|
UM SEGUNDA-FERA DEBOXE DAQUEL ESPINHERA DE PRAÇA STRELA Fudjinha parcê ta bem t'andá descolçe, na ponta de pé, log cidim, daquês banda de Tchã de Sumeter que sês dôr de crove que tava custumá maltratal e quemal na sola de pé! E, Deus defendé sel tocaba num daquês pidrinha malvôde daquel tchon, quê senon sê dia tava fecá log estragode de dôr. Que mute
cuidôde, ma sempre ligirim ta bem que gitim, só pressa
quel tinha de tchegá quel dia de Segunda-Fera lassim, moda
de custume, dia d'alvicera de cosa de vespera (dia Dmingue) passôde
na tchon de Soncente, deboxe daquel Espinhera de Praça Strela
perte de Club Mindlense, ondê que tude pove tava bá juntá
e, que pa nada desse Munde el tava fecá sem marcá sê
ponte. "Folha",
grande amigue e cunchîde na terra, irmon de Jack de Beta e Maica
Barronque, deboxe de sê poque escola, tinha um mimória
feliz pa fixaba e prendê d'uvide, tcheu cosa de Cultura Brasiler
que tava cumeçá dês de Nordeste, cambá
té Rio de Janer. El tava conchê
Jorge Amado escritor, ma Luiz Gonzaga museque de sês baião,
quel tava passá vida ta cantá e compará c'alguns
cantiga de nôs terra que tava na moda sima "Bô Cabel
Já Da-me Na Cara" e más ôtes que ca ti ta
beme na ideia grinhassim!... Um verdader enciclopédia de tude
ês cosa que tava incantá nôs gente. El tava conchê
Mangueira que sê Escola di Samba e também Botafogo, Flamengo/Fluminense
(Fla/Flu ), quês dôs equipa sagrode e más rival
de Rio, moda Mindlense/Académica na Soncente que tude sês
estoria, ma sês samba, sem nunca ter puste pé na Brazil Pirraçente
moda el, ca tinha dôs na tchon de Soncente, inda por cima que
tude cosa d'arri té fazê pove, chichi na calça,
quel tava contá na sê gête sô d'seu sempre
serie, sem arri, o que tava faze-me lembrá, quel grande actor
comique Mercone, que na sês filme, nunca tava arri, por nome
de Pampelinas aliás Buster Keaton. Quel plumanhã lá, Espinhera tava tude fluride de marel ta tcheré sabe, Sol já tava prop quente, ma cum tempe bronde quonde Fudjinha tchegá cumpanhode ma sê cumpade, Putche de Nha Sabina, más cunchide na praça pa ser um boys medente p'afronta, que té um folha de mote se caíba de note na tchon perte del, cabel tava intchal na cabeça e era capaz log de sei ta corrê… Ma naquel
momente, Fudjinha ma Putche já bem ta tchegá na conversa
ta lembrá cumpanher daquel bom arroz c'atum, c'azeitona ma
tomate fresque, quês tinha cmide de vespra, lá na Bar
de Gêgê ma Alberte manquim, perte de Quintalona… Quonde pa
depressa parceba quel primer arreloce de dia Dmingue, pa Segunda…
Um data de gente, ta bem pa traz de Djô de Jon du Chîque
que na épca era guarda-rêdes de Mindlense, chei de raiba,
cum bique grosse dum kile e mei, intchode dum soc que Curuca (Deus
dás céu) tinha el dode naquel jogue de Mindlense/Amarante
de dia Dmingue. Rivalidade daquês dôs criatura, já tinha durode tchéu, quê tude ês tava passá vida ta chatiá cumpanher que stora de quem qu'era, mas bom keeper (guarda-redes). Anton quel
dia Dmingue lassim, num jogue de Campionate, Mindlense/ Amarante log
na príncipe de jogue, Mindlense metêba Curuca, um senhora
gole... Djô
du Chique, proveitá log e pô ta grital dum baliza na
ôte, cma el era um azelha e ta fazel um data menhoce, ma palhaçada
que broce… Curuca vassalá, ca pude guentá quel
goze, proveitá um jogada, bem da lá de baliza deboxe
ta corré té tchegá na Djô, na mei de confuson
daquel jogada e proveitá pa bá ta dal um bom soc na
boca e log bai ta sei fora de compe ta corré, ondé quel
despôs foi castigode e suspense pa Federaçon de Futebol,
um one sem ijgá bola. Djô,
quel Segunda, tchegá na Praça Strela,que sê bique
intchode ta perguntá tude gente pa Curuca, ta explicá
pove, cma tude foi tão rapte, quel ca tive nem tempe de riagi.
E, sô o quel tava pedi tude gente era pa dzel ondé que
Curuca tava pal ba descontá, sê soc. Afonso Coronel,
quel grande buzode de sempre e rote de Praça Strela que sabia
de tude cosa, proveità log de situaçon, el vrá
pa Djô t'arri, el dzel: - Quont'é
que bô ta da-me s'um dzebe ondé quel está ? Djô
dzel, vinte escude! Anton, po-me el na mon de favor, primer, ok ?!
Dzê Afonso!... Djô pol sê nota de vinte na mon,
Afonso tude contente largá t'arri, el dzel cma el tinha ôiode
Curuca quel hora mez, ta bai pa Caizim bá cagá… Djô,
largá ta corré pa Caizim log quel hora que tude quel
pove traz del, el tchegá lá, tava Girolde pliça
scocá-cáca qu'era guarda de Caizim, el perguntal chatiode
dmunde : - Ô
pessoa, quem bô?... Djô, chei de raiba, forton que sê
voz grosse, vrá dzel, cma el era Djô de Jon du Chique
e pal abri porta, quê o quel queria era sô descontá
sê soc quel tinha el dode a traiçon naquel jogue de dia
Dmingue! Basta, nôs Curuca que já sabia cma Djô que sé bique intchode tinha estode ta espial pa tude banda de tchon de Soncente, dês daquel dia Dmingue. Panhode de surpreza e sem sabê cmanera que Djô sube cma el tava lá, inda más na Caizim?! Boca cumeçá
ta vral margose, té dal log goste de sabon trançode
de tcherrica que bel dum vez, na mei de tude quel trapaiaçon. Da lá
dente, el vrá pa Djô, el dzel log cma el ca tava t'abril
porta nem flaça! Anton Djô, respondel cma el também
ca tinha pressa de basse da lá, quê já agora qu'el
tinha el incontrode el ca tava ta bá largal. Despos duns hora
de conversa, nôs Curuca resolvé dzé Djô
OK ! Ma a condiçon, qu'el dába el, um sôquim bem
devagarim ?!... Djô,
ca esperá pa más e dzel log Ok!!! Já bsote pensá naquel suspense de tude quel pove traz de Djô ta esperá quel hora daquel soc?! Bsote ca ta nem imaginá!... Basta Girolde,
que bem sube, du que tava ta passá, cma el era Plica Scocá-Cáca,
guarda de Caizim pa recebesse denher d'use daquês ratrête,
bá log ta escoá da lá, pa ca dasse tistmunha,
cosa prop de custume de terra, na épca, quonde ta tinha quês
rixa, ma guerra marcôde lá pa lode de Coré. Anton foi
um verdader cena de teatre, Curuca abride porta já preparode,
marrode dente na boca pa recebé quel soc de gigante de Djô
de Jon du Chique, inda que calça na mon ta cabá de besti
que Djô ta dal quel grande soc guentôde…Nhas gente?!..
Fui um cosa sô ! E, nôs
Curuca levode sé bom soc, debangá da lá derriba
dá escuá na sé broque de CAIZIM, ondê quel
tinha estode ta dá de corpe, dritim pa mar!...Foi um verdader
espetacle d'oiá nôs Curuca ta nadá, ta sei na
praia tude borrode e quel pove morte de rise que nôs Djô
ta bai tude bajofe, pamode el que tinha descontode sé soc. Sorte de
Curuca é que maré tava cheia, assim el quei foi dente
de mar, quê se maré tava seca era log um chatisse!...
Assim, el ta sei de mar, Djô dexi, bá bescal ta dzel
cma agora ês tinha fecode "all square"(impôte)!...
Ês
dá quel monzada e, moda de custume, tude quel stora bá
cabá, lá na butequim de madrinha de tude gente, Laura
de Gaspar de Praça Strêla, deboxe de Mindlense c'uns
grogue e bafa de escabeche d'ôie lorgue, especialidade daquel
casa, conta tude pagode pa nôs Djô de Jon du Chique "big
man" que na funde tinha sê bom coraçon… E assim,
vida pude cuntinuá na tude sê serenidade daquel Segunda-Fera
que más um alvicera que bem juntá má tude quês
ôte passode naquel fim de semana de tchon de Soncente, deboxe
daquel Espinhera Fluride de Praça Strela, moda de custume que
tude sê pove sabe contente… Zizim Figuera ( José Figueira, júnior ) -------------------------------------------------------- V o l t a r Comentário:
|
