KONTRADANSA

Na radidansa di nos andansa
kantu ki tenpu pidi-nu dimokransa
nu longa mon mas nu ka alkansa
enbora fladu "dja nu ten mudansa"
//
bentu brabu sen ordenansa
faze raboita pasu di dansa
mas rufu di berdi é vos di speransa
distinu sunhadu di tudu andansa
//
si labuta rixu k'é selu nos fiansa
na ritimu di vira ku kontradansa
ka nu tuntunhi mas ten konfiansa
: distinu brabu é nós ki ta mansa
//
nu poi konsiensia riba balansa
pa más dor txeu ti ki ta lansa
di simia speransa nunka nu kansa
ki sota distinu é nos eransa
//
séu di mundu, faze-nu transa
nhordes la riba, da-nu bunansa
alma ta striba dja kre diskansa
di dor ta finka más pior ki lansa

José Luiz Tavares