UNS FÉRIA NA BUBISTA - EXPERIENÇA DE VIDA DUM DATOR CRIOL

Pa el, nuvim ta bem de curse moda el contá, fui sê primer e últma experiença na qualidade de Dator sportive, quê cosa correl tão mal quel jurá pa nunca más. Primer, fui log um chatice convencê quês ijgador na jogue pa bibesse oralite quê, pa ês, era moda se Dator tava ta querê dás purgante. Anton, na intervale de primer jogue no tava impote, ma na fim no perdê pa três a zero, ta levá um bom liçon de futebol.

Moda tude fidje patriota amigue de sê terra, despôs de terminá Liceu el também tive de camba estranger. El ba prendê ser Dator, pa despôs voltá e bem trabaiá na sê terra, pa bem ijdá sê pove.

Um vez formode, el fui colocode na Rebera Grande - SanAnton, ondê quel ba fazê sê primer traboi de Dator. Anton, contecê cma inda ca tinha nem oite mês quel tinha tchegode pra lá, el recebê um cunvite pa siguiba na caravana sportive de futebol Rosariense, que tava ta bai pa um tornei na Bubista, na qualidade de Dator d'equipe.

Pa el, cosa bem quei dritim, quê era festa de 14 one de Independênça de nôs terra Cab Verd e na sistema de rotaçon de ilhas, naquel one de 1989, era vez de Bubista, lugar ondê que tinha dezanove one el ca tinha puste pé.

Anton, log quel recebeba quel cunvite e que mede de fazê mariode mode falta de experiença, el tive uns dia ta prepará pa quel viaja. Na sê caxa de ramede, el meteba uns data de oralite (sal de reidrataçon pa bibê) ma vitamina C. Anton, sê prime, que oial ta fazê assim, perguntal pa qsê era tonte oralite, quê parcel cma na Bubista ca tava que nium epidemia de cólera, salve seja!!!

Dator, na sê calma, pô ta explical cma oralite era pa ijgador bibeba na intervale de jogue, pa mode calor e pa recuperaba sês sal pirdide na esforce. Ma prime fecá cum cara de quem que tava vincide mas não cunvincide e dzel cma el é que sabia do quel tava ta fazê.

Despôs de tude esse preparaçon e conversa, Dator ba ter de treinador d'equipe pas orientaba pa amdjor tude cosa pa ijgador, moda alimentaçon, hora de recolhê pa drumi, etc. Durante estage, antes dês basse pa cumpetiçon, Dator otchá cma, daquel manera lassim, el tinha quaz certeza cma Rosariense tava ta ba fazê um bom resultode na Bubista e que amdjor resultode ca podia ser senon ganhasse quel taça! Quê el, na sê fibra de santantonense, também tava otchá cma já era tempe de SanAnton dexá de ser bombe de festa.

Pa el, nuvim ta bem de curse moda el contá, fui sê primer e últma experiença na qualidade de Dator sportive, quê cosa correl tão mal quel jurá pa nunca más. Primer, fui log um chatice convencê quês ijgador na jogue pa bibesse oralite quê, pa ês, era moda se Dator tava ta querê dás purgante. Anton, na intervale de primer jogue no tava impote, ma na fim no perdê pa três a zero, ta levá um bom liçon de futebol.

Quês moce d'Académica de Bubista dá um verdader show de currida na Compe de Jogue e ês tava té ta parcê livezim. Tive até um bubistano que tchegá perte de mim e dzeme na uvide cma na Bubista quês moce tava treiná na areia de duna, ta corrê trás de besta.

Dator confessame cma el sinti prop só, descreditode e triste e lá el ba gordá na sê caxa de ramede o que inda tinha daquel pó maldite.
Triste d'oiá cma ca tinha más hipótese d'ês ganhá quel tornei, pa el tude quês regra ma principe quel tinha cumulode e queris pô na prática pa bem de sês equipe ba ága aboxe...

Anton, tude gente esprajá corpe num descontra e fui um ijgar de bisca sem conta té de madrugada, sempre regode de grogue e más grogue quê, na fim de conta, tude gente de caravana tinha trazide sê garrafinha bem gatchadim, o que provocá um inveja naquês moce de Mindlense, bem controlode pa treinador, Alberto, quel que tinha brilhode na Benfica.

Naquel ote dia, um bocadim antes de jogue rancá, o que tinha sobrode daquel grogue de véspra fui dividide entre irmon ijgador de tude ilhas, sem rabica nem merrinha, o que dexá Dator inda más lixode e descreditode que sê oralite...

Anton, fui moda um milagre, quê quês moce fazê um jogue de gaita, que té tava ta parcê mintira. Quês perna, que de véspera tava ta parcê pesode moda tchumbe, vrá liger e pô ta voá moda s'ês tinha asa. Nô ganhá quel jogue ta dá um show de futebol e inda no cunsigui fecá na sigunde lugar de tornei.

Más tarde, nha prime bem ter de mi e, sende nôs dôs dum idade, el dame um conseil que só quês gente más bedje de nôs terra sabê dá, baseode na experiença de vida. Anton el dzeme: nesse vida n'é facil mudá custume de gente e, nesse bo profisson que bo tita rancá, bo tem que prendê cma amdjor ramede é sempre aquel que doente ta ceitá na sê cabeça e que, pa el, é quel que ta fazel bem! Hoje, despôs de tude ês one, um ca nem sabê se nha prime ta lembrá desse passaja entre nôs, ma mi nunca más um esquecê de sê consei.

Despôs de recordá tude ês peripécia de vida de nôs caravana, um tmá nha tempe e um pô ta lembrá que tristeza daquel boa épca (dezanove one antes) cum tinha estode na Bubista. Naquel tempe que tava comprode um lagosta pa cem escude, naquês tenda espaiode na praça, na morabeza daquês gente de terra dum vez, daquês note cum drumi que nha lançol fui quel céu tcheu de estrela na praia de Chaves, daquês amor cum ranjá e jurá...

Tude na nha pensamente, inda um ca tinha tide tempe nem de vesitá vila, despôs de tonte one, que tude cosa mudode e lá já n'era quel praia de Chaves de meu, ondê que tude era note escure, deserte e silenciose, ta fazê parte dum cumplicidade que só mi, ma el, ma Deus sabê! Nhas gente, progresse tchegá na Bubista e trazê junte ma el tcheu hotel talione, espanhole e otes nacionalidade.

Que ajuda dum amigue, um cunsigui fecá num hotel talione daquês pa um bom prece que tude inquante. Cliente era quaz 99,9 % tude talione e assim era também cmida e múseca, c'aquês gente em grupe ta bai ta bem, sempre num ambiente dvera cem por cente talione, té cum pessoa tava sinti quel tava n' Itália.

Anton, lá torná beme quel sodade de nha Bubista dum vez porque té quês impregode, pa força de custume, quonde tava dirigi pa mim, ês tava té ta falá ma mi talione... Ma cosa que fazeme sinti bastante é que talione ca ta lá só pa mode hotel. Quê hoje india metade daquel populaçon é talione.

E se nô juntás c'aquês que bem de costa d'África, más pessoal binde d'otes ilha, quel pessoal prop de Bubista hoje té jás é más poque!... E nha tristeza ma nha grande preocupaçon é que, se cosa cuntinuá assim, Bubista ma sê prop pove ta cabá pa fecá descaracterizode na sê paisaja e sobretude na sê cutura.

Oxalá que prece a pagá pa esse cosa tchmode progresse ca ta bem ser assim tão core!

Zizim Figuera (José Figueira, Júnior)