô vivé
e que té inda ta ixisti, também nunca um squecé
de tude aquês one que bô e só bô mata-me
nha fome c'aquês CANECA DE LETE que bô tava gorda-me junta
ma quês fongue de banana, que tude bô amor, num tempe
qu'um ca tinha nada!... Quonte a
nôs amor, nunca mi a de squecé de bô, té
dia qu'um morré, pa prova basta, que té hoje um ca casá
e um ta cuntinuá ta vivé na nha casa ma nha Mã
Tomazia, qu'um mandá bescá... E, sum ca morré
um dia um ta voltá?!... Juaninha, muque, imbutchode sem podê dzê um só palavra, ága ta dexil pa cara boxe, bá ta corré pedi quel infermera de favor, pal entregasse Sr Doutor João Livramento Fortes, quel anel de volta!... Naquel mesma
carta, ela pol um palavrinha de volta, ta dzel simplesmente, cma lá
ca tinha perdão e só ela tava pedil pal lembrá,
cma ela, scontra sê vontade, fui sacrificada de tude sê
familia, cosa quel sabia dritim, ma que nunca té data de hoje,
ela tinha dexode D ' AMAL DE VERDADE...
|
